الموضوع: معلش سؤال ساذج بس محتاج رد ضرورى

المشاركة الأصلية كتبت بواسطة punisher

نوافيكم بأخر التطورات :)

طبعا لما بعتلها الرسالة كنت متوقع انها مترودش ولكن للأسف ردت وبعد نقاش طويل وشد وجذب وافقت انى اقابلها " للمرة الثانية " فى وجود والدتى ووالدتها ... انا وافقت على المقابله عشان مكنتش عارف أخد قرار نهائى بالقبول أو الرفض ..

نيجى لتفاصيل الكلام فى المقابلة واللى كان مدتها ساعة وربع " دا نظرا لظروف الحظر " بس هما كان ممكن يقعدوا أكتر من كده بكتير

قبل ما اتكلم أحب اوضح انى بشتغل مع والدى وعندنا معرض بس انا مش باخد منه مرتب ومعايا فلوسى وفلوس اخويا بستورد بيها بضاعة وببيعها وده هو مصدر رزقى الوحيد والحمدلله مكفينى من غير ما أخد مليم من أبويا , انا بسافر واشترى البضاعة واخويا اللى مسئول عن بيعها عشان انا معنديش خبرة فى البيع ولا اعرف اتعامل مع الزباين

تفاصيل المحادثة بقى ان هى شايفة ان انا كده معنديش شغل مستقل بنفسى وطالما انا بستورد بس فا ليه مفتحش مكتب استيراد واشترى للناس اللى عيزينه أو انى اشتغل فى مكتب محاسبة أو أبحث انى أكون وكيل لأى شركة من اللى بتعامل معاهم ... فهمتها ان انا مينفعش اشتغل عند حد وعندى شغلى ومرتاح فيه ومينفعش اكون وكيل لأى شركة عشان طبيعة الشغل نفسه مينفعش أكون وكيل لحد وكمان لا يعقل انى افتح مكتب استيراد وانا مزروع فى وسط السوق والتجار وممكن أجيبلهم اللى عايزينه بس انا مركز فى شغلى مع اخويا فى المرحلة دى .... واحيانا بروح المخزن مع العمال واساعدهم فى التحميل

كان ردها ان انا دلوقتى أقول لبابا ايه , لو قلتله انك بتشتغل كده هيرفض , قلتلها تبقى قوليله هو صايع ومش بتاع شغل ( عشان اقفل الكلام معاها فى نقطة أبوها )

راحت أمها ادخلت فى الكلام وبتقولى يعنى انتا كده مش بتاخد مرتب , قلتلها اه , وحضرتك متشغليش بالك بالموضوع ده مستورة والحمدلله ,, فا قالتلى يعنى انتا كده تعتبر قومسيونجى " فا كنت هديها بالجزمه " قلتلها انا بستورد بضاعتى وببيعها فى معرض ابويا والناس اللى بتجيلى انا مش بروح لحد

المهم خلص الكلام وجينا نمشى هما كانوا راكنين العربية قدام الكافيه وانا كنت راكن بعيد شويه , فا وصلتهم للعربية ومشيت انا ووالدتى عشان نروح للعربيه واستغربت انها متحركتش من مكانها غير لما انا مشييت ( طبعا عشان تعرف نوع العربية ايه )

لما روحت بعتلها مسج قلتلها انتى تعبتينى وكان ردها انتا كمان تعبتنى وياريت بفايده , فا قلتلها انا هقولك حاجة من غير زعل , " ان دا شغلى اللى تعبت كتير عشان اتعلمه ومستحيل انى اغيره أو اشتغل اى حاجة جانبه عشان مينفعش وكمان انا مش عايز .... والأهم من كده ان انا عندى طموح ودا مش مرتبط بانى أكمل معاكى أو لأ , يعنى انا مكمل فى طريقى سواء مع بعض أو لوحدى , انتى شايفه انه حاجة عادية وانى هفضل زى ما انا طول عمرى فا دى وجهة نظر واكيد تحترم بس انا راضى جدا عن اللى بعمله "

وكان ردها ان الوقت اتأخر ولازم تنام عشان الشغل ونكمل كلامنا بعدين , قفلنا كلام على كده

طبعا الكلام ده من يومين وانا لا يمكن اتكلم أو افتح كلام معاها " هى من النوع اللى هوا انا مش المفروض انى اتكلم ولا انى اسال عليك ... اسال بصفتك ايه ؟؟ .... بس عندها استعداد تتكلم بال 6 ساعات لو انا بدأت الكلام "

صاحبى قالى my way or the high way

والدتى مش مرتاحة للموضوع وبتقول انها تقيله وامها مش سهلة والموضوع طول وبقى ممل وصاحب اخويا جايبلى عروسة 20 سنة بتقولى روح شفها وخلى دى مبلطة كده طالما على قلبهم مراوح

انا بدات ازهق من الموضوع وبعد اقارنها بخطيبتى السابقة اللى كانت بالنسية ليها ملاك من السما حتى والدتى بتقولى يا ريت كان فى نصيب كانت من توبنا ومش متنكة وشايفه نافسها وبعدين دى اكبر منك مش عارف شايفه نفسها على ايه

مستنى ردودكم ضرورى

بص انا كنت داخل اكتب رد بس اما قريت الرد ده دمي اتحرق و هاقول كلام تاني خالص

اولا ..... اللي ما تسمعش كلامك و تعمل راسها براسك هتطلع عينك و عين اللي خلفوك و عين اللي خلفوهم فوق البيعة

ثانيا واضح انها شاربة طبع امها و امها هتساهم كعامل مساعد في التفاعل الكيميائي لتطليع عينك بسرعة و كفاءة

ثالثا في ضوء الرد اعلاه : انا عايز اقول لفظ ممكن اتوقف فيه شهرين من المنتدى


هو حد لاقي؟؟؟؟؟؟؟؟


هو خلاص يا موظف يا بلاش؟؟؟؟؟؟؟؟ يا عم انا موظف و يا رييييييت اعرف ابقى - ما شاء الله لا قوة الا بالله اللهم لا حسد - زيك ...... رئيس جمهورية نفسي اروح الشغل وقت ما احب (انا مش قصدي انك بتتدلع لاني عارف ان اصحاب الاعمال بيبقى قلبهم عالشغل و القرش اكتر من الموظف...... بس مفيش حد هيقول لك انت فين و اتاخرت ليه و العوق ده) ...... اخد اجازة وقت ما ظروفي تسمح ...... و في الاخر انا رئيس جمهورية نفسي

و بعدين الارزاق بالله مانا ممكن ابقى موظف و اترفد


و الله العظيم لو كملت في الموضوع ده تبقى تستاهل اللي هيجرالك لانك شفت كل الانذارات دي و ربنا خلاهم يكشفوا نفسهم قدامك و كملت برضه ...... زي ما واحد انا اعرفه عبيط أوي شاف انذارات كتير و كمل و اتنفخ في الاخر (العبيط ده يبقى انا على فكرة و صدقني مش عايزك تبقى زيي)


هما هيمشوك على كيفهم؟


بص يا باشا ...... خد لفة في المنتدى و شوف اللي مراته سابت له البيت غصب عنه و الا ما سمعتش كلامه و سافرت مع اهلها الخ الخ الخ ...... هتلاقي البنت دي من نفس الخامة ...... لا تطيع و ترى ان الطاعة للزوج هو انتقاص منها


اححححححححححلق