طالب تقييم و رأيكم فى هذه الابيزا

**Hopa777** · 12-09-2013 02:43 PM

صباح الفل والياسمين على جميع الموجودين.......

انا لسه قدامى وقت للشراء..وبرضه قدامى ابيزا صاحبها مش مستعجل على بيعها وزى ماتقولو
بيبعها بيع غناوة...يعنى مأظنش عارضها فى النت او بينزل سوق هو بيروح وبيجى بيها شغله اللى
بجانب مكان عملى....ولقيت مرة ناس بتبص عليها وفاتحين الكبيوت من حوالى شهر .....
اما سئلت السايس اللى هو تبعنا ..قالى دى ناس بتتفرج ع العربية وعرفت انه عايز يبيع....
عشان انا مش جاهز بالفلوس قولت من غير احراج..... سئلت صاحب العربية على اساس
ان جوز اختى موصينى اشوفله عربيه مستعملة.....قولتله انت عارض للبيع...قال اه....قولتله طب
ايه الاخبار ...لقيته راح فاتح الكبوت ولف فتح باب السواق ولسه رايح يفتح الشنطه...رحت قايله..اصبر..
ان مبفهمش فى الكشف ع العربيه...انا عايز اعرف منك ولو فيه نصيب هبقى اجيب جوز اختى وميكانيكى
يبصو عليها ....قالى عموما العربيه زى الفل ...بص حتى فرش الابواب ..وفيها الفرش الاصلى...طب عشان انا مكنتش حاضر بالفلوس مرضيتش اطول عليه واقعد ابص فى كل العربيه وخصوصا انى معنديش خبرة فى
الكشف ...قولتله عموما احنا نعتبر جيران وانا واثق انك محترم وهتقولى اى عيوب ومش هتغشنى.....
قالى متقلقش ولو عايز تجيب حد يبص هاته...قولتله طب بتبيع ليه...قالى عايز اركب حاجة تكييف وباور....
قولت طب انت طالب كام...قالى 30000ج ...قولتله ده نهائىوالا هينزلو ان شاء الله....
رد عليه واحد كان معاه تقريبا سواق فى الشغل ...قالى ان الناس اللى كانت بتتفرج
عرضو عليه 29000 ع التربيزة وهو ما وافقش....قولتله عموما ربنا يقدم مافيه الخير.................

بعد مشاراكتى معاكم امبارح روحت الشغل لقيت العربيه واقفه زى كل يوم...سئلت السايس ايه الاخبار
قالى لسه وماحدش جه اتفرج تانى....قولتله هو تقريبا بيبيع على راحته مش مستعجل...................
ملاحظاتى ع العربيه وبناء على كلامه : ابيزا94 كاربيراتير 1300 - 4ابواب -
الشكل الخارجى : تقربيا فبريكا بره لان الابيض بتاعها مدى على سن فيل زى مايكون قديم
الجزء السفلى من الاكصدام اللى يبيقى عاده فيه الشبورة وتقربيا اسمه الكساحة فيه تكسير فى الاكصدام الامامى وكذلك الخلفى ...وخبطة او ترييحه صغيرة كده فى الباب الخلفى ....يعنى تقريبا عايزة دوكو والسمكرة الله اعلم على خفيف والا تقيل لو فيه بقى بارومة الله اعلم
الشكل الداخلى: فبريكا على كلامه والصالون معقول والتابلوه يمكن عايز يتلمع وينضف بس معقول
الكماليات : تقريبا 2 زجاج كهربا وسنتر ( ومن غير تكييف ولا باور)
الميكانيكا والعفشة : على كلامة المفروض انهم مافيش فيهم مشاكل

السؤال هنا : لو العربيه على افتراض انها زى ماوصفت ..تساوى كاااااااااااااااااااااااا ااااااااااااااااااام
وتخلص بكام تبقى كويسه....وهل بالمواصفات دى تبقى بالنسبه لى عربيه حلوة والا ايه؟
مع انى كان نفسى فى تكييف وباور...بس على قد لحافك مج رجليك والحمد لله...............
افيدونى يا رفاقى.........

**mohammad isdf** · 12-09-2013 03:23 PM

بص يا باشا، انا طبعا عيب اتكلم فى وجود عتاولة قسم سيات وهما معروفين لكل الأعضاء بس انا ممكن اتكلم عن تجربتى والنتيجه اللى استنتجتها.

الحوار اللى بتتكلم فيه ده ميجبش اكتر من 27 الف .. ولو هنقول السوق غلى شوية يبقى 28 ويوم ما يضحك عليك 29 !! بس لو حالتها ممتازة يعنى مش هتدفع ولا مليم عليها، خودها بـــ 30 !! عايزك تركز معايا

السؤال اللى بيطرح نفسه دلوقتى .. الفلوس المتاحه قد ايه ؟ لو دى متاحه وممكن نصبر شوية ونكمل ونجيب حاجه باور وتكييف .. يبقى احسن مليون مرة، ولو مش متاح اكتر من كده، وميهمنيش موضوع الباور ولا التكييف، يبقى اتوكل على الله وفاصل معاه للسعر اللى قلته ده، بس ابدء بسعر اقل منه يعنى قوله ان رنجها مثلا 26، وأى عربية طالما مستعملة هيتصرف عليها وده حقيقى، وانك لو هتركب تكييف مش اقل من 3000 جنيه ... وعايزة سمكرة غير مصاريف نقل الملكية وغيره، وحاول بالطر يقة دى تنزل معاه .

هو اكيد استوى لأن كل الناس اللى جت والعربية ممشيتش يبقى كلهم منزلين السعر وهو مصمم ع سعر معين وساعتها اقعد دق ع المسمار لحد ما يدخل الخشب .. يعنى يقتنع .. !

وطبعا السعر اللى قولته ده مبدئى بدون معاينه طبعاً، وع فكرة ان جايبها اغلى من كده وصرفت عليها فميضحكش عليك الله يخليك .

**SYD** · 12-09-2013 03:40 PM

مهما كانت ال94 نظيفة لا تزيد عن 28 بأي حال من الأحوال
وكمان مافيهاش تكييف يبقي 26 حلو اوي عليها
لو فعلا حالة نظيفة اوي وحالة شاذة ممكن تسوي ال30 - بس اعرف انك دافع فيها كتير والعربية محملة ولو لا قدر الله حصل ورشيت برة فأنت خسرت الميزة اللي دفعتك الفين او 3000 زيادة عن ثمنها في السوق

وعموماً 30 يركبوك 98 فيها تكييف كمان بس مش حالة شاذة وممكن يبقي فيها شوية شغل بسيط

تحياتي

**SYD** · 12-09-2013 03:44 PM

ماشوفتش ردك يا حودة - سوري
وقت لما فتحت الموضوع مكنش حد رد

عموماً كلام محمود بردو صح - العربيات ال94 مهما حصل فيها مش بتزيد عن ال30 (دة لو عامل فيها ما لا يعمل)
ما بالك بعربية فاضية تقريبا ؟؟؟ لو فاضية وحالة عادية ب25 لو فاضية وحالة شاذة ممكن توصل لل30 بس حالة شاذة في دماغي دي حاجة كدة تشوفها ماتكشفش عليها - بيبان عليها من وقفتها

هحاول اجيبلك صور لعربية حالة شاذة من اللي اقصدها

تحياتي