الموضوع: اشتريت العربية a7 بس عايز اسأل سؤال لخبراء القسم

المشاركة الأصلية كتبت بواسطة A.Adel

يا اخوانا أقسم بالله ما قصدي أشوه حاجة ولا اضايق حد
هو أنا عندي توكيل عربية منافسة مثلا ؟؟!!!!!
وماكنتش شغال في سكودا على فكرة :)

بس لازم الناس تفرق بين الهجوم
اللي غرضه تشويه العربية بذكر حاجات مش فيها أو تطليع إشاعات عليها

وبين توضيح حقائق ,ممكن حد لما يقراها ما يرضاش يشتريها
أو حتى لو جابها ,يبقى عارف اللي ممكن يحصله
مش كل الناس عندها استعداد مثلا تغامر في فتيس DSG
مش كل الناس عنده استعداد يركب عربية باكتر من 200 ألف والتوكيل ينزلهاله بـعفشة torsion beam
مش كل الناس ترضى إنها تركب عربية معروف إن سعرها مبالغ فيه
يا اخونا شوفوا سعرها مقارنة بـ ال golf 7
مش هقولكم passat ولا jetta عشان مش نازلين بنفس التكنولوجي

اللي جابها ,ربنا يباركله
واللي لسة هيجيبها برده ربنا يباركله

مش عيب يعني إنك تقول عيوب الحاجة
يمكن بس الناس حاسة إني ضدها
لاني بقول عيوب بس
بس ده لأن الناس هنا قايمين بالواجب وزيادة من حيث المميزات
فـمفيش داعي لتكرارها
كل ال reviews بتاعتها بره ممتازة وعربية ليها سمعتها هنا
ده مفيهوش كلام ومش محتاج إني أتكلم عنها


واخيرا اللي شايف إني قلت معلومة غلط يصححها
وانا أول واحد اعتذر عنها
غير كده مفيش حاجة اسمها تشويه أو الكلام ده

يا أستاذي الفاضل..كل ما هنالك إن الناس ممكن تأخذ عليك أسلوبك وإستخدام بعض الألفاظ والعبارات الغير مُرضية..زي هبل..آخر أحلامه..كلام من هذا القبيل..ده الغير التشكيك في معلومات أي حد والتربص له وسعيك في إنك تفضل تجيبله لينكات.حتي لو قالك إنه شاف حاجة بعينه بردو بتكدبه طيب ليه ؟؟
- لو ركزت في سرد الردود.لما قولت مثلاً إن نزل إعلان مفيهوش كذا وكذا وكذا أنا مردتش عليك لسببين..السبب الأولاني إن بتكلم علي حاجة أنا شايفها بعيني ( ممكن تكون العربية خليجي - ممكن تكون وكيل بدفعة تانية فيها الإضافات دي ) السبب التاني إن نفس الجرايد دي لما نزلت الفانتازيا الـ TSI كتبوا إنها 1600 سي سي وبفتيس DSG ( يعني هما نفسهم بيكتبوا معلومات مغلوطة ) زي بردو بعض الصحف اللي كتبت عن مواصفات الـ A7 الهاي لاين ومش كاتبة فتحة السقف ولا الـ Smart Key ولا الزينون.دي كلها إجتهادات من محررين معندهمش خبرة.

- أما تعقيباً علي نقطة التقليل من شأن العربية فكلام حضرتك متناقد.يعني لما تقولي أنا مش بقلل منها وهي ليها وضعها.وفي نفس الرد تقولي إزاي بـ 200 ألف وعفشتها تورشن بيم..هل ده مش تقليل ؟ لما تقولي مفيش حاجة اسمها الجيل الرابع في الفتيس وبكرة تشوف بعد 20 ألف كيلو الفتيس هيجراله إيه ده مش تكسير مقاديف ؟ في حين إن كللللل الدنيا عارفة موضوع الجيل الرابع ده..طيب ما عندك السيراتو بـ 200 ألف وعفشة تورشن بيم والناس اللي ركبوها بيشكروا فيها.طيب انت متخيل التورشن بيم في الأوكتافيا زي السيراتو مثلاً ؟؟ متخيل إن التورشن بيم ده غير قابل للتطوير مثلاً ومعتمد علي مدرسة قديمة متقبلش التعديل للأفضل ؟ وبعدين سيادتك بتقول بص علي الجولف 7..العربيتين واحد في كل شئ.تكنولوجي وموتور وفتيس.ونازلة فاضية بمعني الكلمة.يعني ناقص منها أوبشن في البيزلاين موجود في الـ a7 وعلي كده نازلة بـ 228 ألف أول فئة.
لو حضرتك راجعت كل مشاركاتي عمري ما قللت من شأن عربية لأن عارف إن في ناس تمتلك العربيات دي وكلمة واحدة ممكن تخليه يندم إن دفع فيها دم قلبه..أنا مش هقولك ( وبالصدفة والله مش عشانك ) وأنا راجع من الساحل الشمالي من قيمة شهر كده.عملت إيه في C4 بالفانتازيا.ومكنش في دماغي ولا كنت ناوي غير بعد ما لقيته واخد الطريق عافية مع الناس كلها وكان داخل فيا.وأقسم بالله بعدها خليته يقول حقي برقبتي .. هل أنا جيت قولت الـ C4 عربية تعبانة ؟؟ إطلاقاً.
- رداً علي نقطة كل أحلامه إنه يركب العربية اللي جابها ومش شايف غيرها وميسمعش أي نقض ( زي ما تفضلت وسخرت مني عشان خاطر العربية الـ S )..فحضرتك فاهم غلط..مفيش حد فينا عنده عقدة نقص.من تواضع لله رفعه.والحقيقة فعلاً إن كل واحد صرف دم قلبه في اقتناء عربية معينة أكيد بيشيلها في عينه..وده لا يعيبه في شئ ويخلينا نتريق عليه..

نصيحة مني..دع الخلق للخالق..والغاوي ينقط بطاقيته..اللي هيشتري عربية خطفت قلبه.مش محتاج ينتظر حضرتك تطلع فيها القطط الفاطسة عشان يشوف هيشتريها ولا لا.

أرجو انك تتقبل كلامي بصدر رحب.
تحياتي