بالصور تغيير طبب مياه الموتور الامامية

**Ahmed Nasser** · 17-06-2013 02:36 PM

بسم الله الرحمن الرحيم
السلام عليكم ورحمة الله وبركاتة

اعضاء المنتدى الكرام حبيت انقل تجريبتى فى تغير طبب المياه الامامية اللى تحت الفرن والحمدلله عملتهم بنفسى

فى البدايه الحمدلله انها معملتهاش معايا وانا ماشى كنت هدمر الموتور الللى حيلتى
انا كنت بغير بوجهات وجيت ادوس كام دوسة كدة والاقى مية متنزل من تحت الفرن
وكل ما ادوس المية تزيد

المهم نبدا بسم الله
نفك كابل البطارية السالب
ونفك فيشة حساس الشكمان
ونفك الصاجة اللى على الفرن وهى مربوطة بثلاث مسامير 12

ودى صورة بعد ماطلعت

وبعدين هيظهر القرن بالشكل دة

قبل مانفك الفرن هنفك المشترك الاول من تحت
نرفع العربية ونحجرها ونجيب دواسة وننزل تحت
وهناخد معانا بيبة طويلة 14 او لقمة 14 ويد
وانا مامعيش لا ده ولا ده وفكيت بمفتاح واتزليت زل السنين

الاول هنفك المسمارين اللى مسكين فى البلوك من تحت

وبعدين نفك الثلاث مسامير اللى فى المشترك

وبعد كدة ننزل المشترك من الفرن ونسيبة تحت

فيه حاجة وانت بتفك من تحت خليك بعيد عن المسمار اللى بتفكه
عشان لو فيه رايش ماينزلش فى عنيك

وبعدين هنطلع فوق ونفك المراوح عشان نوسع لنفسنا

المروحة التانية بتكون نفس المسمارين
وزيادة كمان مسمار عند الطبة بتاع الريداتير

ونبتدى نفك الفرن ونطلعة من مكانة

هيظر معانا الشكل دة

الاربع طبب اللى موجودين فى البلوك
وبيكون فيهم طبة ورا قاعدة الباور ودى اغبى حاجة
لانك لازم تفك التكييف والقاعدة بتاعتة والباور والقاعدة بتاعتة
وانا عشان ماعنديش وقت غيرت طبة واحدة اللى هية كانت بتجيب ميه
ودى صورتها هية بتجي ميه

بعدين هنجيب مفك عادة صغير زى دة وشاكوش

ونبتدى ندق على الطبه من جنب واحد فقط ونخلى بالنا ان لو المفك دخل جوه الموتور وانت بدق هيكسر الشمايز
والشاكوش بردة خلى بالك لحسن يخرم الريداتير

وبعد الطبة هتطلع بالمنظر دة

ونشدها ببنسة

ودى مكانها فى البلوك هنصفرة كويس بصنفرة خشنة

ونحضر الطبة الجديدة وهية مقاسها 34 لو روحت لواحد متخخص دايو هيطلعهالك على طول
وثمنها 5 جنيهات

وبعدين نحضر معجون لحام ارنديد
وبيكون انبوبتين يضافه على بعض
وثمنة 10ج

وبعد كدة هنعمل شويه معجون ونحطهم على الطبة من وارا وعلى الاطراف اللى هتركب على البلوك

ويسلام لو فيه لقمة 24 قصيرة نبيت بيها الطبة يبقى تمام قوى
وانا طبعا ماعنديش فازلتنى لما بيتها بالشاكوش بس

وبعدين هنجيب بردوة شوية معجون ونطيفهم على الطبة من برة
والمرة بردة على كل الطبب

وكدة نيجى للتقفيل
بالنسبة للجوانات
لو جوان الفرن طلع حلتة وحشة غيرة وهو بـ 20ج
انا ركبت القديم لانة بحالتة

وجوان المشترك لو مش سليم هتغيرة بـ 10ج

وكدة مبروك عليك

نركب فيشة حساس الشكمان وكابل البطارية ونذود المايه
وبعدين ندور ونعمل ايدل ليرن

وناخد هوا من دورة الميه وننتظر لغاية ما المراوح تشتغل مرتين تلاتة

وفى النهاية احب اقول
لو ملكش فى الفك والتركيب احسلك بلاش
عشان ممكن المك زى ماقولت يدخل جوة الموتور وتكسر شمايز
ويبقى كدة الموتور اترمى فى الزبالة
او ممكن الشاككوش يخبط الريداتير يخرمة
من الاخر
اى حد هيعمل الموضوع دة
هيكون على مسؤليتة الشخصية وانا مش مسؤل

شكرا اعضاء المنتدى الكرام
لحسن استماعكم والسلام عليكم ورحمة الله وبركاتة

**Mostafa.Ismail** · 17-06-2013 03:02 PM

معلومات كلها جديدة بالنسبة لى ... الف شكر على الموضوع وعلى الصور.

**محمد الشامي** · 17-06-2013 03:05 PM

جزاك الله خيراً على المجهود والشرح الوافى , وطبعا الف مبروك على تركيب الطبب الجديده :)

**lanos2004** · 17-06-2013 03:06 PM

موضوع هايل
بس الجملكه افضل من المادتين الى على بعض دول

**مصطفى-حسن** · 17-06-2013 03:41 PM

موضوع جميل ومفيد
بس فية ملاحظة
الانبوبتين بيتفاعلو مع الحرارة وبيسيحوا
الكلام دة عن تجربة شخصية قديمة
الجملكة احسن بكتير
(وارجو تقبل ملاحظاتى بصدر رحب فالهدف هو تكملة المعلومة للاعضاء لا اكثر)
بس دة ميمنعش ان الموضوع مفيد وشرح مبسط جدا

**Ahmed Nasser** · 17-06-2013 11:43 PM

المشاركة الأصلية كتبت بواسطة Mostafa.Ismail

معلومات كلها جديدة بالنسبة لى ... الف شكر على الموضوع وعلى الصور.

الشكر لله ياباشا
اكيد طول مااحنا عايشين هنتعلم حجات جديدة

المشاركة الأصلية كتبت بواسطة محمد الشامي

جزاك الله خيراً على المجهود والشرح الوافى , وطبعا الف مبروك على تركيب الطبب الجديده :)

وجزاك ياباشا
والله يبارك فيك

المشاركة الأصلية كتبت بواسطة Ahmed-SAMIR

انا الميه عندى بتنقص ومش عارف منين انما اخدت بالى لو فتحت الكبوت والعربية راجعة من مشوار حامى اول ما ابطل العربية بسمع صوت نقط ميه بطيئة بتنقط على حاجة سخنة لكن مش عارف اشوفها منين وكنت متوقع من صوتها انها بتنقط على ماسورة الشكمان

اعمل كبس لدورة التبريد وانت هتعرف العيب منين

المشاركة الأصلية كتبت بواسطة elnakshabandy

بسم الله ماشاء الله
شغل صح وحاجه رائعه
بس ليه ماتجمعش ليك طقم عده كويس يسهل عليك

كل العدة اللى فى السوق مضروبة
كل ماتيجى تفك باى حاجة تكسر

**DEDOPETER** · 17-06-2013 11:48 PM

الله ينور

بس نفسى افهم لازمه الطبب دى ايه ؟؟؟

**Ahmed Nasser** · 17-06-2013 11:50 PM

المشاركة الأصلية كتبت بواسطة lanos2004

موضوع هايل
بس الجملكه افضل من المادتين الى على بعض دول

المشاركة الأصلية كتبت بواسطة zarif

موضوع جميل ومفيد
بس فية ملاحظة
الانبوبتين بيتفاعلو مع الحرارة وبيسيحوا
الكلام دة عن تجربة شخصية قديمة
الجملكة احسن بكتير
(وارجو تقبل ملاحظاتى بصدر رحب فالهدف هو تكملة المعلومة للاعضاء لا اكثر)
بس دة ميمنعش ان الموضوع مفيد وشرح مبسط جدا

نورتوا الموضوع يارجالة

الجملكة عشان اجيبها فى الوقت دة كان صعب
واساسا انا مكانش عندى وقت انى اغير باقى الطبب
والانبوبتين دول كنت مشحتهم من واحد صحبى

وانشاء الله لما ربنا يكرم ويكون فيه وقت هبقى اغير كل الطبب بالجملكا
لانى كدة بدات اقلق

**Ahmed Nasser** · 17-06-2013 11:54 PM

المشاركة الأصلية كتبت بواسطة dedopeter

الله ينور

بس نفسى افهم لازمه الطبب دى ايه ؟؟؟

لازمتها انك لما تعمل شغل فى الشمايز لازم تحتاج فتحات جانبية
ومكان الطبب اللى بتقوم بالمهمة

الموضوع: بالصور تغيير طبب مياه الموتور الامامية

LinkBack

أدوات الموضوع

عرض

-

-

-

المواضيع المتشابهه

فك طرمبة بنزين ميجان وطريقة تغيير الموتور بالصور

تقرير تغيير قواعد الموتور - ابيزا 99 - بالصور

تغيير التيل و الطنبورة الامامية تيدا

بخار مياه من الشبكة الامامية

.::حصرى :. طريقة تغيير زيت الموتور-إمبريزا 2008 -(بالصور)-لاأنصح بتجربتها-::..

الكلمات الدلالية لهذا الموضوع

المفضلات

المفضلات

ضوابط المشاركة