الموضوع: أخر صدمة ليا مع شركة الكهرباء

المشاركة الأصلية كتبت بواسطة أشرف العدوي

طيب انا بردو مش عارف اروح اتكلم في ايه
اصل هيقول ادفع الاول و بعد كدة اشتكي
فأنا عايز حل بعيد عن شركة الكهرباء

يعني فكرت امبارح اعمل محضر للكشاف في القسم
او اشتكي في حماية المستهلك

مش عارف ابتدي منين
و كدة كدة مش هينفع ادفع المبلغ ده لان دي سرقة علني
انا بستخدم الشقة تقريباً 8 ساعات في اليوم كله
و التكييف بيشتغل حوالي 5 او 6 ساعات

مش عارف اعمل ايه

انا خايف اتطر اخرج نص الشقة من العداد

مستحرم اعملها

حضرتك لازم تحدد المشكله الاول. هل المشكله في ان القرايه مرتفعه (وانت مغير العداد قريب) ولا ان القرايه قريبه من استهلاكك والفلوس هيه اللي مرتفعه؟

اللي هتعمله انك تجيب وصل الشهر اللي فات وتشوف قرايته
وتجيب وصل الشهر ده وتشوف "السابقه" فيه هيه نفس "الحاليه" بتاعه الشهر اللي قبله ولا لاء.
وبعدين تشوف "الحاليه" بتاعه الوصل الجديد وتقارنها بالعداد وتشوفها أقل ولا اكتر من العداد لو طلعت أقل من العداد يبقى كده الاستهلاك مظبوط والكلام يبقى على الفلوس لو طلعت أكتر يبقى كده المحصل كاتب قراءه جزافيه وتعمل شكوى في الشركه وتطلب معاينه ييجي واحد ياخد قرايه العداد الفعليه.

لو الفلوس صح والاستهلاك صح وهتدفع اعمل تشريح للفاتوره وقسطها على 3 دفعات بما ان استهلاكك هينزل الفتره الجايه عشان حراره الصيف راحت والشتا داخل وتشغيل المكيفات بقى قليل.

وأخيرا. تابع قرايه العداد مع المحصل شهر بشهر الموضوع مش بياخد دقيقه عشان متسمحلوش يحوشلك كيلوات في العداد وينزلهملك في فاتوره مره واحده لأن من مصلحته ومصلحه الشركه يعمل كده انما من مصلحتك انت انك تدفع استهلاكك أول بأول.

المشاركة الأصلية كتبت بواسطة أشرف العدوي

انا كل حاجة عندي مظبطوطة
يعني قارنت القراءات بتاعة الوصولات و قراية العداد
كله مظبوط
بس حجم الاستهلاك مش طبيعي خالص لا يصدق يعني

طيب هو ممكن اطلب مثلاً لجنة هندسية تفحص الشقة على حسابي طبعاً
اعرف يعني جاي منين الكلام ده
و لا الخدمة دي مش متوفرة

طيب حجم الاستهلاك ده يبقى مشكلتك وأنا فاكر انك كنت شاكك في العداد وبالرغم من ان حد جه شافه وقالك كويس الا انك غيرته. وبما انك كمان غيرته يعني لو كان فيه حد سارق منك كهربا كان هيبان وقت تغيير العداد.

اللي أنا برجحه دلوقتي ان الشهرين تلاته اللي فاتو كان المحصل بيحطلك قرايه أقل من استهلاكك الفعلي وجه حطلك الفرق ده الشهر ده خصوصا انك بتقول ان الكام شهر اللي فاتو كنت على مستوى ثابت 300 جنيه مع ان في شهر 7 و8 دايما الاستهلاك بيزيد عشان المكيفات ودي حاجه مش هتعرفها الا لو كنت الشهرين اللي فاتو بتقارن بين قرايه الايصال وقرايه العداد والفرق بينهم يكون في حدود المعقول.

فيه حاجه كمان. لما غيرت العداد دفعت كل الرصيد اللي كان في العداد القديم؟ والجديد عمل كام كيلو في كام شهر؟

العداد ممكن يكون بايظ و بيلف بسرعه ... روح الكهربا و هيجيب حد فنى يبص على العداد و يبلغك لو فى مشكله تغيره

المشاركة الأصلية كتبت بواسطة mohamed_selim

العداد ممكن يكون بايظ و بيلف بسرعه ... روح الكهربا و هيجيب حد فنى يبص على العداد و يبلغك لو فى مشكله تغيره

حصل عندنا مرة وعداد العمارة باظ ورحنا نبلغ تخيل قالوا ايه؟
قالوا طالما مش بيعد بالسالب يبقى سليم !