نتائج حادثة تويوتا ياريس

**tamagogo** · 08-09-2008 03:06 PM

بسم الله الرحمن الرحيم

عايز اقول لكوا على حادثه حصلتي في الياريس (2008). هكلم عن كذا حاجه
1- الحادثه
2- الاضرار
3- التصليح (تويوتا ابو رواش)
4- رضائي عن التصليح

1- الحادثه مش كبيره قوي خبطت في رصيف عالي على سرعه 30 تقريبا

2- الاضرار (كبيره جدا)
الركبه اللى تحت اللى شايله القنطره اللى شايله الراديتير دخلت لجوه جامد
- فالراديتير
- والسربنتينه بتاعت التكييف
- كمبروسيسور التاكييف
راحوا في الباي باي. وانا شايف ان الخبطه مش مستاهله كل ده

3- التصليح باختصار (كابوس) بس الحمد لله كانت تبع التامين
- اولا مافيش اي تقدير مبدئي للسعر والمهندس مارضيش يقولي اي حاجه ابدا الا بعد العربيه ما خلصت
- ثانيا اتاخروا جدا اخدت شهر تقريبا مع انها خلصت سمكره بعد اسبوع عشان الكمبروسور ماكانش موجود
- سعر الكمبروسير غير طبيعي 7000 جنيه ( عشان عرفت بعدها انهم جابوه من اليايان بالدي اتش ال) مع اني عرضت اني اجيبه من قرايبي من الخليج ب 3000 جنيه بس تويوتا رفضت انها تركبه وفضلت مستني شهر لغاية ما جيه وبسعر خرافي زي ماقلت

اخيرا بعد العربيه ما خلصت عرفت السعر (تخيلوا كام) رقم مهول 20 الف جنيه يعني حوالي 20% من تمن العربيه في خبطه هايفه لو كانت في بيجو ولا فيات قديمه ما كانش حصلها حاجه اصلا

4- رضائي عن التصليح
مش عايز اكون متجني عليهم بس انا ما انبسطش من الخدمه
- وانا بستلم العربيه اكتشفت التالي
الاكصدام مفكوك (مساميره ناقصه)
الكبوت مش مظبوط في مكانه
قربة مياه المساحات مفكوكه
الراديتير مش مربوط وبيتلخلخ
واخيرا الاكصدام الامامي مخبوط
طبعا انا قلتلهم على كل المفكوك وكل شويه العربيه تدخل يربطوه ويطلعوها تاني

اخيرا انا مستغرب ازاي توكيل تويوتا بجلالة قدره وبعد ما اخد مني 20000 يطلع لي عربيه فيها غلطات وما خفي كان اعظم

من ساعة ما استلمتها وانا حاسس ان الموتور بيتهز جامد قوي مش عارف ده كهربا ولا تأثير الحادثه عايز اروح تاني بس هروح بتاع العباسية المره ديه. وربنا يستر

توكيل ابو رواش فيه تجهيزات جامده بس للاسف الصنايعيه ماعندهمش خبره ومافيش كواليتي كنترول كويسه

**Ramy_Ali** · 08-09-2008 03:14 PM

قدر الله وماشاء فعل
احمد ربنا انها جت لحد كدا

**Dr Ahmed** · 08-09-2008 03:14 PM

قدر الله وماشاء فعل وإن شاء الله تاخد بالك ومافيش خبطات تانى

ودايثبت وجهة نظرى إللى كنت قلتها عن ضعف السيارة الشديد من جهة الأمام واللى كتير قالوا لى دا علشان معدلات الأمان ومش عارف إيه واللى قلت فيه بالحرف إن الرادياتير والتكييف عرضه للدمار من أى خبطة متوسطة

**Sharky** · 08-09-2008 05:04 PM

يا دكتور احمد معدلات الامان بره بتكون للراكب مش للعربية
على فكرة الخبطة دى لو كانت فى عربية مكنش خصل فيها الأضرار دى لإن العربية فى نفس المستوى لكن الرصيف بيبقى أوطى من العربية قبيبقى عرضة لإحداث أضرار أكتر

أنا عندى فى الياريس خبطت فى عربية قدامى و على نفس السرعة تقريبا و الأضرار:
1- إكصدام و شبكة فقط .

**hazem_khidr** · 08-09-2008 07:45 PM

قدر الله و ما شاء فعل.
بالنسبه للتصليح لو كانت اتصلحت بره كانت التكاليف اقل من كده بكتير.
لكن هما عارفين العربيه متأمن عليها يعني شركه التامين حتدفع
فيغيرا اي شيئ و ما اعرفش خبطه ايه دي الل بتأثر في كمبروسر التكييف
هيا الخبطه جايه في الموتور؟؟؟؟
الكمبروسر زيه زي الدينامو بالضبط متثبت في الموتور

**أبو عبدالله** · 09-09-2008 04:55 AM

بص يا أخي الكريم

انا لي قريب حصله نفس الحادثة وعلى نفس تقريبا السرعه مش كبيرة يعني
وكانت النتيجة زي اللي انت قولته بالظبط ومعاهم الأير باجز كمان للسائق لأن مفيش للراكب اللي بجوار السائق
ولكن هيا رينو كليو وليست ياريس
وكانت التكلفة من التوكيل 27 الف جنيه

يعني لموضوع مش غريب ولا حاجه

اما بقه التظبيط بتاع التوكيل وشغله فهو طبعا تقريبا مظبطهاش كويس وانت كنت انا بؤكدلك ان من الصعب ان العربيه ترجع تاني لن الخبطه دي بتسمع في شاسية العربيه وكل حاجه بترحل من مكانه وعلشان يركب الحاجه مش بتبقى مظبوطه في مكانها ميه في الميه
وعلشان كده هتحس ان في حاجات بتشخلل والكلام ده
ولكن هو من الصعب بل يمكن من المستحيل ان المصنع نفسه يظبطها لأن الحاجات اللي زي دي اللي باظ عمره ما يجع زي ما كان
محدش هيقسلك المقاسات بالسنتي والملي علشان كل حاجه ترجع مكانها

وعلى فكره عربية قريبي دي برضه نفس الحاله
في حاجات كتير بتشخلل وأولهم السربنتيه والمروحه بتاعت الرادياتير
ده غير ان الخبطه كانت مسمعه في الدركسيون كمان من الداخل
والقنطرة اللي شايله الماتور وشايله كل حاجه في العربيه في الكبوت كمان اتخبطت واتغيرت

وربنا ييسرلك امرك ويعوض عليك

**tamohsen** · 09-09-2008 12:03 PM

الكمبروسيرب 7000 جنيه لييييييييه
ده تهريج غير طبيعي
المفروض قطع الغيار دي كلها تعمل 7000 جنيه

من تجربتي وتجارب الاعضاء مع تويوتا ايجيبت
واضح ان المركز الرئيسي بالعباسيه بس هوه اللي تلجأ له في التصليح والحوادث
انما باقي المراكز غالبا عندهم شويه مشاكل تشيك كنترول

**Sharky** · 09-09-2008 12:08 PM

المشاركة الأصلية كتبت بواسطة tamohsen

الكمبروسيرب 7000 جنيه لييييييييه
ده تهريج غير طبيعي
المفروض قطع الغيار دي كلها تعمل 7000 جنيه

ما هو دا إللى أنا دايما بقوله
قطع غيار اليابانى الأصلى نااااااااار و أغلى من الأوربى

**أبو عبدالله** · 09-09-2008 12:43 PM

المشاركة الأصلية كتبت بواسطة sharky

ما هو دا إللى أنا دايما بقوله
قطع غيار اليابانى الأصلى نااااااااار و أغلى من الأوربى

يا عم الحاج عمرها ما بتتحسب كده
انت عاوز تجيب الكمبروسر الياباني زي الأوروبي
ما كلنا عارفين اداء التكييف عامل ازاي والفرق بين اداء الياباني والأوروبي
ولا يخفى على احد ذلك

ومع ذلك برضه اين كان سعره فأنا قولت من قبل المهم ده هيعيش اد ايه وده هيعيش اد ايه
يعني من الأخر المسألة مسألة بكام وهيقعد اد ايه

يعني مثلا مش هنجيب زيت بــ 50 جنيه ونقول ارخص من الزيت ابو 10 الفا كيول اللي بــ 240 جنيه مثلا
ما هو ده مش بيعيش اد ده
مش كده ولا ايه

**Sharky** · 09-09-2008 12:53 PM

المشاركة الأصلية كتبت بواسطة أبو عبدالله

يا عم الحاج عمرها ما بتتحسب كده
انت عاوز تجيب الكمبروسر الياباني زي الأوروبي
ما كلنا عارفين اداء التكييف عامل ازاي والفرق بين اداء الياباني والأوروبي
ولا يخفى على احد ذلك

ومع ذلك برضه اين كان سعره فأنا قولت من قبل المهم ده هيعيش اد ايه وده هيعيش اد ايه
يعني من الأخر المسألة مسألة بكام وهيقعد اد ايه

يعني مثلا مش هنجيب زيت بــ 50 جنيه ونقول ارخص من الزيت ابو 10 الفا كيول اللي بــ 240 جنيه مثلا
ما هو ده مش بيعيش اد ده
مش كده ولا ايه

ياريت يا أبو عبدالله بلاش حكاية قطع غيار معمرة دى لإن معظم ملاك الأوربى بيقولوا برضه قطع غيارهم معمره لإن القصة واحدة فى الإتنين
أنا يابانى بأوربى مش بصينى علشان نقول معمر و لا لأ

ثم هو الكمبروسر بس إللى غالى دا حتى تيل الفرامل غالى و بيقعد نفس فترة الأوربى و دا من كلام التوكيل

طب بلاش دى تقدر تقولى ليه طاسة الياريس الواحدة بـ 250 جم و الميجان بـ 100 جم حتقولى طاسة الياريس معمرة عن الميجان