الموضوع: تعريق زيت علي احد البوجيهات ومش عارف السبب

السلام عليكم
طبعا الاخوة فوق قالو كل المفيد و لكن قبل اي شيء اتمني حضرتك تصورلي البوجيه اللي معرق زيت ده صورة واضحة و ياريت لو تصور الباقيين عشان نعرف مصدر الزيت منين

و تعقيبي علي موضوع مصادر الزيت علي البوجيهات كالتالي :-

1- طالما محصلش معاك تثليث ولا تقطيع و العربية كانت ماشية تمام ده دليل علي ان مصدر الزيت مش من داخل المحرك يعني توصيف و تحليل الميكانيكي للمشكلة غلط يعني احتمال كبير يكون معندكش مشكلة اساسا في المحرك من الداخل و مش محتاج حاجه (محتمل)

في الحالة دي مصدر الزيت بيكون فعلا من داخل المحرك و وقتها الزيت لازم ينقص بنسبة معينه و يظهر عادم ابيض نتيجة احتراق الزيت و المحرك هيكون مش مضبوط ولا ادائه مرضي ولا هيجيب 150 كيلومتر ساعه ابدا بالشكل ده

2- اي نسبة زيوت بتدخل من المانيفول مع الهواء بتتحرق تماما ولا يتبقي منها اي شيء ولا تظهر علي البوجيهات اساسا و ليس لها محل للبحث هنا اساسا يبقي نشيل موضوع المانيفول و الفايز و خلافه من الحسابات إلا لو هتشوف منه نسبة بخر الشوائب و الزيت اللي بيخرج منه عشان تعرف حالة الماكينة (رغم اني مش مقتنع بالكشف ده بس ما علينا )

3- المصدر الثالث هو من الخارج و ده بيكون من تساقط زيوت علي جسم البوجيه من الخارج او علي سلك البوجيه او بقي كتير و نزل علي السن و ده بتلاقي سن البوجيه و جزء من مقدمته اسود و مزيت و لكن طرف السن اللي بيقوم بعملية الاشعال ابيض و نضيف و ده الاحتمال الاكبر اللي متوقعه و ده بيكون بسبب ان شوية زيت يقعوا علي المحرك وقت التغيير او تسريب من غطاء التاكيهات او خرطوم الفايظ او اي مصدر خارجي للزيت و ملهوش علاقة بداخل المحرك ابدا

علي العموم صورة سن البوجيه اللي عليه النقاش هي اللي هتحدد المشكلة منين بالضبط
منتظرك ترفع الصورة

و بالتوفيق للجميع