الفضل لكم فى قرارى

**osamahalem** · 08-09-2008 10:10 PM

أعزائى اعضاء رابطة محبى السيارة الصينية الاسبرانزا بداية انا كنت من المعجبين بروعة التصميم الخارجى للاسبرانزا وخصوصا ال 113 وكنت افكر فى شراء تلك السيارة لانى امتلك سيارة من سيارات السبعينات بيجو 504 تكييف وسنتر وزجاج كهربائى وكنت اقارنها شكليا بالاسبرانزا وبالطبع تفوز الاسبرانزا على مستوى الشكل العصرى والتقنية العالية وجمال التصميم ولكن بعد الدخول لهذا الموقع كمشاهد وقارئ فقط ومتابع لتعليقات السادة الاعضاء وأرائهم المحترمة فى متانة واداء وتحمل السيارة بصراحة وبكل موضوعية وصدقعرفت القيمة الحقيقية للسيارة التى امتلكها ووجدتنى اردد عبارة اراها مناسبة وملائمة لما يجول بداخلى ولما استقر علية قرارى وهى عبارة او مثل شعبى دارج تقول ( عالأصل دور ) يعنى العربية لازم تكون بنت ناس ومن بيت معروف ولها اهل يترد عليهم زى العروسة تمام انما من اللى شفتة فى الكام يوم اللى دخلت فيهم هنا العروسة زى القمر بس لا اصل ولا بيت ولا ماضى واخشى ان اقول ولا مستقبل وانا لا اهاجم السيارة ولا الوم من اقتناها فالناس فيما يعشقون مذاهب ولكنة انطباعى الشخصى ورأيى المتواضع ولو كانت السارة ومن اطلقها تنازل عن بعض الكماليات الزائدة التى لا ارى لها داعى وركز بشكل افضل فى القوة والمتانة لكان اكتسح السوق المصرى بلا منازع ولكان وضع السيارة كخيار وحيد امام الكثيرين ممن يودون اقتناء سيارة متينة وعملية وبسعر مناسب ومصدر عجبى اننى ارى الصينيين وعلى مدار السنوات السابقة يجيدون دراسة السوق المصرى بشكل مميز ويقدمون سلع لا تقاوم على مستوى السعر وجمال التصميم والابتكار والعصرية لكنهم وبكل اسف خانهم التوفيق هذة المرة فالمواطن المصرى يمكن ان يضحى بثلانون جنية ويشترى لابنه فانوس رمضان وهو يعلم انة سيتعطل حتى قبل الوصول اللى المنزل ولكن نفس المواطن لا يمكنة ان يضحى بخمسون الف جنية ويشترى سيارة يفكر فى بيعها قبل سنة من شرائها ولهذا فقد قررت ان احتفظ بسيارتى السبعينية الموديل حتى يراجع الصينيين حساباتهم ويتعلمو من خطئهم ويطلقون السيارة التى لا تترك امامى بشكل شخصى وامام الالاف من المصريين خيارا فى اقتنائها ويومها سينطلق المارد الاحمر فى الشوارع المصرية ولا يترك مجالا للاخرين فى منافستة وما كتبت ما كتبت الا لثقتى من قدرة الصينيين على فعلها وان غدا لناظره قريب
اخوكم / اسامة حليم / المنصورة

**ahmedviking** · 08-09-2008 11:09 PM

كلام كلام كلام كلام
كل االلي بيتكلم عالعربيه دي بالذات بيقول سمعت مافيش ابدا جربت او شفت

علي فكره انا محتار في نفس العربيه يعني أولي الناس اني اتأثر بكللامك
بس بصراحه وموضوعيه مبسمعش لاي حد يقول سمعت
ومش لاقي سبب لموضوعك
ارجو انك متخدش رأي هجةم عليك بس وجهة نظر وكامل احترامي ليك
رمضان كريم

**osamahalem** · 09-09-2008 07:05 PM

الاستاذ العزيز احمد اولا انا مش زعلان ابدا من كلام حضرتك انت بتقول ان مفيش داعى لموضوعى وانا معملتش موضوع عن السيارة انا كتبت رايى الشخصى ولم اهاجمها اطلاقا اما حكايةانى مجربتش وكلامى بناء عن سمع فقط فبصراحة الموضوع دة بيتكرر كتير بشكل مضايقنى جدا وكأنى لازم اجرب جميع السيارات اللى فى مصر وكأن سمعة السيارة مش مهمة ولا حاسمة فى الاختيار كل عربية ليها سمعة او اسم تجارى لا ينفصل عنها ويحدد موقعها ومكانتها بشكل كبير والسمعه يا اخى العزيز هى نتيجة تجارب وخبرات الاخرين واظنك لا تختلف معى ان الصينى بالتاكيد سمعته وحشة والكلام علية مش ولا بد يبقى واحد من اتنين اما تغامر واما تبعد وانا اخترت ابعد وكتبت الموضوع ربما يكون نقطة ضوء لواحد كان متردد زيى اما اللى حسم امرة وقرر يغامر فادعو الله ان يبارك له فى ما رزقة واحترم فية روح المغامرة التى يفتقدها الكثيرين
اسامة حليم / المنصورة

**ahmedviking** · 09-09-2008 10:58 PM

كل التقدير والأحترام ليك يا استاذ اسامه
انا كل فكرتي ان مش عاوزين نظلم العربيه لانها جديده ولازم اللي يحكم عليها يكون عالأقل حضر تجربه ليها
لان الحكم عليها بالسمعه في ظلم كبير
عالعموم برضو كلامك صح وكله من سمعة الصيني
بس خليك فاكر انه يفوز باللذات كل مغامر
ومين عارف يمكن تبقي زي الدايو وتثبت نفسها

**ahmed_bq** · 10-09-2008 01:07 AM

كلام حضرتك صحيح جدا بس فيه ليا تعقيب بسيط

اولا انا مش معايا العربية دي عشان اتحيز ليها بس انا عندي مبدأ مقتنع بيه غير موضوع المغامرة

انا رايي ان اي توكيل كبير ممكن ينجح اي عربية و ابو الفتوح عشان تبقى عارف هوا اللي عمل الدايو السمعه الجامده دي مش عشان هيا جامده جدا
الدايو فشلت فشل ذريع في جميع دول الخليج ....طب ليه عشان الخليج بيركبو عربيات فظيعة وباسعار رخيصة

ابو الفتوح دلوقتي انتهى تصنيعه لدايو ... مفيش قدامه تحدي غير اسبيرانزا ... اكيد مش هيقفل ويبيع حمص الشام على الكورنيش

فيه عربيات كتير واشكال والوان وصيني بس فشلت ومنتشرتش طب ايشمعنى بالرغم ان فيه عربيات صيني بمواتير متسوبيشي وشكل احسن من اسبيرانزا وكماليات ..بس دا ابو الفتوح اللي كان بتاع بي ام دبليو وكان بتاع انجح عربية نزلت مصر الدايو

النقطة التانية انتا عاشرت الفترة اللي كان الكوري نازل لسه جديد فيها ؟
نفس الافلام كانت بتتقال ...دي مش هتقعد سنه وتبوظ ...دي عربيات ورق ...دي منظر وخلاص

ليه الاكسنت منتشرتش الانتشار الرهيب بتاع لانوس بالرغم ان الاتنين كوري والاتنين نزلو معا بعض في نفس الفترة

ليه بتشوف اغلب الاكسنت مخلعة من بعضها واللانوس ماسكه نفسها زي الوحش في الطرق

حاجه كمان مفيش حاجه دلوقتي مش بتتصنع في الصين زكله على حسب الحاجه ... الصينين دول مش مصريين زينا فهلوية ..دي دوله عظمى مش انتا ولا انا اللي هنقول انها تعبانه
واديك شوفت اولمبياد بكين كان عامل ازاي

الصين بتصنع قنابل نووية مش بمب يعني ولا فوانيس بس ... واظن انها مش بتبقى قنابل بايظه ولا بتفرقع لواحدها

نرجع لموضوعنا وهقولها تاني وقولتها في كذا موضوع هنا
الناس الافاضل بيقارنو العربية دي بعربيات اغلى منها طب ليه متقارنها باللي زيها وشوف انتا
يعني قارنها بالفرنا خش على فرنا وشوف الكلام والفيرنا دي هيونداي على عيني وعلى راسي وشركة بقالها سنين كتير في السوق وكوري وفيها مشاكل للركب دا حتى عيب دي مش شركة مبتدأة

اللانوس طبعا تتفوق عليها من حيث السمعة الحسنة على مدار سنين كتير ...لكن حرام اشتريها زيرو ...انا لو هشتريها هشتريها مستعمل ... عشان هيا هيا من 10 سنين مش هحس بلذة الزيرو

الافيو بقى رغم انها اغلى سعرا ..لكن هيا احسن حاجه للمصريين اللي بيجرو ورا الاسم ويدفعو فلوس في ماركة بتتحط قدام وورا على شنطة العربية ...لا خلاف ان الافيو حلوه بس سعرها مبالغ فيه ودي وجهة نظري ...دا افيو الامريكية اللي مليانه كماليات مش منفله في الشبابيك اللي ورا ومفيهاش ريموت زي بتاعتنا ب 14 الف دولار يعني حوالي 72 الف مصري

متجيش تقولي بقى الهوندا والنيسان ولا الماتركس ولا اللانسر ...كده هتبقى المقارنه غير عادلة ....نفسي الناس تفكر كده ....انا فيه واحد كان بيقاوح معا واحد واللي بيقاوح ده معاه اوبتر اللي ب 97 الف ولا واحد تاني معاه لانسر ام 95 الف هيا كمان او يمكن اكتر ..ناقص واحد معاه كرولا الجديده يجي يقول عربيتي احسن من الاسبيرانز رغم ان الكرولا تجيب اتني من 1600 وتجيب 3 عربيات من الاسبيرانز الصغيره

دا رايي المتواضع واسف على الاطالة

**ahmedviking** · 10-09-2008 02:44 AM

الله عليك يا استاذ احمد
كتبت اللي عاوز اقوله وكنت مكسل اكتبه
فعلا متفق معاك تماما

**osamahalem** · 10-09-2008 02:54 PM

الاخ العزيز الاستا ذ احمد انا مش هناقشك اطلاقا ولا حتى هعقب على تحليلك الوافى المنطقى الرائع للسوق المصرى والاختيارات المتاحة لان بمنتهى الصراحة تحليلت مش بس عجبنى لاء دا حتى ابهرنى واحييك على ما لديك من معلومات متكاملة ولكن اسمحلى انت مفهمتش قصدىباختصار وبدون اطاله احنا كمصريين عندنا فرصة العمر وبنضيعها من ادينا بين ادينا كنز ومش قادرين ولا حتى بنحاول نستغلة ونوجهه فى صالحنا وهقولك ازاى عندنا دولة عظمى على حد تعبيرك وانا متفق معاك تماما الدولة دى بتخطو خطواتها الاولى فى عالم تصنيع السيارات يعنى لسة المفروض مفرضتش شخصيتها المستقلة وبتحاول تستطلع اذواق الاسواق المستهدفة ومنها السوق المصرى وبتسال هو المواطن المصرى عاوز اية من العربية والواضح ان الانطباع الصينى عن المواطن المصرى انة عاوز شوية كماليات واوبشنز على اعلى مستوى تقنى وباقل سعر ممكن ومش مشكلة اوى المتانة والتحمل وكل الحجات التانية ودفاعنا المستميت عن السيارات المصنعه طبقا لوجه النظر بهذا الشكل خطأ سندفع جميعا ثمنة واقول جميعا سواء من يشترى الصينى او اى ماركة اخرى لانة فى حالة نجاح هذا المنطق سيقلدة جميع الصانعين لوطننا العزيز بشكل او بأخر والكنز الذى اتكلم عنة اننا يمكن بشكل عملى تغيير وجهه النظر الصينية فينا وتوجية الصانع الصينى لحقيقة السوق المصرى والتاكيد على فكرة ان المستهلك المصرى فى سوق السيارات تحديدا لا يرضى عن المتانة والصلابة وقوة التحمل بديلا ويمكن ان يتغاضى عن بعض الكماليات الزائدة فى سبيل امتلاك سيارة تلائم سوء حاله الطرق المصرية فهمت قصدى الصانعين لن يغيرو من تصميم ساراتهم بناء على كلام او شكاوى او طلبات والحاح على زيادة الاتقان هذة لغة لا يفهمونها اللغة الوحيدة الناجحة اسمها حجم المبيعات يعنى طالما البضاعة بتتباع هيتعب قلبة لية انما لو حجم المبيعات يقل هيبتدى يراج حساباتة ويحاول يفهم السبب وساعتها يبقى احنا قدرنا نروض التنين الصينى ونخلية يرقص على المزمار البلدى ويون لينا شخصيتنا المستقلة كسوق كما يحاول هو ان يفرض شخصيته كصانع وأرجو ان اكون قد شرحت بشكل واضح وجه نظرى وتقبل منى عظيم الاحترام لشخصك الكريم
اخوك / اسامه حليم / المنصورة

**ahmed_bq** · 10-09-2008 03:15 PM

كلامك مظبوط ان الصينين بيدو اوبشن كتير في عربياتهم بس دا مش دليل على سوء العربية او من عدمة ... ما الكماليات دي موجوده في الكوري بردو وتلاقيها بنفس السعر

المشكلة كما ذكرت في المصريين والسوق المصري ... زي مقال احد الاشخاص في موضوع هنا ... بص للهاند فري بتاع نوكيا الاصلي وبص للمضروب ابو 5 جنيه وشوف الفرق بينهم هتلاقي فرق كبير ... رغم ان ده صيني وده صيني

الفلاش ميموري اللي هيا انضف نوع الكينج ستون مهي صيني
كل اللابتوب اللي بتنزل الخليج (عشان سوق نظيف) كلها صيني بس صيني نظيف بقى

الكلام اللي قولتو ده في حجات تقدر تسميها مجازا سلع استهلاكية مش سلع معمرة زي العربية

اكيد شركة زي شيري وهيا مش شركة صغيرة ويقالها 10 سنوات تقريبا تعمل عربية وهيا لسه مبتدأة تبوظ بدايتها
حاجه كمان بمناسبة ان حضرتك قلت ان الكماليات على حساب الجوده بتدخل على المصريين ... بالعكس تماما ... دا المصريين اساتذه في تفلية الحاجه وتطليع القطط الفطسانه والصاحية كمان.
ولعلمك موضوع العيوب ده بقى في كل العربيات انا معايا المدير المالي في الشركة لسه شاري اوكتافيا ب 160 الف وكان فيها عيوب رغم انها متربية وبنت ناس وليه اصل وفصل هههههههههه

واحد تاني معاه اسبيرانزا موديل 2007 كان جايبها ب 64 الف يعني فرق 100 الف تقريبا ومحصلش فيها الهوا وبيحلف بكده

طبعا ده مش مقياس ان اسبيرانزا احسن من اوكتافيا اطلاقا اوكتافيا طبعا احلى 100 الف مرة ... بس ممكن يكون تمنها العالي عيب عند ناس كتير بالرغم انه اصلا مش عيب .... بس كله فيه عيوب بتختلف نسبها من عربية لعربية ...كله في الاخر بتاع ربنا

انا رايي اللي عايز يشتري عربية يستخير ربنا وربنا هيوجهة ... ممكن تكون العربية الفلانية دي خير ليا وفي نفس الوقت نفس العربية شر لحد تاني

وحضرتك المناقشة معاك فعلا جميلة وموضوعية ...شكرا لك

**ahmed_bq** · 10-09-2008 03:21 PM

اه نسيت نقطة

بالنسبة للمتانة انا بتكلم عن اسبيرانزا بس مش اي صيني
اللي اعرفو واللي شوفتو ان صاجها سميك وجامد ووزنها تقيل مش خفيفه مثلا زي الكوري
والموتور بتاعها اللي هوا صيني بتصميم نمساوي ...عمر مسمعت حد اشتكى منه

ادخل بقى انتا على شيفروليه وهيونداي وشوف العربيات اللي جابت وش سليندر بعد 200 كيلو ولا 1000 وشوف الياريس اللي دخلت في رصيف خبطة بسيطة اتخرشمت

عارف ايه اللي الناس بتتكلم هنه ..للاسف كلها في الكماليات اللي انتا قولت انها هايفة هههههههه

**osamahalem** · 10-09-2008 03:58 PM

عجبانى اوى جمله حضرتك ( كلة بتاع ربنا ونصلى استخارة الاول ) وعلى فكرة انا شخص متدين وصايم بس جاتلى كريزة ضحك لسة مش سيبانى وتخيلت انى ليلة ما اكون رايح احجز عربية اطلع من السيد للحسين للسيدة نفيسة واكشف راسى وادعى واملس على المقام ويا خفى الالطاف نجنا مما نخاف وادخل التوكيل برجلى اليمين واقرا عليهم عدية ياسين بالمقلوب واعمل لمدير التسويق حجاب رضا وقبول ويوم ماستلم العربية اعمل ليلة لاهل الله واطقطق شبة وفاسوخة واقول للعربية فى شكمانها اسمعى كلام بابا ومتسمعيش كلام غبور وابو الفتوح واعلق عليها خرزة زرقا وحدوة حصان وكف النبى اية رأيك فى السيناريو دة مش ينفع حلقة من مسلسل راجل وست عربيات

اخوك / اسامة حليم / المنصورة
-------------------
تنبيه للعضو
صلاة الإستخارة ليس لها علاقة بهذا التنكيت ولا يجوز السخرية منها ولا من العضو الذى يوصى بها
صلاة الإستخارة سنة نبوية ومن المؤسف التعرض لها بطريقتك هذه ودمجها بالخرافات والشعوذة
فضلا عن الكتابة باللون الأحمر المخصص فقط للمداخلات الإدارية
ونعلن للأخوة الذين ما يزالون يكتبون باللون الأحمر رغم مئات التنبيهات أن لون كتابتهم سيتم تغييره لأى لون آخر
الإدارة