الموضوع: مشكلة صرة العجل الخلفية مع الـ abs

روح ع التوكيل و اكشف علشان تعرف العيب الصح و سيبك من فتى الميكانيكيه

ال abs مش حاجه تتهاون فيها

والله انا مش بعمل الحجات دي الا في التوكيل طبعا ... بس الكاش مش مساعد
الحادثه صرفت كتيييير ووسطي لسه مقطوم

فقولت اعملها كلشن كان ممكن تطلع حاجه هايفه في الحنين ... على مافوق من اللي انا فيه وابقى اروح التوكيل اتخيط اوتسرفل هناك براحتي على نضافه :)

عن تجربة ليا فى حادثة من امبارح بس فعلا abs مفيش تنازل عنه
اريح حاجه ودى العربيى التوكيل او هات السره اصلى من التوكيل و ركبها عن حد محترم و بيفهم و فى المتخصون فى القاهرة فى ناس كتير فى المنتدى بتشكر فيهم

يباشا التوكيل مفيش منه مفر اكيد طبعا ... حراقين بس من الاخر في المضمون ... الحجات دي غلط اني اخلي حد يلعب فيها من غير ميكون فاهم.

بس انا الحادثه بتاعتي اتخيط فيها فلوس كتير وان جيت للجد كمان معنديش وقت ولا مجهود اني اروح التوكيل حاليا ...

الي فهمتو ان الترس اللي في السره لازم يتظبط مع حساس ال abs ... يعني الموضوع كله ظبط مش عيب في جزء ولا حاجه ,,, منا جبت السره استيراد بردو ...

لكن لو قصدك فوائد ال abs هوا حلو جدا ما شاء الله وعن تجربه ... بتعرف تلم العربيه من غير متشنكح منك في الازمات لا قدر الله

وربنا يبعد عننا الحوادث ويستر طريقنا كلنا يا رب

المشاركة الأصلية كتبت بواسطة ahmed_bq

يباشا التوكيل مفيش منه مفر اكيد طبعا ... حراقين بس من الاخر في المضمون ... الحجات دي غلط اني اخلي حد يلعب فيها من غير ميكون فاهم.

بس انا الحادثه بتاعتي اتخيط فيها فلوس كتير وان جيت للجد كمان معنديش وقت ولا مجهود اني اروح التوكيل حاليا ...

الي فهمتو ان الترس اللي في السره لازم يتظبط مع حساس ال abs ... يعني الموضوع كله ظبط مش عيب في جزء ولا حاجه ,,, منا جبت السره استيراد بردو ...

لكن لو قصدك فوائد ال abs هوا حلو جدا ما شاء الله وعن تجربه ... بتعرف تلم العربيه من غير متشنكح منك في الازمات لا قدر الله

وربنا يبعد عننا الحوادث ويستر طريقنا كلنا يا رب

طب ماتروح ورشة المتخصصون الناس شغالة فى التوكيل وبيفهموا فى العربية كويس
يمكن يظبطوهالك فى الحنين

الحمدلله الموضوع اتصلح واتلمت الحمدلله بخمشتاشر جنيه بس .

ميكانيكي بطيييييئ اوي يعني اوووووف وتنك ومحسسني انه دكتور ... وقفت ساعه كامله مستني جنابه لحد ما الدنيا بدأت تضلم ... ياسطى هتعرف تشتغل فيها في الضلمه ... يهزلي دماغو بمعني اه وميردش حتى عليا... وانا في سري بقول يادي اوم الثقه اللي انتا فيها ... ماشي اتقل دنتا هتتنفخ لو مصلحتهاش.

المهم بعد مفك العجل وقعد يقطم فيا شويه وجبتها استيراد ليه مجبتهاش جديده ومجبتهاش بالترس بتاع ال abs ليه ... قولتلو اللي حصل يا سيدي ... هتصلحها ولا اولع في امها.

هات يبني الشكاوش .. وبحته حديده كده ... راح خابط خبطتين ويلف السره ويخبط خبطتين ويلف السره.

قال تمام كده .. اللمبه طفت يا باشمهندس ... هاهاهاها ضحكه شريره ... لا مطفتش يا دكتور ... دانتا هتتنفخ.

راح قايل للصبي بتاع قفل يبني يلا العجل للبشمهندس خلاص كده ... قولتلو ام اللمبه مطفتش ..قاللي عادي اول مالعربيه تتحرك هتطفي يا اما تروح ترجعها وتجيب جديد ... قولت يا ابن التيت ... طيب
مشيت شويه ... هوب راحت فاصله ... جربت الفرامل هرس في هرس .. الحمدلله ال abs شغال.

احسن معلومه قالها حسسني فعلا انه فاهم .. انه قال كده التروس قدام الحساس بالظبط ولازم العربيه تمشي عشان حساس السرعه اللي تبع الليله بردو ... كده اطمنت انه فاهم.

وخد الخمشتاشر جنيه والحمدلله اتصلحت !