الموضوع: عمر اطول و اداء افضل للمحركات

في صيانه كدا حابب اني احكيلكوا عليها .. الصيانه دي مهمه جدا بتدي عمر اطول للماكينات ده غير انك بتحس بنعومه دوران المحرك لفترة

نبدأ بسم الله

لما بتروح سعادتك تغير زيت بتقعد تدور على نوع زيت و مواصفاته و اذا كان تخليقي او معدني و .... و ..... الخ
و تتجاهل حاجه تانية مهمه (تغير فلتر الزيت الاصلي) و ليه بأكد على فلتر الزيت الاصلي ؟؟؟
بعض الشركات المنتجه للفلاتر و لسرعة كسب الربح ما بتعملش quality test على منتجاتها فيجيلك الفلتر فيه عيوب من الداخل و بتتلخص في انها بتهرب بعض ال fragments الناتجه عن الاحتكاك و دي المفروض انها تتحبس بالكامل داخل الفلتر تماما

طيب تعالى نعرف وظيفه oil pump بتعمل ايه ؟؟
دي بتاخد الزيت من oil sump و ترفعه لفوق تصبه على camshafts و في نفس الوقت في جزء اخر في oil pump اسمه oil spray و ده وظيفته بخاخ للزيت بس في الجزء السفلي اللي هو crankshaft بس فيه مكاين مافيهاش موضوع oil spray ده و بيكون جسم الموتور من الداخل متوظف انه يعمل عمل الجزء ده ....

طيب يا عم صلاح انت عاوز تقول ايه صدعتنا ما احنا عارفين وظيفة طلمبة الزيت ..ادينا الخلاصة ...!

المفروض ان الزيت قبل ما بيروح oil pump بيدخلفي حاجه اسمها suction pipe و الانبوب ده كما هو واضح من اسمه انه بيشفط الزيت من الكارتير و يروح مدخله على المضخه تروح المضخه مدخلاه على الفلتر ... هنا بقا نشوف المصيبه
تخيل بقا سعادتك معايا فلتر مش حلو او مش الموصى به .. شوية رايش او راست يعدو من الفلتر يعني ما يتفلتروش (الفتر من جوة مش محكم دخولا و خروجا لعملية الفلترة اول حاجه هيعدي عليها الزيت عاوزه تتلين هي (camshaft) مع استمراريه استخدام فلاتر نوعية غير معتمدة مع استخدام زيوت غير معتمدة بردوا او غير معروفة او مغشوشة هوووووب تلاقي نفسك وقعت في مطب شورت بلوك و ده كله علشان فلتر لا يتعدى تمنه 30 جنيه مثلا او ايا كان سعره البسيط

هنعمل الصيانه بقا ازاي علشان نتفادى اللي ممكن يحصل ؟؟؟

اولاً لو جينا نتكلم على عدد الكيلوات اللي العربية مشيتها .. المفروض ان لو العربية جديدة لسه و بنروح نغير زيت في التوكيل كل 5000
ناس تقولك زيت فقط و ناس تقولك بيتغير الاتنين .. طب هو الصح ايه ؟؟
الصح الاتنين يتغيروا حتى لو العربية جديدة و مكتوب في الكتالوج يتغير كل 12 الف او 15 فلتر زيت

طب يعني هو اللي صنعها يا عم صلاح انت هتعرف اكتر منه ...؟؟ لا طبعا لكن هتتجنب تعمل صيانه بتتعمل كل 110 الى 120 الف و غير مدرجه بكتيب الصيانه .

و الصيانه دي هي اللي انا جاي اتكلم عنها للناس اللي مبتعملهاش .. و دي باذن الله بتخلي الماكينه فايقة و ناعمة جدا و بتحافظ على ال oil pump بتحافظ على الاجزاء المعرضه للحتكاك بالكامل .. الخ

الصيانة دي عباره عن ايه ؟
1- بنشتري زيت محترم و ليكن المعتمد في سيات (Castrol) و بتشتري فلتر اصلي طبعاً

2- بنرفع العربية و نبدتي نفك ال oilsump او كرتير الزيت .. لو العربية عندك ماشية و معدية 130 او 150 ممكن تلاقي بلاوي جوه الكارتير
3- اهم جزء لزم يتكشف عليه اللي هو suction pipe و ده هتلاقيه عبارة عن ماسورة على حرف L بداخلها زي شبكه او مصفى معدنيه وظيفتها فلترة مبدأية للزيت اللي رايح على oil pump لو لقيناها مكتومه و عالق فيها رايش تتفك و تتنظف تمام باسبراي تنظيف و تتنفخ بالهواء لو ما نضفتش و لسه عالق فيها اي حاجه او شكلها مكتومه (لازم تتغيرها) .

3- لو لقينا oil seal الخاص بالكارتير متاكل او متهالك (ينصح بالتغيير) .

4- نركب الفلتر الاصلي و تركب ال suction pipe بعد التنظيف و تقفل تاني الكارتير صح و ياريت ما تحرقش اوي على مسامير الربط لان جسم المحرك مصنوع من الالومنيوم لو حرقت جدا ممكن الفجوه اللي بتحكم ربط المسمار توسع و المسمار يفوت .

ملحوظه : في مفتاح اسمه wrench torque و ده المفروض هو اللي بيستخدم في ربط اجزاء المحرك و بيعتمد على مقسات ربط محدده بينصح بها مهندسون المحركان باستخدامه و بيكون وحده الربط تقاس بي (نيوتن ملي) NM و هوريلكوا صورته

بعد ما اتأكدنا من ربط الكارتير بعد التنظيف طبعا من الداخل و (تجفيفها بالهواء) نبدتي نحط الزيت و هو عادة 3.5 لترات بدون فلتر و طبعا بما انك غيرت فلتر يبقا هتحط 4 لترات

انت كدا بتحافظ على سبيكة المحرك بتاعك من الداخل و اللي بيصيبه بالتلف الشديد و هو (براده الالولمنيوم و الحديد الزهر) الناتج من احتكاك اجزاء المحرك المستمر و تحت الضغط الشديد .

طب هو انا كل شوية هعمل الموضوع ده كل 110 او 120 الف كم؟؟؟؟

علشان كدا انا بنصح الناس باستخدام فلتر اصلي و الزيت يتغير قبل معادة بفتره بسيطه يعني مش لازم اروح اغير على 5000 بالظبط .

نيجي بقا للصور التوضيحيه :
غنيه عن التعريف طبعا صورة oil sump او كرتيرة الزيت


صورة suction pipe الخاصة بشفط الزيت داخل من الكارتير الى اجزاء المحرك عن طريق oil pump



و ده صورة مفتاح الربط الموضها بها لبرط اجزاء المحرك






و ده شكل مفتاح المقاس و المبين الخاص به





الكلام ده انا شخصيا في عربيتي بس بفضل الله كانت الماكينة نظيفه جدا من الداخل و ماكانش فيه انسداد نهائي و ده لاني كل مره بغير زيت بروح مغير فلتر اصلي ؟

لكن احب بردوا احكي عن تجربة صديق لي معاه توليدو 2003 كان بيحط نوعية زيت غير مخصصة للمحرك ولا ينصح باستخدامها و فلتر من تحت بير السلم مع العلم العربية مش ماشية 50 الف كيلو .. غيرت له الاتي ( نص ماكينه كامله فوق خارجه من العربية مش نافعة ولا الكمات نافعه مخرطه حتى + حساس مقاس الزيت + انبوب الشفط + طلمبة زيت )

قمت بعمل هذا الموضوع للأفاده .. و للتوضوح بردوا العمليه دي لازم تتعمل على ميكانيكي نضيف و بيفهم او لو حد ليه في الميكانيكا و حابب يعملها بنفسه ....و اي اعطال تنتج بعد العمليه دي انا برىء منها امام الله ... هي مافيهاش اي خطورة او ما شابه لكن ممكن حد بعد كدا يجي يقولي اصل انا بعد ما عملت الموضوع ده العربية مش راضية تدور .. البطارية نامت .. العجله اتخرمت .. و بيتقال كلام اكتر من كدا بكتير .. و الصيانه دي اساسا ملهاش دعوة بايعطل يخص هذا الجزء

يا ترى من وجهة نظرك الصيانه دي تستاهل الاهتمام ؟