اتجاه فلتر البنزين .. ابيزا او كوردوبا 98 - 2002 و مشكلة متعبة جدا تم حلها

**ehab_mansour** · 01-09-2013 11:06 AM

السلام عليكم

أحبابي اعضاء قسم سيات كان عندي مشكلة مزمنه منذ فترة و هي :-

العربية صباحا بالذات دون اي وقت اخر اوقات اجي ادورها متدورش غير بعد محاولات عديدة تكاد البطارية تنام مني و اوقات تدور و لكن تفضل تقطع شوية و بعدين تنتظم خفيف - اجي امشي بيها الصبح برضوا تقطع مع السحب و تفضل تشد و ترخي مع السحب و حاجات غريبة و اجي اقف و بعدين احاول اتحرك تقوم مبطلة كل ده يفضل يحصل لحد ما امشي بيها مسافة محترمه و تسخن صح و بعدين كل ده يختفي تماما

طيب لو برده العربية بايته و مخرجتش بدري و جيت ادورها مثلا 11 صباحا و حتي مساءا تدور عادي جدا بدون مشاكل !!!!!!

السحب مش كويس بقاله فترة و قلت يمكن طلمبة بنزين !!!
لكن لو طلمبة مش هتفرق الصبح من الظهر من بليل .... قلت يمكن حساس حرارة او حساس مانيفول ؟؟؟؟

الحل : -
المهم كان عندي فلتر بنزين جديد قلت اغيره - فكيت القديم عشان اغير الجديد و جيت اصفيه من البنزين لقيت البنزين من فتحة الدخول بينزل نضيف جدا و مافيهوش اي شوائب ؟؟؟؟ طيب ازاي ده المفروض الناحية دي اللي بتصفي الشوائب يخرج منها البنزين متسخ .... طيب ناحية الخروج (ده حسب السهم علي الفلتر ) لقيتها بتنزل بنزين متسخ خفيف و به بعض الشوائب و هنا شكيت ان الفلتر معكوس ؟؟؟؟؟
قلت يمكن مش واخد بالي و الدنيا ضلمة ؟؟؟؟
كلمت كريم لأني كنت فاكر انه كتب عن اتجاه الفلتر قلي نصف ساعه و هيبعتلي الصور
مستنيتش و نزلت و اخدت معايا زوجتي و نمت تحت العربية و فكيت احد خراطيم الفلتر و هي تفتح كونتاك و تقفل عشان اشوف اتجاه سريان البنزين و هنا اكتشفت ان الفلتر فعلا معكوس !!!!!!!!!!!!!!!!!!!

الحمد لله فكيته و ركبته صح و النهارده الصبح العربية دارت من اول لحظه و كله تمام بفضل الله و انتهي التقطيع و السحب بقي افضل بكتير تحس العربية بتجري لوحدها و بفضل الله الطلمبة لسه سلمية و انعكاس الفلتر مأثرش عليها

و اكتشفت ايضا ان الفلتر مفكوك من وقت ما كانت عربيتي في ورشة نايل موتورز بتتسمكر و سايبينه مفكوك و من غير مسامير !!!!! ليه يفكوه معرفش ..... المهم ثبته و كله تمام (حتي الأن مش عارف مين سبب انعكاس الفلتر )!!!!! محتمل وقت السمكرة و محتمل منذ فترة طويلة كنت خليت ميكانيكي غيرهولي
و ده رابط لموضوع كيمو صديقنا العزيز الاسكنراني حول هذا الموضوع و الصور و ذكر فيه اتجاه الفلتر الصحيح و هو ان يكون اتجاه السهم من ناحية زور التانك لناحية الأخري او بمعني اصح من يمين السيارة لشمالها

http://www.nilemotors.net/Nile/36494...post3875061568

و بالتوفيق للجميع و كله ياخد باله من فلتر البنزين و اتجاهه

**SYD** · 01-09-2013 11:24 AM

الف مبروك حل المشكلة يا بشمهندس
اعتقد انت اشتكيتلي من فترة عن المشكلة دي
صح كدة ولا انا غلطان ؟

بس انت قصدك ان ممكن الميكانيكية يركبوه بالغلط ؟؟

**mahmoud ghanem** · 01-09-2013 11:25 AM

مبروك يا هندسة و بصراحة شغل عالى جدااا بس انا مش مستغرب لأن الكلام من عبقرى ... الله ينور علي الشغل العالى دة

**ehab_mansour** · 01-09-2013 11:47 AM

المشاركة الأصلية كتبت بواسطة syd

الف مبروك حل المشكلة يا بشمهندس
اعتقد انت اشتكيتلي من فترة عن المشكلة دي
صح كدة ولا انا غلطان ؟

بس انت قصدك ان ممكن الميكانيكية يركبوه بالغلط ؟؟

ربنا يكرمك يا ابو السيد
فعلا انا قلتلك عليها من فترة و بقالي كتير بفكر فيها و كل ما اروح ناحية اي شيء غير البنزين رجعله تاني !!!! يعني شكيت في حاجات كتير و لكن حسب ما انا فاهم ان اي عربية في الدنيا عشان تدور صح محتاجه هواء و بنزين و كهرباء ... الهواء موجود و البوابة مضبوطة و الكهرباء غيرت طقم بوجيهات و الطقم اساسا اللي خرجته حرقة مضبوط و ابيض و مافيهوش مشكلة !!!! يبقي لم يتبقي إلا البنزين

شكيت في الطلمبة و لكن بفضل الله هي بحالتها و جربتها كتير قبل كده زي الفل و احمد مبارك يشهد علي كده

موضوع مين ركبه غلط في الأساس مش متأكد و لكن اللي متأكد منه اني لقيته مفكوك و مسماره مش موجود و اخر مره انا اللي مغيره و ركبته حسب القديم و اللي اعتقد كان معكوس ..... بس ليه السمكري فكه اصلا و فين المسمار ؟؟؟؟ مش عارف

اول تغيير لفلتر عربيتي كان عند ميكانيكي من فترة طويلة بعد ما اشتريتها و اعتقد الغلط حصل هنا ... المشكلة كانت بتحصل منذ فترة طويلة تزيد علي سنة و لكن علي فترات متباعده و غير مستمرة و كانت بتحصل مع توقيتات معينة للسنة و الجو !!!!!!

لكن بقت مستمرة منذ ان نقلت اكتوبر و توقعي ان فعلا جو اكتوبر بتنزل فيه الحرارة جامد ليلا حتي في الصيف و ده كان اكبر سبب لظهور المشكلة باستمرار لأني بيت يوم في عين شمس و جيت ادور الصبح دارت طبيعي ؟؟؟؟؟؟

تفسيرات كثيرة بتوضح ان العربيات فعلا حساسه لأي تغيير حتي لو بسيط و فعلا اللي بصمم شيء يجب عليك اتباع تعليماته بالضبط لأن كل شيء له حساباته

المشاركة الأصلية كتبت بواسطة mahmoud ghanem

مبروك يا هندسة و بصراحة شغل عالى جدااا بس انا مش مستغرب لأن الكلام من عبقرى ... الله ينور علي الشغل العالى دة

ربنا يبارك فيك يا محمد بيك ..... الحمد لله

المشاركة الأصلية كتبت بواسطة soledad

الحمد لله على حل المشكله هى مشكله بيسطه بس تدوخ على شان توصلها او تفكر فيها اصلا

الحمد لله و ربنا يكرمك يا هندسه

نسيت اشكر من موقعي هذا اخي كريم علي مساعدته و صوره و ربنا يكرمه و يجزيه خيرا

**SYD** · 01-09-2013 12:01 PM

بس يا بشمهندس الفلتر يركب بالمعكوس يبقي المفروض العربية تبقي مكتومة كتمة سودا
الحاجة الثانية (بغض النظر عن انسياب البنزين) مش هيفلتر كويس - وعلي كلامك مش بيفلتر خالص
الحاجة الثالثة ودة الأهم - الأستهلاك هيزيد عن الطبيعي

ايه ملاحظاتك ؟

**ehab_mansour** · 01-09-2013 12:23 PM

المشاركة الأصلية كتبت بواسطة syd

بس يا بشمهندس الفلتر يركب بالمعكوس يبقي المفروض العربية تبقي مكتومة كتمة سودا
الحاجة الثانية (بغض النظر عن انسياب البنزين) مش هيفلتر كويس - وعلي كلامك مش بيفلتر خالص
الحاجة الثالثة ودة الأهم - الأستهلاك هيزيد عن الطبيعي

ايه ملاحظاتك ؟

شوف يا صديقي العزيز .... بالفعل السحب النهارده مختلف تماما تحس ان العربية بتجري لوحدها و دي اول ملاحظة

موضوع الفلترة معلش اختلف معاك لأن الفلتر في الاتجاهين هيفلتر لكن هتختلف لأن حسب فهمي لفكرة الفلتر انه طبقات و في اي اتجاه هيفلتر لأن كده كده البنزين بيعدي من نفس الطبقات دي لكن الفكرة كلها في اختلاف انسياب و سريان البنزين و اختلاف ضغط الطلمبة اللي هيعدي من الفلتر و ده كان السبب الأكبر للمشكلة و اللي ظهرت في الوقت الوحيد اللي بتحتاج العربية فيه لأكبر ضغط و لأكبر معدل سريان للبنزين و هو الصباح الباكر و انخفاض الحرارة و حاجة المحرك و الرشاشات لضغط اكبر كمية بنزين ..... هنا فقط بتظهر المشكلة بوضوح

لكن السحب .... او غيره ممكن بتتعود عليه و انت مفكر ان العربية هي كده و ده اخرها و مش بتكتشف ان فيه مشكلة غير لما تتحل و تزول

موضوع استهلاك البنزين مضبوط و كما هو و كويس لم يتغير و انا واثق ان عكس اتجاه الفلتر لا يؤثر علي الاستهلاك و لكن يؤثر علي الأداء فقط و الدوارة في بعض الأوقات

فيه ملحوظة أخري ان العربية بقالها فترة مش بترفع ارب بي ام كما كانت عليه اول ما اشتريتها لما تيجي تسخن و هو انها كانت بترفع ل 2000 ار بي ام لحوالي 20 الي 30 ثانية و بعدين تهدي الي 1100 و اقل فأقل حتي تصل للأيدل الطبيعي لها لما تسخن كويس
مع وجود المشكلة كانت بتدور علي 1300 مثلا مع التقطيع و التخبيط و حاجات غربية لفترة و بعدين متظبطش تماما غير بعد ما تسخن تماما و طول مافيه تقطيع لو حبيت اطلع من وقوف علي اقل من 2000 ار بي ام كانت تبطل في ساعتها و تقرفني علي ما تدور تاني و احرجتني امبارح مرتين في اشارة جهينة الصبح

اليوم بعد زوال المشكلة و الحمد لله دارت من اول لقطه - بتسخن علي 2000 ار بي ام - بتمشي بشكل طبيعي من غير ما احتاج ازود بنزين قوي و الحمد لله علي كل شيء ...

**SYD** · 01-09-2013 01:06 PM

كلامك سليم يا بشمهندس ١٠٠٪ ودي انا واثق فيها
بس لي بعض الملاحظات علي كلامك
اولا علي حد علمي ان الفلتر من جوة واخد شكل المخروط cone
ودة عشان يساعد علي الانسياب وبالتالي عكسته تسبب عدم فلترة بشكل كامل
وكمان تسبب مقاومة في الانسياب
المقاومة هي اللي تسبب استهلاك
وعلي العموم دة هيبان معاك خلال كام يوم استعمال

تحياتي ليك يا بشمهندس

**hossamalsadik** · 01-09-2013 07:22 PM

الحمد لله ومبروك حل المشكه ياهندسه
ومستغرب من حكاية ان الفلتر بالمقلوب وحاجه زى ديه أكيد لازم دماغك توديك لبعيد وتشك فى حجات تانيه أعتقادا من ان مش ممكن حد مش عارف يركب فلتر
وبالرغم من ان الواحد لما بتحصل حاجه زى ديه فى العربيه بيبقى مضايق بس فى الأخر بيحمد ربنا انها طلعت بسيطه
وكل يوم الواحد بيتعلم

-

-

الموضوع: اتجاه فلتر البنزين .. ابيزا او كوردوبا 98 - 2002 و مشكلة متعبة جدا تم حلها

LinkBack

أدوات الموضوع

عرض

اتجاه فلتر البنزين .. ابيزا او كوردوبا 98 - 2002 و مشكلة متعبة جدا تم حلها - انشر الموضوع فى :

-

-

-

-

-

-

-

المواضيع المتشابهه

حل مشكلة عوامة البنزين (ابيزا 98)

ازاى تغير فلتر التكييف بنفسك(ابيزا-كوردوبا-بولو-جولف)

تجربة تغيير فلتر البنزين - ابيزا 99 1.4 mpi

تويوتا تكشف مشكلة دواسة البنزين وتعلن عن حلها

تجربتى الخاصة مع فلتر K&n مع طريقة التركيب "سهلة جداً بس متعبة"

الكلمات الدلالية لهذا الموضوع

المفضلات

المفضلات

ضوابط المشاركة