الموضوع: أنت تسأل وإسـتـشـارى منتدى متسوبيشى يجيب

المشاركة الأصلية كتبت بواسطة mohamedway

السلام عليكم يا باشمهندس طارق
كان عندى سؤال فنى لحضرتك وهو انى من كام شهر كده غيرت فلتر البنزين فى مركز الرواس اللى فى شارع عبد الخالق ثروت ومعملتش فيها أى حاجه تانيه. علما بأن عربيتى توكيل مصريه بس خرجت خلاص من الضمان لأن ضمانها كان 60000 كم و هى دلوقتى عامله 68000 كم وهى 1600 مانوال 2006و عندكم زحمه جدا علما بأن مركز الرواس ده فيه ميزه بتغرينى جدا وهى انى بأفضل واقف جنب عربيتى و بابقه شايف ايه اللى بيتعمل فيها و ده حاجه مهمه جدا جدا بالنسبالى لأنى مهندس ميكانيكا و هاوى سيارات و عندى خبره عمليه كمان فى صيانتها (ده حته تيل الفرامل بأشتريه من عندكم و باركبه بنفسى).......
المهم ان ده كانت أول مره يتغير فيها الفلتر و ماردتش أغيره بنفسى أول مره لأنى مكانش عندى خبره فيه قبل كده.

معلش طولت على حضرتك و هخش فى الموضوع بقه.......

من ساعت ما الفلتر أتغير و العربيه استهلاكها من البنزين زاد بشكل ملحوظ جدا مع العلم ان الفلتر القديم ما كانش خانق العربيه و كنت باجيب بيها 190 كم /س و بعد تغيير الفلتر أداء العربيه ما اتغيرشش بس استهلاك البنزين زاد قوى؟!!!!!! أنا قلت يمكن فيه تسريب من مكان فك و تركيب الخراطيم و شيلت الكنبه الخلفيه و فكيت الخطاء الصاج اللى فوق الفلتر و بصيت على الخراطيم و الفلتر و العربيه دايره كمان و مفيش تسريب؟؟؟؟؟؟؟؟؟؟ المهم انا كان ليا بعض الملاحظات و انا بشوف العامل و هو بيركب الفلتر :

1- أول لما فك خرطوم تغذيه البنزين من الفلتر (الخرطوم الكبير اللى ليه كلبس بلاستك) رجع كميه بنزين كتير من ناحيه الموتور و كان باندفاع و غرق الدنيا علما بأن الكونتاكت كان مقفول و مفيهوش المفتاح و فيشه الطرمبه كان شالها خلاص (علما بأن اللى رجع ده مالوش علاقه بالطلمبه و كان راجع من ناحيه الموتور).

وعلى فكره انا فكيت الفلتر مره كمان بعد كده و معملتش الحركه ده تانى معايا و انا بفكه لتانى مره.

2-ملاحظاتى على الفلتر الجديد انه كان كله لونه أبيض و ليس ملصوق عليه استيكر Denso زى اللى كان راكب و اللى كان راكب كان الجزء السفلى اللى جوه التنك بلاستك أسود والجديد كان أبيض. (بس على فكره لما فكيته تانى مره لاقيته بقه اسود زى الأصلى و مش عارف ده بقه سحر و لا ايه!!!!!!!!!). و فى اعتقادى ان البنزين بيتفاعل مع البلاستك اللى تحت و يلونه بالأسود كنوع من أنواع الإفاده بأن الفتر ده استعمل قبل كده و لا فعلا جديد و ده طمنى شويه انه فعلا أصلى.

3- التجربه اللى انا عملتها بقه انى فكيته زى ما قولت لحضرتك و رجعت القديم تانى لاقيت استهلاك البنزين اتحسن بس بردو مش زى الأول؟؟؟؟!!!!!!!!

سؤالى بقه لحضرتك بخبره التوكيل اللى أكيد ياما شفتوا من خلالها مشاكل كتير؟؟؟؟؟؟؟؟

ايه اللى اتغير فى العربيه بعد فك الفلتر الأولانى خلاها تاكل بنزين و ايه سبب اندفاع البنزين اللى رجع من وصله البنزين من الناحيه اللى رايحه على الموتور علما بأنها ما اتكررتش فى الفك المره الثانيه (وهل ده شاهد على ان فيه حاجه حصلت فى الإنجكشن فى الفك أول مره وهى اللى رجعت البنزين ده)؟؟؟؟؟؟؟

أرجو الإفاده من حضرتك علما بأن استهلاك العربيه كان فوق الممتاز قبل اللعب فى موضوع الفلتر وكمان أداءها فوق الممتاز لدرجه إنى قولت لنفسى ياريتنى ما فكرت أغيره الا لما يتسد خالص مع العلم انه غالى جدا زى ما حضرتك عارف.

أرجو الإفاده من حضرتك و أسف انى هتعبك معايا.......

يا بشمهندس طارق حضرتك نسيتنى خالص:(