الموضوع: تقرير وتحليل فيات برافو 2013 (تركيز على المشاكل)

المشاركة الأصلية كتبت بواسطة A7mad Tal3at

أنا معايا برافو 2013 - 120 حصان تيربو p6
اشتاريتها في آخر 2012 ب 169 ألف وماشي بيها لغاية دلوقتي 19 ألف كيلو
طبعا العربيه فيها مميزات كتير جدا جدا جدا يمكن أبرزها قوة الموتور والتسارع الممتاز ودا طبعا بفضل التيربو
بس انا عايز اركز على العيوب اللي في وجهة نظري شايفها (فـااااااادحـــه)
أولا: مشكلة الفتيس (طبعا هو فتيس إيزي ترونيك)..من خلال التجربه اتضح ان الفتيس في الزحمه بيعمل مشاكل وليه طريقة تعامل معينه..انا ساكن في 6 اكتوبر والحياه عندي هنا مش زحمه الحمد لله
لكن لما بنزل بالعربيه أي مشوار لوسط البلد أو وقفت في زحمة محور ولا دائري ولا غيره بتطلعلي رساله على الشاشه بتقول Clutch Over Temperature مع اني عارف كويس اوي طريقة التعامل مع الفتيس الإيزي ترونيك وهي اني لو هقف اكتر من خمس ثواني بروح جايب الفتيس على ال n (بمور بمعنى أصح) ومع ذالك بردو الرساله بتظهر
طبعا ظهور الرساله مش معناها ان الفتيس فيه مشكله لأ دا مؤشر لإن الدبرياج قرب يحصله الجلاشه..لما كلمت طوارئ فيات حكيتله على المشكله وانا في الزحمه كان الرد كالآتي (أقف على أي جمب يافندم وسيب العربيه تبرد شويه) 0_0
طيب أقوله إيه طيب !! جايب عربيه ب 170 ألف علشان لما أبقى نازل مشوار زحمه آخد عربية أخويا الأسترا !! ولا عربيه ب 170 ألف علشان أقف على جمب يافندم على مالعربيه تبرد!! حاجه تجنن
ملحوظات:
-الرساله مابتظهرش لحطة وقوفك في الزحمه..لأ يعني بعد 10 دقايق زحمه كده ولا حاجه الرساله تبدأ تظهر
-اللي بيحصل ان الرساله بتظهر وخلاص..يعني وانته في الزحمه مابيحصلش حاجه لأ عادي العربيه ماشيه مافيش مشاكل..بس بيبقى قلبك متقطع وانته مش عارف تعمل ايه للعربيه وللدبرياج اللي بيتحرق
-انا داخل على صيانة ال20 ألف ومتوقع طبعا لما أحكي للتوكيل على الموضوع دا هيقولي أصل انته بتسوق غلط !! ومش بعيد يقولي طقم الدبرياج عندك شكرا محتاج يتغير

نيجي بقى للمشكله الفادحه الثانيه:
التكيييف
التكيف في مشكلتين الأولى عادي ممكن يتغاضى عنها وهي فتحة التهوية الشمال تقريبا كده ملهاش لازمه..توزيع الهوا سيئ جدا..يعني تلاقي وشك نصه اليمين متلج ونصه الشمال بيتحرق :)
المشكله التانيه وهي الأخطر..تيجي تقف بردو في زحمه بعد 10 دقايق او ربع ساعه كده تلاقي التكييف بيطلع هواء مش ساقع اول ما الزحمه تفك والعربيه تجري التكييف يرجع تاني كويس
طبعا ممكن يكون عندي مشكله معينه..بس مشكلة إيه دي اللي تظهر وانا لسه ماكملتش 20 ألف كيلو
يعني بردو جايب عربيه ب 170 ألف علشان لما أبقى رايح مشوار زحمه ومحتاج التكييف أسيب عربيتي وأروح أبلطج على أخويا علشان آخد الأسترا D:
الله يرحم اللانسر البومه (3 سنين فحت في العربيه) ومقالتش بم
واهو اديني مستني معاد صيانة ال 20 أما اشوف التوكيل هيقولي ايه على التكييف

المشكله الفادحه التالته: (غباء السوفت ويير)
نفسي أروح لفيات في إيطاليا وأقولهم يا جماعه احنا في 2013
نظام الميديا أغبى مايمكن..مقسوم نصين..نص بتاع الراديو والسي دي ونص بتاع البلوتوث وال USB طبعا مفيش aux
النص الأولاني بتتحكم فيه من منطقة السي دي والنص التاني بتتحكم فيه من الطاره (صباح اللبخه)
وعلشان تحط حاجه على الفلاشه أو السي دي لازم تتسحل
يعني لو انته مرقم ال tracks من 1 ل 30 طريقة قرايته بقى بتكون أي حاجه بتبدأ بواحد ليها أولوية يعني يقرأ (1 وبعدين 11 وبعدين 12 وبعدين 13 وهكذا) يدخل بعد كده على 2 وبعدين 21 وبعدين 22 وهكذا
وطبعا علشان فيات لسه عايشين في 1988 السي دي مابيقراش دي في دي عليه داتا :)

بصراحة يا باشا أنا أعصابي تعبت وأنا بقرأ مشاركتك,,
يعني دا أي كاسيت ياباني كين وود مثلا زي بتاع البوما الخليجي اللي كان بيقرأ mp3 وبننسخها أسطوانة داتا كمان أو حتي كاسيت صيني هيقرأ التراكات مظبوطة,

وموضوع التكييف دا مزعج فعلاً وانا جربت في السيينا لأني مركبتش البرافو, فتحة التكييف اللي جنب الباب تصميمها غبي بتضرب في أيديك الشمال اللي ماسكة طارة الدركسيون وبتلاقي صوابعك تلجت في ثواني لأنها قريبة من الفتحة جدا وعاملة حاجز ومفيش هوا جاي عليك, وبينتهي الأمر بأني بحول الفتحة بتاعت التكييف ناحية الشباك عشان أيديا بتتحجر

وموضوع الفتيس دا مش جديد طبعاً, وهتلاقي كله يقولك بس انت مش عارف تتعامل معاه بس ومش عارف أيه, وليه طريقة معينة في التعامل ؟!!!!!
هوا أنا جيب قطة سيامي ولا شيرازي عشان أعاملها بطريقة معينة وأحسس عليها ؟!!!
ولا عشان الناس تقولي أنت مش عارف تتعامل معاها !!!!!!!

يعني مفيش عربية كوري ولا ياباني ولا حتي كوري بتعمل كدا في الزحمة,,
ليه أشتري عربية ب 170 وأدفع فيها كل دا عشان تذلني في الزحمة وأضطر أركن علي جنب لو سخنة لمرحلة خطر فعلاً,
مع العلم أن كل العربيات اللي واقفة جمبك من ياباني وكوري بما فيهم الصيني والشيري والجيلي أوتوماتيك واقفين وماسكين نفسهم زي الفل !!!

ولو أفترضنا أن والدك أو راجل كبير هوا اللي سايق العربية,
والناس الكبيرة ممكن تبقي علي قدهم في السواقة, المفروض يروش نفسه بأنه كل ما يقف يجيب N وبعدين D وبعدين N وبعدين D وبعدين N وبعدين D
عشان يريح الفتيس ويهلك أعصابة هوا عشان عارف أن لو سابة علي ال D ممكن يحرقة .؟؟

سؤال بس هوا الواحد بيجيب فتيس أوتوماتيك ليه ؟ عشان يريحه ويريح نفسه من تعب الزحمة ولا عشان يقف في الزحمة علي أعصابة وهيا رجليه لافه حوالين بعضها..

لا تعليق الصراحة, وربنا يبارك لك في العربية,
ويعوض علي أستاذ عمرو في طقم الدبرياج اللي غيرة ويستر طريقكم.