انا مالك سيارة فيكترا 2002 1600 ايكو تك جبتها من اربع شهور ومن ساعتها ... عندي استهلاك البنزين هبل يعني الصفيحة بتعمل 160 كم عل سريع والمتوسط 140 كم جوه البلد ودوخت ورا كل حاجة من صابر لعبد الراضي لعلام مفيش حد وصل لحاجة في الموضوع ده .. مع العلم ان :
1-خرطوم وماسورة البنزين تمام مفيش تسريب.
2- غيرت اي جي ار وشغال تمام عن تجربة.
3- غيرت حساسين اكسجين بانك 1 وبانك 2
4- غيرت حساس ماب
5- عملت التراسونيك للرشاشات والاداء اختلف بعد التنظيف بس معدل الاستهلاك لسه عالي
6- غيرت عند طناني طقم بوجيهات واحد شمعة ونظفت البوابة (وبصراحة طناني محتاج موضوع لوحده لوصف المركز بتاعه ماشاء الله)

عايز اقولك كنت قريت في موضوع من مواضيعك حاجة عن long fuel trim انا عندي 25- % ... عندي الاوب كوم والواصلة ومتابع القرايات بتاعت الحساسات وفي ملحوظة كمان .. حساس الاير انتاك اللي راكب عل عمة كان السلكتين بتوعه راكبين بالشقلوب يعني الموجب واصل عل سالب وده كان بيخلي الكنترول كل شويه يدي ايرور شكل لحد ما صابر مشي ورا الضفيرة ووصل للموضوع ده ومن ساعتها مبقاش في تهييس في الايرورز دي .. معلش طولت عليك بس ربنا يجعلك سبب في حل الموضوع ده علشان قربت ابيع هدومي.

رد: أحمد عاشور

ياه -25% دي سفاحه بنزين !!!!

العربيه بتدخن ؟؟؟ بتشم ريحه بنزين ني ؟؟؟ البوجيهات بتتطلع سودا ؟؟؟؟

عموما انت راجل بتفهم و بتشغل دماغك

شوف يا سيدي الحساسات اللي جايه دي مسؤله عن الحريق :

1-كولنت سينسور حساس حراره مياه التبريد دا مفروض يكون ميقلش عن 80 درجه بعد مالعربيه تسخن لو كان اقل من كدا العربيه تاكل بنزين
لو اقل قولي نتكلم في الموضوع

2-حساس الانتاك اير قراءته من 10 درجات ل 50 درجه الكنترول بيرمي بنزين اكتر للهواء الساقع خلي بالك

3-حساس الماب وده في السلانسيه مفروض يكون من 30 الى 50 kpa يعني من 1.2 فولت ل 1.9 فولت
والموتور مش داير و انت فاتح كونتاكت بس يكون من 90 الى 110 kpa او من 4 فولت الى 5 فولت

4-بالنسبه لحساس الاكسجين الراجل عمل اللي عليه وبيقول للكنترول قلل بنزين فدا مش بايظ عشان تتأكد هتلاقيه كاتب rich في الداتا ليست في الطبيعي مفروض يفضل يغير ما بين lean and rich

5-حاجه مهمه جدا جدا .... ضغط طلمبه البنزين
اشاره الكنترول للرشاشات مبنيه على ضغط معين لطلمبه البنزين واللي بينظم الضغط دا بلف الراجع
لو حد لعب في الطلمبه او بلف الراجع مسدود اللي اقصده ان ضغط البنزين على الرشاشات اكتر من المفروض
لو كل الحساسات اللي فاتت دي سليمه العربيه تاكل بنزين بردو

في جهاز لقياس ضغط طلمبه البنزين .