السلام عليكم
ازيكم يا رجالة
امبارح العربية عملت معايا 1069 كيلو فقلت هاخدها النهاردا على التوكيل، اعملها صيانة الالف كيلو وبالمرة افعل الضمان واستلمه من هناك
روحت في حدود الساعة واحدة وتلت من غير حجز ولا يحزنون :P
صراحة المعاملة هناك محترمة وكل الناس بتتعامل بزوق وبيفهموك كل حاجة
اخدو مني العربية والمفتاح ودخلت الورشة، والمهندس قالي هتاخد ساعتين صيانة وقدامها ساعة على ما تدخل علشان عندنا زحمة النهاردا

قعدت معاة وقالي اية المشاكل اللي معاك
قلتله العربية جميلة ما شاء الله ولا يذكر عليها شي بخلاف استهلاك البنزين حاسس انه عالي شوية وكمان صوت الموتور حاسة عالي حاجة بسيطة
قالي دي حاجات بسيطة وبعد ال5000 كيلو كل دة هيروح معاك

العربية فضلت فعلا ساعتين جوا في الورشة وانا شايفهم من مكان الاستراحة وهما شغالين فيها
الاول اترفعت وفحصوها كويس من تحت، وبعدين بدأو يشتغلو فيها شوية ويفحصو كل حاجة فيها وبعد لما اتأكدو ان كل حاجة فيها تمام غيرولها الزيت والفلتر وغسلوها تمام وطلعت وكانت التكفلة كالاتي

تكلفة اول صيانة : مجانا
تغيير فلتر زيت : مجانا
غسل وصيانة وكشف عام على السيارة : مجانا
تغيير زيت 10.000 : 277ج، زيت توتال
ضريبة وخلافة : 11 جنية
الاجمالي بعد خصم 15% 250 جنية

وانا ماشي بقول للمهندس العربية طلعت فيها حاجة بعد الفحص
اخدني على جنب وقالي الناس اللي ربنا بيحبها هي الي جابت الشكل القديم n16
الشكل الجديد زي الزفت ومشاكلة مفيش اكتر منها، لكن القديم ملوش مشاكل تذكر وعربية محترمة

بجد كلامه فرحني جدا واكتر حاجة كنت سعيد بيها اني سمعت كلام الاخوة في المنتدي اللي نصحوني اني ابعد عن الشكل الجديد واجيب القديم

بجد العربية جميلة ومفهاش مشاكل وانا مش ندمان اني جبتها لانها افضل عربية في حدود المبلغ اللي اتدفع فيها