عملت صيانة الالف كيلو النهاردا ومهندس التوكيل قالي كلمة مهمة جدا

**فبريكا** · 25-09-2013 04:30 AM

المشاركة الأصلية كتبت بواسطة leitosr

أيوة العربيات الجديدة كلها بتنزل بزيت موتور تخليقي, مفيش عربية جديدة بتنزل بزيت معدني أو نصف تخليقي,,
والمفروض أن عمره الأفتراضي من 8000 إلي 12000 كيلو متر,
وأنت المفروض وهيا عربيتك جديدة تشيك عليه كل أسبوع أو أسبوعين بالجديد عشان لو فيها حاجة تعرف الضمان والتوكيل,,

غير كدا مفيش توكيل محترم بيغير الزيت للعميل علي 1000 كيلو إلا اللي معندهمش ضمير عشان يعمل عليه أي شغل وأي مصلحة, هيبيع له جركن زيت وفلتر أحسن ما يستني علي ما يجي له علي ال 10.000 وممكن تبقي بعد سنة.!

والضمان اللي أنت بتاخدة بيكون علي أنك متعملش شغل في العربية بره التوكيل خاص بلعب في الكهرباء أو الضفيرة أو الميكانيكا,,
أما غيار الزيت دا مفهوش شغل ميكانيكا,, والمفروض أن أول غيار زيت يكون علي 10 الأف أو 7 لو حد عايز يروح بدري,,

وكل التوكيلات النضيفة لما حد بيشتري عربية جديدة بيقدمو له صيانة مجانية اللي هيا أول صيانة,,
مش بيتعمل فيها حاجة غير مراجعة حالة السوائل عشان لو كان فيه تسريب زيت موتور أو فتيس أو باقي السوائل من زيت باور وفرامل ومياة تبريد,, وبيتعمل تربيط عفشة للعربية مجاناً وبيسمعو منك لو فيه أي ملاحظات علي العربية أو السواقة عموماً وبس...

وأول صيانة فعلية بتكون علي ال 10 ألاف كيلو وبتكون زيت وفلتر زيت فقط,
ومفيش تحميل مسؤلية والكلام دا, عربيتك بينزل فيها زيت 10 الأف والمفروض في جدول صيانتك أنك تغيرة في معادة أو في صيانة ال 10 الأف,, وشوف كتالوج عربيتك وراجعة برضه.
وأن أول صيانة مجانية دي ممكن متروحهاش ومش هتضر بالضمان في حاجة,, بس أنت بتروحها لو عندك مشكلة وعايز تربط عفشة عندهم ومش شرط فيها أبداً أنك تغير زيت !!

شكرا على المعلومات المفيدة ديه انا استفد منها صراحة ربنا يبارك فيك بس انت قولت بنفسك لو التوكيل محترم واعتقد التوكيلات الى عندنا بتتلكك اصلا وزي ما قولت نشوف الى مكتوب فى الكتالوج بس هل كل الكتلوجات بيوضح نوع الزيت الى موجود في العربية حاليا خصوصا لو تقفيل مصري ؟!

**Ahmed Amin** · 25-09-2013 05:05 AM

ياباشا العربية تقفيل مصري أه,
بس صناعته الموتور أيه ؟؟
وأنهارده مفيش عربية ياباني بتنزل بزيت معدني ولا نص تخليقي حتي لو أتقفلت بره بلدها.!

ومش كل التوكيلات بتتلكك, فيه توكيلات كتير مش بتغير الزيت علي 1000 لأنه ملحقش يشتغل أصلاً
عندك كمثال البيجو 301 الجديد أو ستروين أليزيه أو أوبل كورسا الجديد أو BMW ومرسيدس,, كلهم بيعملو صيانة مجانية علي أول 1000 أو 2500 كيلو مراجعة علي السوائل وحالة العربية وعشان لو عندك مشكلة بتقولهم عليها,, بس مش بيغيرو الزيوت.
دا مثال,
http://www.nilemotors.net/Nile/37748...post3875172924

وأنا مش مش معايا كتالوج الصني, بس لو فتحته بص في جدول الصيانة ونوع الزيت اللي مناسب عليها هتلاقيه يا 5w-30 يا 5w-40 والأتنين زيت تخليقي كامل,,
ومفيش عربية بتنزل بزيت معدني أو نص تخليقي,, بعدين يقولك في الكتالوج حط لها تخليقي,
لأن المعدني والنص تخليقي بيوسعو خلوصات الموتور ومش هيبقي مناسب تحط زيت تخليقي بعدها,, ومش بيزيوتو كويس ولا بيعيشو زي الزيت التخليقية,

عشان كدا أغلب الجديد بينزل بزيت تخليقي كامل من المصنع عشان يحافظ علي عمر الموتور,, ولما تيجي تغير المفروض تغير بزيت تخليقي برضه لحد ما تعدي ال 100 ألف وعليك خير تبدأ ساعتها تفكر أنك تحط نص تخليقي,,

**Ahmed Amin** · 25-09-2013 06:04 AM

المشاركة الأصلية كتبت بواسطة فبريكا

ماشاء الله عليك ربنا يحفظك على المعلومات الجميلة دية على كدة بقى الواحد فعلا ما يحطش فى عربيتوا الزيرو الا الزيوت التخلقية دية علشان تحافظ على الماتور اطول فترة ممكنه طب يا ترى الزيوت التخلقية دية متوفرة في الاسواق واسمها ايه

أولاً الله يخليك وشكراً علي مجاملتك,
وأكيد طبعاً أي عربية جديدة وزيرو لحد ال 100 ألف يفضل أنك تحط لها زيت تخليقي كامل,

لأن الزيوت التخليقي عموماً Have a Lower pour point, higher flash point
ودا معناه إن الزيت هيوصل لكل حتة في الموتور بسرعة من أول ما تدور العربية وهيا باردة,
ودا طبعاً علي عكس الزيوت المعدنية والنصف تخليقية اللي حركتها أبطئ وبتحتاج وقت أطول عشان تقدر توصل لدرجة حرارة التشغيل الطبيعية وتبدأ تحمي الموتور من الأحتكاك والتأكل,,

يعني بالبلدي في الزيوت المعدنية والنصف تخليقية وهوا الموتور بيسخن هيحصل أحتكاك سئ داخل غرف المحرك لأن الزيت مش هيكون وصل لدرجة حرارة تشغيلة الطبيعية اللي بيبدأ يشتغل عندها بكفائة ولا هيوصل لكل جزء في المحرك بسهولة من أول ما تدور العربية,,

وطبعا الزيت التخليقي خفيف و حركته أسرع فا بيوصل لكل خلوصات الموتور بسرعة ومش بيوسعها لأنه خفيف علي عكس الزيت المعدني والنصف تخليقي, وكمان عمرة أطول,,
فبيحافظ علي عمر وحالة الموتور بشكل أعلي,

ممكن تراجع أكتر من الموضوع دا, وأقري من المشاركة 1 حتي لحد المشاركة رقم 6 عشان تستفاد أكتر,
http://www.nilemotors.net/Nile/375062-a.html

الأنواع هيا زيت شيل ألترا العلبة الرصاصي زيت تخليقي كامل, ودا اللي أنا بستعمله لحد دلوقتي ولسه مغيرتش,
دي صورته, 5w-30

ودا ال 5w-40

الفرق ما بين ال 5w-30 وال 5w-40
إن ال 5w-30 مناسب للبلاد اللي درجة الحرارة فيها بتتراوح من -30 تحت الصفر لحد 45 مئوية.
وال 5w-40 مناسب للبلاد اللي درجة الحرارة فيها بتتراوح من -30 تحت الصفر لحد 50 مئوية.
والأتنين بيتحملو درجة حرارة تشغيل بحد 100 مئوية,

فعشان كدا يفضل أنك تستخدم 5w-30 علي طول لأنه أخف علي الموتور,,
وممكن تستخدم 5w-40 في الصيف لو حر أووي ودا الل أغلبنا بيعمله.

وباقي الأنواه بالنسبة لزيت شيل هتلاقي علب حمراء, دا معدني أوعي تحطة, وفيه أصفر وأزرق,
دول أبعد عنهم دلوقتي طول ما عربيتك جديدة.

وباقي الزيت اللي متوفرة ف السوق فيه توتال أو موبيل أو كاسترول أو وولف أو زادو أو فالفولين أو ليكوي مولي,,
أهم حاجة وأنت بتشتري الزيت يكون 5w-30 أو 5w-40 عشان يبقي زيت تخليقي كامل.

وممكن طبعاً تستفيد من تجارب الأعضاء قبل ما تجرب وتشتري, لأن فيه ناس كتير أشتكت من الزيوت اللي زي فالفولين وأنتي بيبخر بسرعه ومش بيكمل 7 الأف كيلو, ونفس الكلام مع ليكوي مولي,
بس المهم أنه كله أجمع علي إن زيت موبيل دا زفت,, فاحاول تتفاداه,,
وأسمع الأراء والتجارب من الموضوع دا,
http://www.nilemotors.net/Nile/42130-a.html

بالتوفيق في الأختيار,

**Ahmed Amin** · 25-09-2013 07:38 AM

النص تخليقي براحتك لما تحولة ليه ممكن تحطة لحد 200 أو 300 ألف, ربنا يدي موتورك الصحة بس,,
أنا أعرف ناس دخلت في ال 240 ألف ببيجو 406 ولسه بيحطو زيت نص تخليقي,,

المعدني هوا الزيت اللي لزوجته عالية وتقيل, ودا زي جركن زيت شيل الأحمر ودا مش مفضل خالص للمواتير الجديدة لأنه علي حسب ما سمعت بيعمل حمل علي عامود الكامات,, لأنه بيتقل حركة السلندرات جوة الموتور بسبب تقل ولزوجة الزيت العالية جداً مقارنة بالزيت التخليقي,,

ناس كتير هتختلف في النقطة وتجادل, بس دأ أتقل لزوجة في السوق وممكن تحطة لعربية قديمة موديل 80 زي بيجو 504 أو 505
لكن حرام يتحط لعربية موديل 2010 أو 2005 لمجرد أنها عدت ال 200 ألف,,
وساعتها النص تخليقي هيبقي مش وحش عليها,, إلا لو حسيت أن الزيت مش بيعيش فيها ساعتها هتحول لمعدني عشان أتقل.

ودا شكل العلب
شيل الزرقاء النصف تخليقي,

ودا شيل الأصفر,

ودي الزيوت المعدنية,

ودا تمشي عليه من 1000 كيلو بس لو الموتور وحش ودا مش حالتنا لحد 3000 كيلو لو حالته كويسة كويسة,, دا المتوسط بتاع تغيرة وكله طبعاً بمراجعة مستوي الزيت ولزوجته.
أما النص تخيلقي من 4000 لو الموتور مش كويس, لحد 6000 كيلو لو كويس,

وفي الأول والاخر كله بيعتمد علي حالة موتورك, لو موتورك بقي وحش بعد ال 200 ألف وبقي الكبس ضعيف وبياكل زيت ممكن تضطر تنزل لزيت معدني عشان يعيش معاك الزيت وميكلفكش غيارات زيت نص تخليقي بمعدل أعلي.

**amr011111** · 25-09-2013 09:02 AM

المشاركة الأصلية كتبت بواسطة leitosr

هوا معلومة بس صغيرة ليك,, الزيت المفروض بيتغير علي 10 الأف كيلو, مش علي ألف كيلو,,
دي حركة خسيسة بتعملها التوكيلات اللي معندهاش ضمير,,

وصيانة الألف أو ال 2500 أو حتي ال 5000 كيلو بتكون مراجعة علي السوائل فقط,
ومفصلات الأبواب وتربيط عفشة,, وبتكون مجانية,,
ولو كان عندك أي مشاكل أو ملاحظات بتقولها,,

غير كدا العربية بتنزل بزيت تخليقي وأنت المفروض تراجع المقياس كل أسبوع مرة علي الأقل, وتشوف اللزوجة ولو حالة الزيت كويسة واللزوجة كويسة مفيش داعي أنك تغيرة بدري ولا تخليهم يعملو عليك شغل.!

وكلامه اللي قالهولك دا مش جديد, وحضرتك من كلامك بتقول أنك قريته قبل كدا هنا,,
يعني حاجة معروفة من قبل ما تشتري ومن قبل ما تروح للتوكيل,, وهوا كان بيقولك كدا أي كلام يعني قبل ما تمشي عشان عمل عليك مصلحة وأسف في اللفظ,,

وعشان تنتظر ساعة عادي في أي توكيل,, لكن عشان تغير الزيت ياخد ساعتين في الورشة دا وقت غير عادي,,

المهم مبروك علي العربية وعلي الصيانة وعقبال صيانة ال 100 ألف.

فى الدليل بتاع صيانة نيسان مكتوب ان الزيت يتغير على 1000 كم
واظن ان مش من مصلحة المهندس انه ياخده على جنب علشان هوه عامل عليه مصلحه ده التوكيل مش بتاعه

**vip74** · 25-09-2013 09:34 AM

فعلا الشكل الجديد فيه مشاكل
أنا كنت بشتري ولاحظت عربيات كتيره الشكل الجديد معروضه للبيع موديل السنه

**Ahmed Amin** · 25-09-2013 10:29 AM

المشاركة الأصلية كتبت بواسطة amr011111

فى الدليل بتاع صيانة نيسان مكتوب ان الزيت يتغير على 1000 كم
واظن ان مش من مصلحة المهندس انه ياخده على جنب علشان هوه عامل عليه مصلحه ده التوكيل مش بتاعه

هههههههههههههه

محدش قال أن التوكيل بتاعه,,!

بس في أي توكيل مش كويس من مصلحة المهندسين أنهم يعملو شغل عال زبون,,
عشان يبيع قطع ويعمل شغل,, وكتير العربية بيكون فيها حاجات كويسة ويقولك دي محتاجة تتغير,
مش عايز أدي أمثلة علي الكلام دا, ولا علي تجارب حصلت معايا في توكيلات مختلفة بسبب إن المهندسين بيكونو مش فاهمين هما بيقولو أيه وبيلبخو,,!!!!
وأي واحد فينا أتعامل مع أكتر من توكيل هيكون مر بتجربة مشابهة لدي,

وهقولك علي حاجة لو كتالوج بتاع الصيانة بتاعك مكتوب فيه إن تغير الزيت كل 1000 كم
غيرة كل 1000 كم, إن شاء الله علي 800 كيلو كمان..

الحرص واجب ومش وحش,,

أنا بتكلم عموماً وفي الصح,, إن مفيش عربية جديدة أنهارده موتورها ياباني أو أوروبي بتنزل بزيت نص تخليقي أو معدني,,
ولو قريت كتالوجك كويس أو صح, هتلاقي مكتوب إن الزيت المفضل لعربيتك هوا الزيت التخليقي كامل,, ولزوجتة 5w-30 أو 5w-40 والأتنين تخليقي كامل.

ومفيش عربية ياباني بتنزل بزيت معدني أو نص تخليقي ولا دا بيحصل في عربية زيرو وترجع تحط لها تخليقي كامل بعدها عشان كدا هيبقي عك,,

وأكيد كل واحد يلتزم بالكتالوج والحاجة اللي يرتاح لها أكتر,
أنا كان كل كل كلامي في العموم, وإن كل العربيات الجديدة لازم يتحط لها زيت تخليقي كامل علي الأقل لحد ما توصل ل 100 ألف كيلو,,
والزيت التخليقي بالمناسبة لو أنت نزلته بدري عن معادة مش هتستفاد بيه لأن الأضافات اللي فيه مش بتكون لحقت تشتغل علي الموتور,, وبتبدأ تتأكسد علي رينج ال 8000 ل 12 ألف

وممكن زي مانا أشرت قبل كدا في الموضوع دا, تقرأ أكتر من المشاركات دي يمكن تفيدك أو تفهمك وجهة نظري,,
http://www.nilemotors.net/Nile/375062-a.html
وأنت حر طبعا تنزل زيتك علي 1000 كيلو أو 100.000 كيلو.

تحياتي ليك.