الموضوع: لكل من يقارن الانسر 2007-2008 بالالنترا 2007-2008

ياجماعة للى بيقارن الانسر 2007-2008 الشكل القديم بالالنترا 2007-2008 الحمدلله انا من ملاك الالنترا و برضة ركبت الانسر وقارنت بينهم . الالنترا تتفوق ع الانسر فى عدة نقاط اهمها :

# الثبــــــــات : فى الالنترا اعلى بكتيييير من الانسر السبورت وغير كدا مع ان العفشة سبورت برضة بس انعم من عفشة الانسر انا كنت بدخل بيها ملفات مصر اسكندرية الصحراوى على 130-140 والله العظيم واللى كانوا معايا نايمين ولا حاسين بحاجة علما بان السرعة القصوى اللى جبتها بيها هى 180 وفاتح التكييف والعربية راكب فيها 4 ولسة فيها كتييييرر ولا عزاء للانسر بعد 160 ( انا بتكلم ع الستاندرد مفيش حد يجى يكون مجنط او مغير عفشة ويقولى ياعم دية قنبلة فى الثبات اكرر انا بتكلم ع الستاندرد فى الاتنين )

# الأدااااااء : السحـب والتسارع للالنترا اكتر بكتييييييييير برضة من الانسر علما بان تسارع الالنترا من صفر الى 100 كيلو فى 10.6 ثانية يعنى انا مشوفتش عربية فى الفئة دية اسرع من كدا خصوصا الانسر الشارك الجديدة انا سمعت واكرر انا سمعت انها فى 12 ثانية بالنسبة للمانيوال ودة دليل موقع ويكيبيديا :

Hyundai Elantra 2008 performance
1.6L DOHC engine 121 hp 0-62 mph: 10.6 sec., top speed: 118 mph (190 km/h) MT.
http://en.wikipedia.org/wiki/Hyundai_Elantra

#الامـــــــــــــــان : اللى بيقول متانة الصاج هعمل اية بمتانة الصاج ع السرعات العالية فى الحوادث الجامدة لاقدر الله كلو بيتعجن الاولى اننا نقول الامان وقدرة العربية انها تطلع اللى جواها سليم باذن الله فى المواقف دية ودية برضة بتتميز بيها الالنترا واخدة فى اختبار الحوادث EURO NCAP خمس نجوم للتصادم الامامى و 4 نجوم للتصادم الجانبى فى حين ان الانسر واخدة 4 نجوم لتصادم الامامى و نجمتين للتصادم الجانبى بتقييم poor ودية الفيديوهات من يوتيوب بتاعه crash test

لانسر تصادم امامى http://www.youtube.com/watch?v=QAGBbrb4JS0
لانسر تصادم جانبى http://www.youtube.com/watch?v=6G3wsgLTK-Q
النترا تصادم امامى http://www.youtube.com/watch?v=KnY9JSg-VQM
النترا تصادم جانبى http://www.youtube.com/watch?v=97TdFiY3mjk

# الشـــكل الذى لايختلف عليه اثنين الالنترا كشكل خارجى وفخامة الصالون الداخليه الى بيعتبر من اريح واوسع الصالونات فى فئتة هو والكورولا الشكل السابق للشكل الحالى . والتابلوه والعدادات المريحة للاعصاب والشنطة الاوسع فى فئتها عن الانسر .

# المـــوتور اللى برضة بيتميز عن الانسر بانة تكنولوجيا اعلى و صوت اهدا بكتييرررررر وتسارع جبار لكن بصراحة مش موفر فى البنزين ودية نقطة من عيوب الانترا انها مش موفرة فى البنزين فى حاله الشد والحرق عليها لكن فى السواقة الهادية بنت حلال
انا عارف اية اللى هيقوله اصحاب الانسر هيسيبو كل حاجة ويقولولى الاعتمادية والعمر الافتراضى ياجماعة معاكم ان الانسر معمرة بس انتوا شفتوا الالنترا هتبقى معمرة ولا لا العربية لسة جديدة طيب ماهى من سنة 2007 شغاله كويس وفى الشارع وهما ماشيين متعرفش تفرق موديلات 2007 من 2008 من 2009 حتى وبرضة نرجع نقول العربية لسة جديدة علشان نحكم انهى معمر اكتر ...

# الفرامـــــــل : وماأدراك مافرامل الالنترا بشهادة كل اللى ركبوا العربية الفرامل حساسة اوى وبتمسك كويس لدرجة انى بخاف ان التيل والكاوتش يتاكل بسرعة واللى مش متعود عليها هيتنرفز اوى منها عقبال مايتعود عليها .

انا اهو ياجماعة جايبلكم كل الكلام بخبرات شخضية عن تجربة للعربيتين و معلومات من مواقع موثوقة جدا جدا يعنى لا يوجد اى مجال للفتى واللى هيقاوحنى بقى من اى مالك من ملاك الانسر ميكلمنيش الا لو كان ركب الالنترا زى مانا ركبت الانسر ساعتها نقدر نتكلم مع بعض واللى هيهاجمنى بقى زنبو على جنبو اهوه بقى ههههههههههه واللهم انى صايم برضة زيادة امان :D

والله يا dynamic alpha انا مجرد ببين نقاط تفوق الالنترا على الانسر بس والله فعلا مش متحيز على الرغم ان الناس هيقولوا انى بدافع عليها علشان عربيتى لكن العكس والله انا العربية عامل بيها 7 الاف كيلو لحد دلوقتى ومفيش عيب واجهنى الا استهلاك البنزين من بعد صيانه ال 5 الاف سحب العربية بقى احسن والتكييف بقى احسن لكن البنزين بقى بيسحب جدااااااااااا خراب بيوت لسة هروحلهم تانى بيها وفعلا مافيش عربيات جديدة صاجها كويس لانهم بيهتموا بتشتييت الصدمة عن الكابينة وليس الحفاظ على مظهر العربية بعد الحادثة