ياه انت جاي على الجرح فعلا .. أنا لما بحاول أعمل كدة باخد الى فيه النصيب من تزنيق وألفاظ وقلة أدب ... فبطلت .. واقتنعت إن دي من الحاجات اللى مش هاينفع أعملها لوحدي لازم يكون فيها انضباط عام ... ده لوكان رجال الانضباط أساسا فاهمينها
بس المشكلة لها شقين كبار قوي
الشق الاول ... زي مانت قلت الآخلاق والإلتزام النابع من داخل الشخص رقم واحد .. ودي قدامنا كتير قوي عقبال ما نوصلها لأن سياسة العقاب على الخطأ في مصر منعدمة من الأساس ... ولكن العقاب في مصر بيكون بالمزاج أو بالصدفة وليس بالقانون ... يعني واحد أخطأ لكن السلطة ما لهاش مزاج تعاقبه يبقى عادي مافيش مشكلة مش هايتعاقب .. واحد تاني أخطأ لكن عشان مافيش جهاز رقابي محترم يقوم بضبطه يبقى مش هايتمسك غير بالصدفة
وده يوصلنا للشق التاني .. وهي الحكومة نفسها .. وللأسف هما من الشعب والشعب منهم .. يعني جهل في جهل ... تعمل إيه لما تلاقي الإشارة راكبة في التقاطع غلط .. يعني هما مركبين الإشارة ومشغلنها كمان بس مركبينها غلط وبطريقة تفقدها الجدوى من تركيبها ... يعني يبقى في تقاطع على مرحلتين أو ثلات مراحل تلاقيه ركب الإشارة في المرحلة الأولى وطظ في الباقي .. طب الراجل اللى جاي داخل من نص التقاطع يعرف منين إذا كانت الإشارة حمراء ولا خضراء وهو ماعندوش إشارة قدامه في نص التقاطع (يركن وينزل يروح يبص عليها ويرجع يعني) ... يعني حتى اللى عايز يلتزم مش هايعرف
لو حاولت تمشي في حارة معينة وتلتزم بيها وتلاقيها هي فجأة خلْيت بيك زي الحارة أقصى الشمال أو أقصى اليمين مثلا وفجأة تلاقيها دخلت في الرصيف أو السور الفاصل ... المفروض بقى أدخل أنا كمان معاها في السور أو الرصيف ولا أزنق على اللى جنبي فجأة عشان أفادي السور أو الرصيف ... المنطقي بيكون في رسم تخطيطي قبلها بمسافة بحيث الحارتين يدخلوا في بعض بإسلوب تدريجي عشان قائد السيارة يلحق يدي إشارة ويغير حارته اللى هاتختفي ..
الكلام ده أصلا لو كانت الحارات مرسومة على الطريق بشكل واضح ومضبوط .. دا انت ساعات تبقى ماشي على حزمة من الخطوط وكل خط المفروض إنه فاصل بين حارة وحارة .. لكن اللى رسم ما كانش فاهم المعلومة دي برغم إنه المفروض شغال تحت إشراف مهندس ... وسعات تلاقي الحارة بقت واسعة قوي تاخد معاك عربية نقل وساعات تلاقيها ضيقة قوي لدرجة إن عربيتك طالعة براها من الناحيتين
على طريق المشير طنطاوي اللى الجيش لسة عاملة من كام شهر ... كانوا عاملين اليوترن للي عايز يلف ويرجع غلط بدون أي حارة جديدة مؤقتى للي عايز يلف عشان يخرج من الطريق ويهدي سرعته قبل ما يلف ... وفجأة إكتشفوا إنهم كانوا غلطانين فرجعوا يخططوا الطريق تاني من أول وجديد ... طب امسح التخطيط القديم اللى انت كنت عامله ... لأ ليه .. فضل سايبه والنتيجة إن يا إما هاتلتزم بالحارات الجديدة اللى اترسمت عشان ما تخبطش في الرصيف اللى هاييجي قدامك في الملف لو انت ماشي في الحارة الشمال خالص وطبعا هاتزنق على البشر اللى وراك وملتزمين بالتخطيط القديم اللى لسة قدامهم (ومش غلطانين طبعا) لأن ما حدش هايعرف القديم من الجديد إلا اللى بيمشي في الحتة دي كل يوم .. يا إما العكس ... يا إما بقى وده الحل الثالث وهو أنك تمشي زي بقية المصريين من غير إلتزام بالحارات وخلاص
بجد آسف على الإطالة .. بس إنت اللى ابتديت كلام في الموضوع ده ... وأنا أساسا معبي وما قلتش حتى كل اللى جوايا
يعني شوف الناس ياأخي ... حارة جديدة تماما أنشئت على الشمال عشان اللى عايز يدخل شمال وبرغم كدة طالما هما مش داخلين شمال ما حدش فكر مجرد التفكير إنه يدخل فيها ده حتى الموتوسيكلات واقفين طابور جوة الخط بتاع الحارة بتاعتهم ... - برغم إن الوقفة دي غلط برضه على فكرة هم المفروض يقفوا ورا العربية اللى قدامهم مش جنبها - ... يعني كل موتوسيكل وبحد أقصى أثنين ياخدوا مكان عربية كاملة ... ده في معظم قوانين المرور بتاعة أي بلد ... لكن طبعا مش واضح البلد دي قانونها شكله إيه
يا باشا ..... مصر غير ... أحنا مختلفين و متخلفين ...
المفضلات