الموضوع: الاخبار المؤكدة... الفئة الثالثة لاوكتافيا a7 من الوكيل

المشاركة الأصلية كتبت بواسطة hanipal

أنا كمان بعت الفانتازيا وبقالي شهر دايخ ورا ال a7
وبعد ما شفت اللي منزلها الوكيل. بصراحه حرام عليهم. مفضيها من كل مميزتها الجبارة. حتى ال drive modes الاربعه شالها وخلى بس ال sport. شال كل عوامل الامان وعمل زي كيا وغبور يحطولك كيسين ايرباك وشكرا، شال المالتي وشال عفشة المالتي . يعني بقى كل علاقتك بال a7 انه شكلها من بره للي هيبص علىك وانتا سايق هوا نفس الشكل . فقط لا غير ، لكن سيادتك في الحقيقة سايق عربيه تانيه خالص غير اللي سكودا حبيت تعملها !!
قلت الخليجي هوا الحل . ورحت الهث وراء المعارض سعيا لمعلومة تديني الامل اني اركب العربيه اللي بحبها. بقوة بيلعبو بيا كورة سواء في السعر او المواصفات ومافيش حد عنده كلام ثقة. وزاد اليأس جوايا من العربية.
كنت بسد ودنيا عن البيجو 508. وبردد نفس الكلام .
بيجو فاشله في مصر
قطع الغيار نار
مش هعرف ابعها
وكلام كتير كل ما كنت افتكره أقول لنفسي... بيجو لالالا،

لحد ما ركبت العربيه بنفسي بالصدفه. كنت في التجمع وقابلت أحد الاصدقاء . واصر يوصلني ،رغم ان بيتي قريب ، وبصراحه ماعرفش عربيته ايه . سألني فين عربيتك وايه اللي حصل . قلتله بعتها وكنت هجيب ال a7 . قاللي وماجبتهاش ليه. قلتله الوكيل بوظها وسدها في وشي.
المهم قربت قربت من عربيته لقيتها هيه. البيجو . ال 508.
عملت نفسي مش مهتم . كان شكلها جديده . صاحبي كمان كان لسه مغير وجايبها.
كانت اول فئه ، بمجرد ما فتحت الباب، ماصدقتش، لقيته تقيييل. اتقل من الفانتازيت، أنا لسه أيدي واخده على فتحت باب الفانتازيا،
قلت طز.. ايه يعني باب تقيل . (بس أنا بحب الباب يبقى تقيل ، بغض النظر ده صح ولا ﻷ). بس مش دي القضيه. المهم قعدت في الكرسي. وتاني اتفاجأت. الكرسي غااااااص بيه، احتواني، كان جلد على قماش . وكان مرييييييييح اكتراث من طليقتي الفانتازيا.
قلت في سري برضو طز. كرسي ايه وكلام فاضي ايه . في داهيه .
رميت عيني على التابلوه والعدادات.....ايه الجمال ده، الجمال اللي ماحدش يقدر ينكره . الطاره قطعه فنيه ، حتى لو طارة ال a7 نزلوها بمليون مالتي فنكشن. بس طارة البيجو فعلا تحفه وابداع.
قلت برضو كل ده مش مهم. المهم العربيه ، (على أساس اللي فات كان بره العربيه !).
طلع بالعربيه، وقعد يكلمني في حاجات وأنا ولا أنا هنا، أنا مركز مع البتاعه اللي سايقها، عايز أعرف ميتها ايه.
الطلعه رهيبه، فعلا رهيبه، فكرتني بطلعت بي ام 530. بس برضو قلت لنفسي ال a7 طلعت جبارة .
عدا ال 80 كم سرعه، وأنا مش سامع أي حاجه، قلت مش ممكن العزل للدرجة دي، فتحت الشباك لقيت صوت الهوا بره زي الرعد!!.
قلت برضو طز. ال a7 اكيد عزلها مش هيقل عن كده .
جينا على مطب وبعده حته مكسره شويه، البيجو خدت المطب بسرعه، قمة العزل والتماسك، وبعدين الحته المكسرة ، حسبت العفشة طريه ، فعلا طرية ، عكس ما كنت متوقع،
قلتله اركن، قاللي خير، قلتله بس اركن، ركن.... ونزلت ورحت عند الشنطة وبصيت تحت،،،، العفشة الخلفية مالتي لينك فعل، سالته العربيه معاك ثابته، ا
قاللي زي الزلطه،
قلتله ممكن أكمل أنا سواقه بعد اذنك، قالي زي ما تحب،
صاحبي حس انه اد ايه اهتمامي بالعربيه ، وكانت تجربة قياده رائعه، بقيت اسأله هوا ليه توكيلتنا المحترمه ماتعملناش درايف تيست زي الناس، على الأقل الواحد يحسم قرار شراءه.
بعد مانزلت طلبت منه يفتح الشنطه. لقيتها مش بكبر ووسع الفانتازيا. لكن اقدر أقول ان شنطتها برضو واسعه وتشيل .
سألته اخيرا ايه أخبار الصيانه والتزكيل، قاللي أنا عامل 15 ألف كم، والصيانه عاديه جدا ، وفرع صلاح سالم في اللذيذ،
من ساعة ماسبته زانا دماغي هتنفجر،
لحد ما حسمت امري وحجزتها.....
وداعا يا سكودا يا حبي.

اولا اسمحلي احييك علي اسلوبك القصصي الرائع
ثانيا شكلنا كلنا رايحيين بيجو 508

منك لله يا ارتوك اوتو


تحياتي