صديقي المواطن
ثق وإعتقد حطيت إجابة مطولة لموضوعك ورفعتها مرتين بس النت غدر بيا وتعبت من الموضوع ده ولكن الخلاصة صدقني ورغم كراهيتي لزيوت وولف فالعيب عندك ليس بسبب الزيت وإنما ظروف تشغيل وهلاك عادي ودرجة حرارة مرتفعة نسبيا وعلو لفات اﻵر بي إم لفترات طويلة ولو حللت الزيت مهما حللت ومهما جبت من أسطوات فصدقني العيب مش زيت ومهما كان.وولف غير كفوء فهو قطعا أفضل من موبيل والتعاون ولو مش مقتنع بالكلام أحاول للمرة الثالثة أرفع الموضوع ده بس لما أستريح شوية.
ولكن أنا عارف إنك بتحب اﻹلحاح وإنك إنضريت وصرفت فلوس ولكن صدقني حتى لو تجاوبنا معك زورا وبهتانا وقلنالك الموضوع موضوع زيت فإيه اللي حيفرق عندك هل متخيل إن حد حيعوضك ويصلحلك موتورك مثلا أو مجرد تثبت إنهم غشوك وحطولك زيت بواقي مطعم فول وطعمية في عربيتك فجابت مكنة
صديقي المواطن لازم.تكون سمح وتتعود تصبر وتكظم.الغيظ على ما إبتلاك الله به وأساسا موضوعك بسيط رنجات إتكسرت عادي وبتحصل كتير ولا داعي لشراء مكنة إستيراد كنت عملت بتاغتك وكمان معروف إن أي مكنة إستيراد الله أعلم قعدت أد إيه وساعتها كان حالتها إيه قبل متنزل من عربية تانية ومعروف إن مكن اﻹستيراد إن عاجلا أو آجلا خلال من 6 شهور إلى سنة ونص لو ركب من غير ميتعمل نص عمرة فتأكد إنك حتفتح تاني لعمل نص عمرة
ونصيحة.يا مواطن زود عدد المراوح عندك لو لقيت مكان فاضي وحط ثرموستات ثمانينات وبلاش التسعينات ورب العة أنا عندي عربية فيها مروحة كلتش فبريكة ومش بتسخن رحت مركبلها 3 مراوح كهربائية إضافية وخد عندك كل مروحة بكتاوت وتأسيس مستقل لوحده وركبتهم على ثرموستات سبعينات ثمانينات وبمشي 220 مستريح وعايش اللحظة

الحالة الوحيدة اللي ممكن يكون التزييت سبب فيها هي إن فلتر طرمبة الزيت المصفى ممكن يكون إتسد أو شبه إتسد فأساء لدورة التزييت داخل المحرك

ثم يا صديقي المواطن عربيات محرك 1600 ليست مصممة للطرق السريعة لمسافات طويلة بسرعات فائقة فهي سيارة مدن وممكن.تسافر مسافات طويلة بس 140 بحد أقصى أما تجيب عداد ال آر بي إم على 5 آلاف لمسافات طويلة ويا دوبك جايبة 160 فعلى طول تعرف إن فتيسك أصغر من العربية دي سواء كان أوتوماتيك أو مانوال والقصة دي تعلمناها من الشبح فعربياتنا العادية معظمها آر بي إم 3 تساوي 120 أما في الشبح 3 تساوي 160 وكاديلاك أمريكي 3 تساوي 140:فلو عاوز مكنتك تستحمل ال 180 و 200 لازم تكبر الفتيس و إحنه بنعمل كده في كل عربية مجهزة لطرق سفر طويلة وسرعات عالية

ثم يا وطني مهما كان.الزيت غالي فمعادش ينفع يتحط لوحده لازم تحط معاه إضافات حديثة من 4 أو 5 إضافات ثق بالله أنا غيار الزيت عندي بيعدي 850 جنيه بس بغير على 20 ألف بس بغير الفلتر كل 10 آلاف

صديقي المواطن أنا عارف إن دمك محروق وصرفت كتير بس إنت شايف الموضوع كبير ﻷنك مش متعود عليه وطالع رحلة وضاعت وأنا شايف موضوعك بسيط ومش مستاهل كله طقم رنجات متكسر أصعب ما في موضوعك هو حساب الونش والجلوس وإنتظاره ومجرد نصيحة الميكانيكي إنك تجيب إستيراد فده ميكانيكي متواضع وصنعته ضعيفه ومن جماعة كلام كتير وكفتة مفيش

كان نفسي أقللك زيت وأريحك ومنردش عليك ولكن الحق أحق أن.يتبع ومن دلوأتي وقصاد كل المنتدى وجيب 10 ميكانيكية لو 3 منهم قالوا عيب زيت فأنا مسؤول بغيار زيت من خلطتي الخاصة ومعلش أخوك.بيكلمك عمر وغير في حياته أكثر من 150 مكنة لنقل لميكروباص لملاكي ولكوري وياباني وأمريكي وألماني وبنزين وسولار وداخل مصر وخارج مصر مش بإيدي طبعا لكن تحت نظري وإشرافي
مرة.أخرى.نؤكد ونقول وكل المنتدى عارف إني بكره زيت وولف وإدارة.وولف كمان بتكرهني ولكن الحق أحق أن بتبع والعيب عندك مش زيت
وأنا.عارفك يا مواطن من زمن أظن كان.ليك موضوع قديم لنفس المشكلة.مش حتقتنع بالكلام وحكون.تعبت نفسي عالفاضي ولكني متعاطف معك ومحروق دمي عليك وأسأل الله لك أن.بعوضك أضعاف ما خسرت
ودمتم.للنضال