كل حاجة باظت في البومه رجاء المساعدة

**aymenhanafy82** · 02-10-2013 07:31 PM

عربيتي لانسر بومه 2008 1600 عاملة 190 الف كيلو
بدأت المشاكل عند الاحساس بضعف سحب العربية ، حطيت fuel system cleaner بس مجبش نتيجة

وفجأه بعدها بإسبوع وانا في مشوار راجع من مطار برج العرب في الاسكندرية ومعدي علي لجنة العربية كلبشت ولقيت العربية بطلع دخان ومؤشر الحرارة في السما فتحت الكابوت لقيت الردياتير اتشرخ ومطلع طحينة علي الموتور سبتها تبرد سنه وزودت مياه في الاربه لكن مش بتدور
المهم نقلتها علي ونش للميكانيكي قالي ده جوان وش السلندر وحنغير غالبا خزنة الردياتير
المهم سبته يوم وروحت وخدتها تاني يوم قالي يدوبك مسحنا الوش في المخرطة وغيرنا الخزنة والجوان وزودت زيت الفتيس وحط مياه عادية في الردياتير للتجربةوأخد 500 جنيه كل حاجة
المهم كان صوتها عالي سنه والRPM مش مظبط قالي ده حساس البنزين عايز مشوار كبير علشان يتظبط
سافرت ولما وصلت هناك برده كان سحبها وحش والRPM متظبطش

جيت اخرج بيها تاني يوم كان صوتها اعلي بكتير خرجت مشوار صغير ورجعت وكانت تقريبا بتعدي ال40 بالغافية
وسيبتها لمراتي تروح بيها مشواير صغيرة لأني سأالت التوكيل في التليفون قالي وش السلندر متعملش كويس وحيتعمل تاني بحوالي 4000 جنيه

دورت هنا في المنتدي وعرفت ان الميه ممكن تكون دخلت علي الزيت وفعلا بصيت علي مقياس زيت المتور لقيت الزيت اسود وخفيف جدا مع انه بقاله 4000 كم بس بصيت علي زيت الفتيس لقيته فوق النسبة المحدده بكتير جدا وعبارة عن مايه

فسؤالي هنا هل الفتيس كده شيع ولا لأ علشان العربية مشت كده كذا يوم و ايه السبب في كده لان الميكانيكي قالي انه تمم علي الزيوت وزود زيت الموتور والفتيس وكله تمام
المفروض دلوقتي اعمل ايه التوكيل حيدخلني في مصاريف مش قدها (4000 من غير حوار الفتيس والردياتر الجديد) ومش عايز اروح بيها لاي لميكانيكي يبوظها اكتر وهل ينفع امشي بيها بوضعها الحالي للميكانيكي ولا لازم ونش

ملحوظه للافادة
انا بطلت اروح التوكيل بعد 50 الف ومغيرتش زيت الفتيس غير عند 137 الف بس ومكنتش فاهم فغيرته بموبيل atf 320 عند الميكانيكي وعرفت بعد كده انه مش صح والعربية نتشت بعد كده حبه وبعدين ظبطت
غير كده كنت بشتري الحاجة من التوكيل وغيرتها في مواعيدها ومش عارف ايه اللي كان السبب في وش السلندر من الاصل
وكمان مكنتش بغير مياه الردياتير بعد ال40 الف كنت بس بزودها بمياه موبيل الخضراء

**aymenhanafy82** · 02-10-2013 07:35 PM

وياريت لو تعرفوا ميكانيكي بيفهم في الانسر غير الشرقاوي

**m.elsherif** · 02-10-2013 08:06 PM

كل الناس هنا هتقولك روح ورشة المتخصصون اللى فى الاميريه

**delaga** · 02-10-2013 09:02 PM

المشاركة الأصلية كتبت بواسطة m.elsherif

كل الناس هنا هتقولك روح ورشة المتخصصون اللى فى الاميريه

فعلا بس هما بعيد عليه لو هو من الاسكندرية

**M.Al-Hefnawy** · 02-10-2013 09:47 PM

حضرتك ما قولتش، غيرت زيت الموتور ولا لأ؟ طالما زيت الموتور اختلط بالميه وبقى طحينة لازم يتغير بزيت الف كم وتمشي بيه 500 كم وتنزله عشان يكون أخد الرواسب والاوساخ. وبعد كده تغير الفلتر وتحط الزيت اللي انت ماشي عليه.

**MITSUKERO** · 03-10-2013 09:39 AM

مفيش حل غير التوكيل او المتخصصون

هم الوحيدين اللي هيضبطولك العربية

**aymenhanafy82** · 03-10-2013 11:56 AM

طيب السؤال هنا لازم اوديها بونش ولا ينفع امشي بيها علي وضعها

وانا من سكان مدينة 6 اكتوبر ومعرفش ازاي اروح الاميرية لاني اصلا من الاسكندرية ومعرفش الطرق في القاهرة كويس وهل الورشة دي ارخص من التوكيل وبتستخدم قطع غيار اصلية ولا لأ

وهل حد عنده فكره كده الفتيس شيع ولا للأ

**aymenhanafy82** · 03-10-2013 11:57 AM

المشاركة الأصلية كتبت بواسطة m.al-hefnawy

حضرتك ما قولتش، غيرت زيت الموتور ولا لأ؟ طالما زيت الموتور اختلط بالميه وبقى طحينة لازم يتغير بزيت الف كم وتمشي بيه 500 كم وتنزله عشان يكون أخد الرواسب والاوساخ. وبعد كده تغير الفلتر وتحط الزيت اللي انت ماشي عليه.

لأ مغيرتش حاجة من ساعتها والعربية تحت البيت

**SAMEH_FOUAD** · 03-10-2013 12:44 PM

مبدأيا كدة عشان تبقى عارف اى جوان وش سلندر بيتعمل لازم تعمل الاتى بعد تغيرة :

1- مافيش حرق على العربية لمدة اسبوع او 500 كم

2- تروح للميكانيكى اللى عملك الجوان , لازم يعيدلك تانى الرباط على مسامير الجوان عشان مع الحرارة بتريح شوية

3- طالما الجوان ضرب من ناحية الزيت ( يعنى كدة اصبح فية اختلاط ماء بزيت ) يبقى لازم تعمل الاتى:

1- كارتيرة الزيت تتفك وتتنظف + تغير فلتر الزيت والزيت بأخر اقل من الزيت اللى انت بتحطة( حط شيل الاصفغر مثلا) عشان هيكون نظافة للمحرك وهينزل على فترة قريبة لا تتعدى ال1000 كيلو

- لازم يتم تنظيف الريدياتير كويس جدااا وقربة المياة

- بالنسبة للفتيس هتنزل زيت الفتيس وهتحط atf 220 بدل من 320 وهينزل بعد 500 كم , وبعد كدة تحط ال320 عادى بس هتنزلة بعد فترة اقل من المعتاد ب5000 كيلو

دة بالنسبة للجوان طالما ضرب من ناحية الزيت , لازم الحاجات دية تتعمل وفورا عشان متأثرش على المحرك