الموضوع: بفضل الله اشتريت كارينز 2014 الجديدة كليا وتقرير

المشاركة الأصلية كتبت بواسطة papafouda

بسم الله الرحمن الرحيم
ـــــــــــــــــــــــــ ـــــــــــــــ
بداية اشكر حضرتك عن التقرير الممتاز اللى كتبته .
ثانى حاجة بفضل الله ربنا انعم على انا ايضاً بسيارة كيا كارينز 7 ركاب، وقد اشتريتها قبل العيد الصغير بأسبوع وعملت بيها مشوار للساحل الشمالى ثم مشوار الى مدينتى بيلا-كفر الشيخ ثم العودة للقاهره. وعن تجربة شخصية اقول أن الكيا كارينز هى السيارة رقم ثلاثة فى حياتى .. الاولى كانت فورد كونتور والثانية كانت اوبل زافيرا والسيارتان الاولى كانت بأمريكا والثانية كانت فى سويسرا. كما أنها السيارة الاولى التى اقوم بشراؤها فى حياتى بمصـــر.
بشهادة بناتى فإن الكيا الكارينز " أوسع " من الاوبل الزافيرا - وانا متفق مع حضرتك فى كل التفاصيل الدقيقة والجميلة التى كتبتها عن الكيا كارينز، وتقريباً شراء السيارة لم يستغرق منى وقت كبير وذلك اسعد مندوب المبيعات فى المعرض الذى قمت بشراء السيارة منه كثيراً وقال لى ان حضرتك جاى وعارف طلبك ودة وفر على كلينا وقت كبير ..
وقمت بشراء السيارة فبل التخفيض المعمول به حالياً والحمد لله اشعر بالرضا للمبلغ الذى تم دفعه لأنها تستحقه.
اتجاهى لشراء الكيا كارينز كان بسبب اهم ميزة من وجهة نظرى فيها وهى انها تتسع لـ 7 ركاب واسرتى تحتاج لسيارة من هذا النوع.
لى فقط ملحوظتان بسيطتان وأعتقد انها لن تقلل من إحترامى لهذه السيارة التى تجمع بين العائلية والرياضية فى آن واحد.
الاولى : ان التكييف بيكون أقل برودة فى اوقات النهار.
الثانية: ان الشنطة صغيرة ومكان التخزين بها مع وجود الكنبة الثالثة لا يتسع الا لبعض الاكياس البسيطة.
وبمناسبة هذا الموضوع الجميل ( بارك الله فيكم وأكثر من أمثالكم ) لى بعض الاستفسارات وكنت عاوز آآخذ رأى حضرتك والسادة اعضاء هذا المنتدى الجميل:
1- ماهى افضل شركة تأمين من وجهة نظركم وبماذا تنصحونى، حيث اننى ساقابل أحدى مندوبات شركة تأمين فى وسط البلد وعاوز اتكلم معاها وتشعر اننى فاهم.
2- ما رأيكم دام فضلكم فى ان اقوم بعمل فرش لها جلد محترم للحفاظ على الفرش الاصلى حيث أننى امنع شرب الماء فيها حفاظاً عليها وأولادى عاوزين يأزأزوا أو يشربوا فيها طول الوقت، وماهو المكان اللى ممكن الجأ اليه فى مسالة الفرش دى ويكونوا ناس ولاد حلال وقلبهم كبير.
3-نظراً لأن مساحة التخزين الخلفية كما سبق وذكرت صغيرة فما رأيكم فى تركيب شبكة فوق سقف السيارة وبرضه منين اشترى هذه الشبكة بحيث انها ما تلخبطش شكل العربية.
4-اسمع ان بعض اصحاب السيارات يقومون بتجليدها فى محلات وورش بمصر الجديدة خوفاً عليها من الخدش والخربشة فهل هذه المسالة مجدية.
5- الاحظ بعض اصحاب السيارات يركبون اكصدامات ومصدات ونواكل ستنلستيل أو حديد مطلى كروم فى الامام وفى الخلف للحماية، فهل هذا الاسلوب يقوم بحماية السيارة فعلاً وما هى افضل الاماكن لشراء مثل هذه النواكل. وانا شخصياً شايف انها هاتكون بلدى شوية وستعطى شكل سىء للسيارة وتخفى بعض من جمالها وتضيع منها الانسيابية.
وأخيراً فأننى أعتذر عن الإطالة والف شكر

الف الف مبروك وعلي فكرة انا قبل ماشتريكنت كلمتك علشان اخد رايك فيها وبالذات موضوع المطبات وكان لرايك وامانتك في توصيل المعلومة عامل كبير في الاختيار وخصوصا من واحد كان يملك اوبل زافيرا

بالنسبة لملاحظات حضرتك انا هاقولك انا عملت اية

التكييف : انا فارق معايا اوي موضوع الفيمية الخلفي وعملت فيمية للزجاج الجانبي بس لازم تختار درجة اقل من اللي انا حاططها لانها بالليل مش مريحة ودة اللي هاعملة
دة تاثييرة بينعكس علي اداء التكييف وسرعة تبريدة لدرجة لن تتخيلها

مساحة التخزين:
اعتقد مافيش سيارة تستوعب 7 كراسي وهايكون لسة فيها مساحة تخزيين خلفية والا هاتبقي ضخمةوطويلة ولعلم حضرتك من اميز الحاجات في الكارينز انها من برة مش ضخمة ومن جوة واخدة العدد بارتياح دة ممكن تلاقية فقط في التاون اند كانتري
فية اختيار ممكن يريحك انك تطوي كرسي من الخلفي و شوف المساحة الموجودة هاتبقي واسعة اد اية دة طبعا في حالة ان عدد الركاب 6 اما لو سبعة ومعاك شنط فلا غني عن حل فوق السقف بس انا مش عارف ممكن يكون اية انا ماعنديش خبرة في الناحية دي لو حد يفيدنا يبي كتر خيرة بس يكون شكل حلو

التجليد
انا بصراحة لا اميل لية اعتقد التكلفة هاتكون عاليةجدا "هاتكون رقم معدي 8000 جنية" في حالة الخامات النضيفة ولو استرخصت يبقي هاتهدل العربيةمش هاتحافظ عليها

الفرش الجلد والارضية
انا كمان عاوز اعمل كدة انا من خلال المنتدي اعرف ان جينز كار افضلهم بس اغلاهم فية موضوع عنة في المنتدي

بالنسبة للصدادات الامامية والخلفية والجانبية اتمني ان يكون فية حاجة بسيطة وعملية ولا تلفت الانتباة عاوزيين نصيحة

اما بالنسبة للتامين
انا مامن عند aig بس دة من نصيحة المعرض اما فعليا ماعرفش افضلهم
الف مبروك

اشكرك يافندم بشدة بس ليا استفسار العربية فيها رووف راك هل بتتباع عوارض في النص لوحدها مثلا والاقي الكلام دة عند مين

عاجز عن الشكر يافندم جزاك الله خيرا

انا باشكر جدا لكل من اهتم و حط رد علي الموضوع اكرمكم الله بافضل الاختيارات وجزاكم الله خيرا علي امنياتكم الطيبة