الموضوع: التقفيل الصينى و لا التقفيل المصرى ايهما افضل

المشاركة الأصلية كتبت بواسطة samy_laf

معلش يأستاذ باسم انا اعتذرت مرتين عي التأخير وده الإعتذار الثالث بس فعلا سبب التأخير ظروف العمل وانت مسكني شد بسبب التأخير وكمان كنت عايز أوضح صورة هي أني أول مرة في حياتي أركب سيارة حديثة حيث انني ولمدة 3 سنوات كنت لا أقود إلا اللادا لذلك أعذرني إن كان التقرير غير جيد
اولاً بالنسبة للماتور :
1 - السحب ليس به مشكلة إطلاقا . ( عزم الماتور جيد في rpm المنخفض والعالي وإن كان صوت الماتور بيعلي جامد في rpm العالي وذلك عن 2500 لفة مما يجبرني علي نقل الحركة بسرعة وعدم الإنتظار حتي الوصول لـ rpm عالي 3000 وذلك ملاحظ في كل الغيارات عدا الخامس فمثلا عند 2500 لفة وعند الغيار الرابع سرعة السيارة تكون 80 ويجب حين ذاك نقل الحركة وفي الغيار الخامس عند سرعة 2000 لفة تكون سرعة السيارة 80 وعند 3000 لفة تكون 110 وعند 4000 لفة تكون 140
2 - التسارع جيد حيث قد قمت بحساب وقت وصول السيارة من السرعة 0 : 100 وتبين أنه 25 ث مع العلم أن قيادتي ليست رياضية ولا أعرف معدل السحب هذا جيد أم لا . ( أن مجربتش تاني أقيسها بس فعلا قيادتي هادية تمام )

3 - معدل إستهلاك البنزين ( تم إستهلاك 42 للتر بنزين لمسافة 490 كم وتتروح سعرة السيارة في هذه المسافة 200 كم بسرعة 40 كم / س و 200 كم بسرعة 80 كم / س و 50 كم بسرعة 60 كم / س وبمتوسط إستهلاك 1 لتر / 11.5 كم ) ( أقصي سرعة 140 بس بتنزل لـ 60 في بعض الأحيان وهذا الإستهلاك في مزيج من الطرق المحور والزراعي وزحمة دائري مسطرد والمرج والسلام
ثانيا : بانسبة لناقل الحركة
لا توجد به أي مشاكل إطلاقا وليس به عضة أو رنة تماما
ثالثا بالنسبة للتكييف
اداءه ضعيف مع سرعة الماتور المنخفضة وجيد جدا مع سرعة الماتور العالية ( وهذا الأداء الضعيف نسبيا يشعرني بجو لطيف نسبيا أو بمعني درجة الحرارة تقارب 22:25 مثلا ودرجة حرارة التحكم في البرودة ليست القصوي ولكن المنتصف )
رابعا إرتفاع السيارة من الأرض
السيارة مرتفعة مع حمل 4 أشخاص وأكثر من ذلك سوف يتم ملاحظة إنخفاض السيارة ( فمثلا السيارة كانت محمله بعدد 5 شخص + 5 طفل والشنطة ممتلئة بأغراض مختلفة وتقدر اوزان حمولة السيارة بــ 450 ك فلاحظت إنخفاض السيارة وبدأت اخذت المطبات بالعرض بعد أول مطب وسمعي صوت حكة جامدة بالأسفل )
خامسا التقفيل :
التقفيل الصيني جيد وإن وجدت ملاحظات يتم تدركها في الصيانة ( مثلا رزع الشنطة عند الإغلاق - تربيط العفشة - ضبط فرملة اليد ) وهذه الملاحظات التي كانت عندي وتم ضبطها في صيانة الألف
وسوف أرفع صوت للماتور بإذن الله
ولو عيزني أقدم الإعتذار الرابع انا موافق

يا سيدي مفيش اعتذار ولا حاجة بين الأخوات .. أنا بهزر معاك على فكرة .. وأكيد لو الوشوش اتلاقت في يوم من الأيام حتعرف أن نص كلامي تهريج وضحك وهزار .. فمتزعلش مني .. ومع ذلك حتى لو اعتذرت الاعتذار الرابع فهو مش مقبول .

نيجي بقى للجد .. 2500 لفة ده مش حرق على الموتور خالص .. الحرق على الموتور لما المؤشر يبتدي يخش على الرد زون (المنطقة الحمراء في عداد ال RPM) .

أنا مش متذكر أنت عامل كام كيلو بالعربية لغاية دلوقتي .. ولكن نصيحة مني لو عديت الألف كيلو ابتدي فتح في الموتور .. يعني أيه ؟! يعني أنك تبتدي تحرق على الغيارات لحد 3500 لفة في كل غيار .. بس مش على طول .. ويفضل يكون في طريق طوالي ومفتوح .. وده لغاية صيانة الخمسة آلاف .. وبعد كدة ابتدي أحرق برضه على الغيار بس قبل الرد زون بشوية ومش على طول برضه .. ده أسمه تفتيح للموتور .. علشان يبقى الموتور نشيط معاك واستجابته تكون من أقل لمسه .


استهلاك البنزين كدة يعتبر معقول جداً وكويس وخاصة أنك مبتحرقش على الغيارات .. وبتنقل على عدد لفات الموتور المثالية .

بالنسبة للتكييف .. أنت مختلف شوية عن الشعب المصري .. لأن غالبية الناس بتجيب درجة البرودة على الأخر .. وفي رأيي تكييف البي واي دي سواء الصيني أو المصري أدائه جيد جداً ومحدش اشتكى منه .

ربنا يباركلك في العربية .. ويكفيك شرها .. وشاكرين مرة تانية لنقل التجربة .. وأتمنى من حضرتك مشاركات أخرى بشكل متواصل تنقل لينا خبراتك وتجاربك مع الموديل الصيني والموتور الجديد 1500 سي سي .. وإن شاء الله لو ظروفك سمحت نبقى نتقابل في المقابلات الدورية اللي بنعملها .. وخااااالص تحياتي .. وبرضه اعتذارك مش مقبول ههههههههه