الموضوع: عيوب ومميزات من تجربة بيجو 301 في السفر من القاهرة للغردقة

المشاركة الأصلية كتبت بواسطة amrelsaqqa

بالنسبة لانطباعاتى انا عن العربية ، انا كنت هعمل تقرير بس كنت هستنى فترة عشان اقدر احكم على كل حاجة في العربية بدقة

بس طالما فيه خلاف دلوقتى انا هقول انطباعاتى لحد دلوقتى

بالنسبة للثبات مقارنة بالعربيات اللى ركبتها
الـ 301 فرق السما والارض طبعا بينها وبين الكورولا
فرق برضه كبير بينها وبين الالنترا
تقريبا قريبة من اللانسر بومة ، او احسن شوية ( مش فاكر بالظبط ايه احساس اللانسر لانى بقالى فترة ما ركبتهاش )

عموما ثباتها اكتر من مرضى في الفئة دى ومش هتلاقى احسن من كدة في العربيات بالسعر ده ، الميجان اثبت ؟ ، اه اصدق الكلام ده طبعا ، بس الميجان لو هجيبها دلوقتى او اجيب اللى زيها هدفع كام ؟؟؟؟؟؟ والبيجو بكام ؟

في الاول وفي الاخر هى برضه اوروبى ، انا العربيات الكوري ببقى قلقان فعلا وانا بسوقها ، انا كنت بجيب بالالنترا شكل 2011 100-110 واقول يارب استر ، بس مش عايز اظلم الالنترا عشان العربية اللى سوقتها كانت بتتأجر واكيد متبهدلة ، بس كل الاوروبى اللى سوقته في حياتى مش كدة (حتى سكودا فليشيا! ، مش اثبت من النترا ، بس ما تخدعكش وتعرفك ايه امكانياتها وتظبط نفسك عليها )


الـ 504 نفسها اللى كانت موديل 75 كنت لما اجيب 120 اه احس ان العربية خفيفة ، بس في نفس الوقت بقدر احكمها والمها وكمان ما تعملش معايا حركة غير متوقعة ، يعنى انا عارف هى بتعمل ايه في الملفات بالظبط ورد فعلها انا بتوقعه صح ، عكس الكوري والكورولا ، تبقى مقلق طول الوقت وممكن العربية تدى رد فعل مش منطقى فجأة لو دخلت على ملف او خدت مطب او فرملت جامد ...

ده بالنسبة للكورى ، الاوروبى طبعا كله مش كدة في حدود علمى بما فيهم الـ 301 ، اه ممكن احس انى طاير بالعربية بعد 130 بس في نفس الوقت ببقى واثق فيها وبقدر اتحكم فيها زي مانا عاوز، معرفش دى حاجة نفسية ولا فعلا حقيقة

بيتهيألى انت ظالم الالانترا يا عمرو، انا مسوقتش الشكل دة بس ركبت فية، اعتقد ان ثباتها كويس لحد 150-160، ممكن عشان العربية اللى انت كنت راكبها كانت متأجرة فعفشتها متبهدلة فعلا.

و انت بتتكلم على ال504، حسيت انك بتتكلم على احساسى و انا سايق ال301، العربية عالية اصلا زى ال504 و تحس انها مع الهوا بتطير زيادة بس مع الوقت و السواقة بتتعود و بتقدر تتوقع رد فعل العربية مع الفرملة و بقيت لو ماشى بسرعة عالية و هفرمل بمسك الدركسيون كويس و انتبة لرد فعل العربية تحت رجلى و ابقى مستعد لأى حاجة، انا فى العادى ببقى ماسك بأيد واحدة مسكة مش و لابد كدة بصراحة عشان برضة الباور بتاعها خفيف.

انا بيتهيألى ان العربية دية ممكن تظبط لو اتحتطلها مساعدين رياضية، عشان هى عالية اصلا (انا كان فى مطبات كنت بحك فيها بالميجان دلوقتى بعدى عليها ولا الهوا)، فتهوطيها شوية و تقربها من الارض و تزود الثبات