انا جربت سواقة التيدا و السيتروين الاليزيه الي هي بالظبط البيجو 301 في موتور وعفشه وكل حاجه. و ده رأيي في العربيتين

الموتور :
التيدا كانت اقوى بفرق بسيط عن الاليزيه/ال301. بس صوت موتور الاليزيه افضل في الكبس على الموتور (لهواة الشد)

الجير بوكس:
في التيدا سلس ومش محسوس على عكس الاليزيه.

العفشه:
عفشة التيدا جربتها في طريق مكسر. احساس منعدم بأي شئ مكسر. وناعمه في المطبات. (انعم من الالنترا الي معروفه بانها ناعمه على المطبات). بس في المقابل ثباتها مش حلو قوي.
عفشة الاليزيه انشف حاجه بسيطه بس مابتتعبش الضهر في الطرق المكسره. انما ثباتها رائع في الغرز وجربتها في كذا غرزه على سرعات عاليه وكانت ماسكه نفسها.

الأمان:
وسائل الامان من حيث الairbags والabs والebd متوفر في الاتنين. بس في البيجو/ستروين بحس ان الفرامل اقوى لأن فيها تسقيط النقلات عشان تقف اسرع. وفي خاصية ان فلاشر الانتظار يشتغل مع الفرامل المفاجأه تقريبا اسم الخاصية emergency brake warning.

العزل:
في التيدا احسن بكتيييير. في الستروين سئ جدا ومفيش عزل للموتور و صوت الكلاكس مسموع جوه العربيه جدااااا كأن الكلاكس في الكابينه. وفي عيب مش عارف فردي ولا لأ وهو ان عند سرعة 80 صوت الهوا مسموع من الباب بتاع السائق.

الsound system:
في التيدا 4 سماعات وصوت افضل من السيتروين مع انها برضه 4 سماعات بس السماعتين الاماميه موجوده في التابلوه وده بيخلي جودة الصوت والbase وحش جدااا وقفلني من العربيه خاصة لو الواحد بيحب الhouse music :)

نقطه اخيره.. الازاز الامامي بتاع السيتروين/البيجو ضعيف جداً لمواجهة الزلط الصغير والطوب وبينقر او يتكسر بسهوله.
اضعف حتى من عربيتي الالنترا !

ممكن غيري يختلف معايا في الرأي بس انا شايف التيدا أفضل مع ان البيجو/الستروين فيهم مزايا كتير بس ماتخلنيش اجيبها برضه :)