بالنسبة للبيجو والنقط اللى اثيرت في الموضوع

العزل جيدا جدا وبحس بفرق جامد لما بقفل ازاز العربية ، فعلا ما بسمعش حاجة من برة ولو مشغل الكاسيت والتكييف مش هتسمع حاجة من برة نهاااائى ، موضوع الكلاكس برضه مش قاعدة اوى لان الكلاكس لازم يسمع في العربية كلها ، وبيتهيألى العزل اللى لدرجة ان الكلاكس نفسه ما يتسمعش جوة ، ده ممكن نلاقيه في الـ 508 والفئات العالية اوى والعربيات الفخمة اللى بجد مش عربية نازلة من اول 108 الف ، وبيعتمد برضه على مكان الكلاكس في حوض العربية واتجاهه ، في رأيي الواحد يقعد في العربية ويفتح الازاز وبعدين يقفله ويشوف الفرق ، وطبعا التجربة العملية بعد الاستلام هى اللى بتحكم الحكم الدقيق

موضوع صوت الهوا على السرعات بسيط جدا وموجود في بعض العربيات اللى في الفئة الاعلى ومش بالدرجة اللى انتوا متخيلينها واقل من اننا نهتم بيه اصلا ، الابواب تقيلة ومحملة جدا و الكاوتش بتاعها دبل في الباب نفسه وفي العربية وكل طبقة فيهم سميكة جدا

لو افترضنا ان العيوب دى موجودة ، فمميزات العربية كتيرة جدا ومالهاش حصر
يعنى العربية لا هى واطية ولا هى ضيقة ولا سحبها مكتوم ولا عفشتها ناشفة ولا فراملها ضعيفة ولا ثباتها على قده .. بصراحة عربيات قليلة اوى اللى مفيهاش ولا عيب من اللى فوق دول ، تلاقى العربية فيها كل حاجة بس واطية ، او ضيقة ، او خفيفة ، البيجو ما شاء الله بجد الاساسيات كلها حلوة اوى اوى

موضوع التست درايف للاسف مفيش توكيل في مصر بيبيع عربية سعرها حتى 200 الف وبيعمل تست درايف
التست درايف ده في البي ام والمرسيدس وبدأوا يعملوه في فولكس و اسكودا ..

او احيانا بيبقى من ضمن الدعاية للموديل في اول نزول يعنى ممكن كان في تست درايف للـ 301 اول ما نزلت خالص ، انما دلوقتى للاسف لا

بالنسبة للساوند سستم انا عندى في المانيوال سماعتين فقط قدام ، الانطباع الاول خالص عنه ماعجبنيش في الاول لانهم سماعتين بس وكمان انا كنت واخد على سماعات الابواب ، فحسيت في الاول كأن الصوت جاى من الشمال بس فوق الطارة ، كأن الصوت مش استريو !
ولكن لما ظبطت الـ Bass والـ Treble الصوت بقى جميل ومش حاسس انى محتاج اركب سماعتين زيادة والصوت عالى ونقى جدا ، وحسيت انه بقى حاجة تانية واستريو وكل حاجة ، يعنى للاستخدام العادى هيقضى الغرض وجيد جدا ، انما طبعا اللى غاوى مش هيعجبه اي ساوند سستم ستوك حتى لو ايه ، هيفكر في الاحسن منه .. عموما ده حاجة مش في اساسيات العربية وممكن بسهولة يتعمللها ابجريد ، طبعا كلامى كله عن المانيوال والبيزلاين ، واكيد الدنيا في الهايلاين احسن بكتير ، وعامة دى حاجة سهل جدا تتجرب ، حضرتك هتروحى صالة العرض وتقعدى في العربية وهتجربى الساوند سستم بتاعها عادى جدا