السلام عليكم ورحمة الله وبركاته

أخيرا بفضل الله انضميت لأصحاب أوبل فيكترا
انا اشتريت عربية موديل 99 1600 سى سى GLS
وكان عندى كام استفسار وتساؤل واتمنى الاقى ردود عندكم ليها

1- هل رقم الشاسيه ورقم الموتور اللى بيبقوا مكتوبين فى رخصة العربية لازم يكونوا متطابقين ولو مش متطابقين هل ده معناه ان الموتور اتغير ؟؟ لان عربيتى البيجو كانوا الاتنين نفس الرقم ؟؟

2- عداد الكيلومتر بتاع الرحلة والعداد الكلى دايما مطفى حتى لو منور النور ياترى هل الشاشة الديجيتال دى بتتغير ولو بتتغير فتغييرها سهل ولا معقرب ؟؟

3-اللمبات اللى بتنور عندى هى بتاعت عوامة البنزين وال ABS والبطارية والحساسات وفرامل اليد والزيت ... هل كده تمام ولا فى حاجات المفروض تنور ومش شغالة ؟؟؟

4-اللى اشتريت منه العربية كان بيحط ميه من الحنفيه للرادياتير والمية دى مية املاحها عالية لانه ساكن فى مكان الاملاح عندهم عالية شوية ... وكنت عايز اعمل نظافة للرادياتير واغير الميه لمية خضراء .. ياترى تنصحونى بايه بالضبط ؟؟؟

5- عداد ال RPM دايما على الف لفة بس مرة وانا بزود من الاكسراتير وانا فاتح الكبوت لما رجعت لقيته 2500 على السلانسية بطلت ودورت كذا مرة لغاية ما نزل لغاية الف تانى ... ومرة تانية برضو رفع ل 1500 ورجع لوحده ياترى ايه السبب واعمل ايه لو حصلت معايا تانى ؟؟؟

6- بالنسبة لحرارة العربية فهى لما بتكون بطالة من فترة بتبقى 80 وترفع لغاية 90 وبعض الاحيان بتعدى ال 90 بتبقى 92 او اكتر حاجة بسيطة ... هل ده طبيعى وايه الصح فى الموضوع ده ؟؟
7-ايه السرفيس اللى المفروض اعملها فى البداية ةوتكلفتها بتكون كام تقريبا .. علما بان صاحب العربية حلفلى 100 يمين انه مغير سير الكاتينة والمجمع من حوالى شهرين ومغير بلية يمين قدام .. وهو كان بيحط زيت شل الاصفر كل 5000 كيلو .. ؟؟ وبالنسبة للفتيس معرفش ؟

8- فى زيت على بداية خرطوم الباور ناحية طلمبة الباور بس الزيت مش كتير ومش بيزيد برضو فلما سالته قالى انه حصل قطع فى الخرطوم وكبسه من جديد واخد هوا للدورة بتاعت الباور فالزيت اللى على الخرطوم ده عشان اخد هوا ...اعمل ايه ؟؟


معذرة على الاطالة
بس ياريت يا جماعة تفيدونى لانى عايز استفيد من خبراتكم وأحسن أداء العربية ... أحب اضيف انى من قنا مش القاهرة يعنى عشان قطع الغيار صعبة هنا شوية ...

جزاكم الله خيرا