الموضوع: 6 \ 1

انا قلت الموضوع خلاص هدى و نام :) عشان كده هشارك معاكم بخواطر قبل النوم :)
اخر نظامين فى البلد راحوا و راحت ايامهم خلاص و التحسر علي ايامهم مش هيفيد لانهم لن يعودوا- رغم محاولاتهم الجاهدة لكده
احنا لما قمنا بثورة شعبية كانت اقرب خبرة لكده هى ثورة 19 و الاجيال اللى عاشتها خلاص تقريبا خلصت بالاضافة الى ان الدنيا دلوقت غير الدنيا وقتها
فى ثورتنا الاخيرة طلعنا مدفوعين بمبادئ انسانية جميلة و الرغبة فى اصلاح حال البلد و حتى اللى مطلعش كان بيأيد مبادئها رغم انه لم يشارك بالنزول

الثورة الاولى للاسف قابلت اول ما قابلت..... قابلت سوء ادارة و لصوص الثورات و دول موجودين فى كل كتب التاريخ..... بيبقوا قاعدين و مترصدين عشان يزيحوا القديم و يحلوا هم محله....... لا هدفهم اصلاح شئ و لا تغيير حاجة الا لمصلحتهم ...... و حظنا العاثر وقعنا فى اللى و لا حتى البلد كلها بناسها تفرق معاهم
عشان كده كان لابد من استكمال الثورة الاولى بثورة تانية لتصحيح المسار الذى انحرف...... و هنفضل كده لغاية ما تستقر الامور ان شاء الله مع نظام و رئيس يراعى ربنا فى البلد دى و فعلا يبقى عايز يعمل حاجه للبلد ...... و انا متأكد ان الناس لما تحس بصدقه و رغبته الحقيقية فى العمل لمصلحة البلد هتحس هى كمان بالدافع القومى للعمل بجد و للانجاز مرة تانية زى ما اجيال اباءنا حست بكده فى الستينات رغم كل مساوءها..... و امامنا الكثير من التجارب الحديثة للتقدم بس مازال ينقصنا الدافع

ادى الحكاية و الرواية فى كام سطر على السريع بأقل كلام مباشر ممكن فى السياسة...... واللى عنده استعداد يستحمل مع البلد يبقى ياريت لان البلد هتحتاج جهود كل ابناءها

حد هيقولى فى ثغرة فى كلامك ان اى حاجة كويسة تحصل للبلد مربوطة بأحتمال فى علم الغيب هو مجئ الرئيس المخلص اللى يعدل المايلة....... هقوله للاسف طبيعتنا كشعب كده...... تملى محتاجين حد يرسملنا الطريق..... و لو كان صادق و اقتنعنا بصدقه ده يبقى هنمشى وراه...... لان احنا كشعب و افراده من غير قيادة هنبقى تملى متفركشين...... ده جزء فى طبيعتنا و اتفرجوا على تصرفات الناس فى الشارع بس كدليل على كده..... مفيش تصرف حضارى واحد الناس بتتفق انها تعمله كلها فى نفس الوقت

طيب هل هنستنى المعجزة دى كتير؟ هقول لأ مش هنستنى ادينا شغالين و ربنا يكرمنا ان شاء الله بواحد يراعى ربنا فينا و فى البلد...... و رغم ان ملامحها الكاملة مش ظاهرة فى الافق الا ان انا متأكد ان ربنا شايل للبد دى الاحسن لانها اتذكرت بالخير فى كل الكتب السماوية...... انا شخصيا فاجأتنى معجزة 30 يونيو رغم انى كنت متوقعها و ممكن اجيب هنا مواضيع كتبت فيها عنها قبلها بشهور طويلة...... و فضلت رافض اصدق الا لغاية لما شوفت اخر اجراء فيها و ساعتها بس صدقت و شكرت ربنا على رحمته بالبلد دى و ناسها....... طبعا الناس اللى مش مع 30 يونيو لا محل لهم فى الاعراب من الكلام ده و ياريت يمتنعون....... و اللى مع 30 يونيو ياريت يستمر يستخدم الشحنة بتاعتها عشان تديله الامل فى مستقبل افضل فى البلد دى...... مع ملاحظة ان 30 يونيو مش هيحس بقوة الدفع بتاعتها الا اللى كان شايف بوضوح كامل الهوة السحيقة اللى البلد دى كانت رايحة عليها مع النظام السابق.....

و احب فى النهاية اقول انى زى ما قلت الكلمتين دول بأقل تعرض ممكن للسياسة و تفاصيلها احتراما لقواعد المنتدى و حرصا على عدم الدخول فى مشاحنات لا طائل من وراءها....... احب كمان اقطع الطريق على اللى هيشوف فى بعض كلامى ده محاولة للتسويق او الترويج لشخص معين...... و ناس كتير هنا عارفة رأيى فى الموضوع ده من ايام مشاركاتى فى مواضيع القسم الغير مأسوف عليه و ممكن برضه اجيب مواضيع قايل فيها الكلام ده من شهور....... انا كلامى هنا ده عبارة عن خواطر بشاركها مع الناس اللى لسه بتسأل و تتساءل عن اتجاه و قولت اشاركهم بالخواطر دى كما يحسها واحد من مواطنى البلد دى يعرف قيمتها و يعرف كويس انها تستاهل الافضل...... طبعا المواقف هتختلف و كمان الاحساس بيها هيختلف من شخص لشخص حسب ظروفه و موقفه و اتجاهاته بكل انواعها الخ الخ و كل واحد هيحسب حسبته بناء عليها...... الحسبة دى مش هيغيرها كلام و لا مناقشات مهما طالت لان كل واحد ادرى بظروفه و موقعه...... عشان كده حوارات كتير ممكن يبقى ملهاش لازمة و لا طائل من وراءها خاصة اللى مش هييجى من وراها اتفاق على حاجة ابدا بالذات بين الناس اللى على طرفى النقيض فى الرؤية

و الله غالب على امره و عليه سبحانه قصد السبيل