أستفسار هام بخصوص بيجو

**Ahmed Y** · 16-10-2013 12:04 PM

كل سنة وأنتم طيبين و بخير يارب و مبروك للاستاذ أحمد منسق القسم
أنا الحمد الله حجزت البيجو ٣٠١ هاي لاين بصراحة ربنا يكرمك منتدي نشيط جدا و مفيد لكل الناس
الكلام هنا هو اللي خلاني احجزها حجزتها من توكيل بيجو صلاح سالم و يارب بس سعرها يفضل ثابت
بعد أذنكم كان عندي استفسارات بخصوص العربية لو أمكن:
1-هو البور هيدروليك ولا كهرباء أنا سألت و أنا بحجز قالوا كهرباء بس في الصورة اللي بتوضح الفرق بين البيزلاين و الهاي لاين مكتوب هيدروليك.
2- ممكن حد يشرحلي الفتيس عشان انا متعملتش مع فتيس أتوماتيك قبل كده و أيه التيب ترونيك ده
3-لو حد مأمن علي العربية ممكن أعرف مأمن بكام و في نسبة تحمل ولا لأ
4- أنا بصراحة مش لاقي حد في المنتدي الحمد الله بيشتكي من العربية هي فعلا مفيهاش عيوب?? أنا كنت فكرت في الستروين بس لما لقيت الناس بتشتكي من التكيف روحت للبيجو وسألتهم في توكيل بيجو علي المشكلة دي قالوا أكيد سوفت وير. بس الحمد الله محدش أشتكي منها في بيجو
شكرا جدا و أسف علي الإطالة

**هانى القناوى** · 16-10-2013 01:26 PM

الف مبرروك مقدما يا استاذ Ahmed ويبعد عنك الشر

**Silent~Dream** · 16-10-2013 01:49 PM

اولا مبروك مقدما و ربنا يباركلك فيها و بالنسبه للاستفسارات :

1- الباور هيدروليك .
2- ممكن تسوق اوتوماتيك عادى على ال ( d ) و تقدر تسوق مانوال جنب الـ d هتلاقي فيه علامتين هم ( + ) و( - ) و هو ده المانيوال لما تجيبه علي الجزء بتاع + و - تقدر تستخدمه بأن انت تتحكم امتي تنقل الغيار عن طريق لمس الفتيس في الاتجاه ( + ) أو امتي تقلل الغيار عن طريق لمسه في الاتجاه ( - ) .
3- مش عارف وانا و مش بحب جو التامين و احيانا النصب و عم اعطاء الحقوق كامله المنصوص عليها فى العقود و طبعا لازم يطلعوا عينك الاول
4- اى حاجه ليها عيوب طبعا بس العيوب البسيطه الواحد بيبتاقلم معاها لكن العربيه جميله جدا و مفيهاش عيوب جوهريه و العيوب الى يتقال عليها عيوب ودى فى عربيات كثير بيكون فتيس فيه مشاكل مثلا او عربيه واطيه ( المفرو ض دى تبقى ميزه عشان الثبات لكن هنا فى مصر نحن نختلف عن الاخرين ) استهلاك بنزين عالى او تقفيل سئ و البيجو مفيهاش حاجه من كده و اختيار موفق ان شاء الله

**amrelsaqqa** · 16-10-2013 02:08 PM

الباور كهربا المفروض

**Silent~Dream** · 16-10-2013 05:41 PM

المشاركة الأصلية كتبت بواسطة amrelsaqqa

الباور كهربا المفروض

لا الكترو هيدروليك

**هانى القناوى** · 17-10-2013 01:30 PM

طيب انا كانت معايا بيجو 505 موديل 90 وبعتها الاسبوع اللى فات وعايز اجيب عربيه زيرو
فعجبانى ال301 الهاى لاين بس من كلام الموجود هنا فى المنتدى
بس كنت عايز اعرف

هل ثباتها ومتانه الصاج زى ال 505 اللى كانت معايا ولا لا ؟
طيب هى فيها ESP ولا لا طيب ينفع يركب لها لو مانزلاش بيه ؟؟
يعنى الحاجات اللى ممكن اكون عايزها زياده تركب ولا ماينفعشى ؟؟
مرايات تعتيم وتتقفل بالكهربا وحدات رفع و ESP و شاشه dvd وكاميرا

**amrelsaqqa** · 17-10-2013 01:40 PM

المشاركة الأصلية كتبت بواسطة هانى القناوى

طيب انا كانت معايا بيجو 505 موديل 90 وبعتها الاسبوع اللى فات وعايز اجيب عربيه زيرو
فعجبانى ال301 الهاى لاين بس من كلام الموجود هنا فى المنتدى
بس كنت عايز اعرف

هل ثباتها ومتانه الصاج زى ال 505 اللى كانت معايا ولا لا ؟
طيب هى فيها esp ولا لا طيب ينفع يركب لها لو مانزلاش بيه ؟؟
يعنى الحاجات اللى ممكن اكون عايزها زياده تركب ولا ماينفعشى ؟؟
مرايات تعتيم وتتقفل بالكهربا وحدات رفع و esp و شاشه dvd وكاميرا

ثباتها بالتأكيد افضل من 505 و 504 gl دى مفيهاش كلام طبعا
لان دى تكنولوجيا ودى تكنولوجيا تانية وزمن تانى ، انا في الـ 504 كنت اجيب 120 احس انى مش لامس الاسفلت اساسا واخرك في اي ملف 70 ولو انت جامد اوى 80 وتحس ان العربية هتقلب بيك
طبعا 301 مش كدة

الصاج جامد جدا ما شاء الله ، والفرامل ممتاااااااااااااازة وواسعة بشكل رهيب ودول اكتر حاجات عاجبيننى في العربية الحمد لله

الـ esp ما اعتقدش ينفع يتركب بسهولة
بقية الكماليات تركب لاي عربية بس الفكرة في نظام التوكيل والضمان في الحالة دى ..

**eleanor** · 17-10-2013 03:25 PM

المشاركة الأصلية كتبت بواسطة هانى القناوى

طيب انا كانت معايا بيجو 505 موديل 90 وبعتها الاسبوع اللى فات وعايز اجيب عربيه زيرو
فعجبانى ال301 الهاى لاين بس من كلام الموجود هنا فى المنتدى
بس كنت عايز اعرف

هل ثباتها ومتانه الصاج زى ال 505 اللى كانت معايا ولا لا ؟
طيب هى فيها ESP ولا لا طيب ينفع يركب لها لو مانزلاش بيه ؟؟
يعنى الحاجات اللى ممكن اكون عايزها زياده تركب ولا ماينفعشى ؟؟
مرايات تعتيم وتتقفل بالكهربا وحدات رفع و ESP و شاشه dvd وكاميرا

بص حضرتك متانه وقوه صاج ال505 مايتقرنوش بالجديد
اما بالنسبه للثبات فانا معايا ال505 الحمد لله لحد سرعه 170 و175 وثابته وبسافر بيها من الاقصر للاسكندريه وزى الفل مافيش اى مشاكل بس ماعرفش ثبات ال 301 ايه بس اكيد مش هايبقى اقل من ال505 كمان مع فرق التكنولوجيا اكيد ال301 هاتبقى اثبت من ال505 واى عربيه فيها abs يبقى فيها esp لانهم مشتركين مع بعض
اما بالنسبه للمرايات الضم ملاكها ممكن يفيدوك فى وجودها من عدمه
وشاشه الدى فى دى والكاميرا تركب بكل سهوله مافيش مشاكل
وتحت امر حضرتك فى اى ستفسار