الموضوع: أستفسار هام بخصوص بيجو

اولا مبروك مقدما و ربنا يباركلك فيها و بالنسبه للاستفسارات :

1- الباور هيدروليك .
2- ممكن تسوق اوتوماتيك عادى على ال ( d ) و تقدر تسوق مانوال جنب الـ d هتلاقي فيه علامتين هم ( + ) و( - ) و هو ده المانيوال لما تجيبه علي الجزء بتاع + و - تقدر تستخدمه بأن انت تتحكم امتي تنقل الغيار عن طريق لمس الفتيس في الاتجاه ( + ) أو امتي تقلل الغيار عن طريق لمسه في الاتجاه ( - ) .
3- مش عارف وانا و مش بحب جو التامين و احيانا النصب و عم اعطاء الحقوق كامله المنصوص عليها فى العقود و طبعا لازم يطلعوا عينك الاول
4- اى حاجه ليها عيوب طبعا بس العيوب البسيطه الواحد بيبتاقلم معاها لكن العربيه جميله جدا و مفيهاش عيوب جوهريه و العيوب الى يتقال عليها عيوب ودى فى عربيات كثير بيكون فتيس فيه مشاكل مثلا او عربيه واطيه ( المفرو ض دى تبقى ميزه عشان الثبات لكن هنا فى مصر نحن نختلف عن الاخرين ) استهلاك بنزين عالى او تقفيل سئ و البيجو مفيهاش حاجه من كده و اختيار موفق ان شاء الله

الباور فعلاً ألكتروهيدروليك,

وأحسن شركة للتأمين كونتاكت كارز, ول تأمين بيكون فيه نسبة تحمل,,
بس كونتاكت معاملتهم أحسن وأضمن من باقي الشركات اللي بتقولك حاسب وتعالا لنا لما يحصل حاطث لقدر الله او بيصلحو في ورش ويسترخصو في الأصلاح,

والعربية ماشاء الله عليها مفهاش مشاكل لحد لدلوقتي,, ولا حتي الاليزية لأنهم خارجين من نفس المصنع بنفس الأجزاء الميكانيكية كلها,,
الفرق بس إن كان فيه مشكلة في سوفت ويير الاليزية زي bug في الكودنج والمشكلة راحت بعد الأبديت وخلاص مبقاش فيه مشاكل تانية لحد دلوقتي,,


بالنسبة للفتيس, هوا أوتوماتيك تيب ترونيك - أربع سرعات,
وبما أنك بتقول أنك سوقت مانيوال بس, هقولك عال أوتو بتاعها بالتفصيل,

ال P هوا الباركنج, تحطها عليه لما تيجي تركنها وهتخرج بره العربية وتمشي منها بس, وغير كدا خليها علي ال N.

وال N هوا الموور زي المانيوال بتبقي مش واخدة غيار, ودا الوضع اللي بتحطة عليها لما بتقف في بنزينه تفول, أو تقف تتكلم مع واحد صاحبك, متحطش P في الأوقات دي..
عشان ال P ليه حساس خاص بيه, وأنا بحب أحافظ عليه عشان ساعات بيحصل فيه مشاكل علي المدي الطويل,, والتكة بتاعتة بتزعجني,, ولو عطلت علي P مش هتعرف تحركها.

والعربية لما بتكون علي P مش هتعرف تحرك العصاية من عليه عشان تنزل لل R و ال D من غير تدوس فرامل, فتدوس فرامل قبل ما تنزل من علي ال P لأي غيار.

ولما تيجي تحط العربية علي ال P ممكن تطلع من غير فرامل عادي,, دا لو أخدت العصاية خطف كدا من الN لل P ودا الطبيعي ومفهوش ضرر علي الفتيس او العصاية,
بس لو حركة أيديك مش سريعة يفضل تدوس فرامل,,, عشان لو أيديك بطيئة العربية هتاخد R منك وأنت طالع بالعصاية لل P وهترجع بضهرها منك فخد بالك كويس..


ال D هوا ال Drive أو وضع الحركة اللي بيمشي العربية,
يفضل قبل ما تجيبه تدوس فرامل بس مش شرط,, عشان العربية هتبدأ تتحرك ولو في مكان ضيق أو جراش أو قدامك عربية ممكن تخبط فيها.
طبعا هتخبطها علي سرعة بطئية مش هتنط بيك, بس عود نفسك من دلوقتي أنك قبل ما تجيب D أو R تكون دايس فرامل تحسبها لظروف المكان اللي حواليك.



ال R هوا اللي بيرجع العربية ورا, مفيش كلام كتير يتقالي عليه,
قبل ما تنقل لل R يفضل أن العربية تكون واقف علي الأرض خالص, مع العلم إن الفتيس فيه خاصية أمان بتمنع العربية تاخد R وهيا ماشية عشان مفيش فاصل ما بينهم زي العربيات الاوتوماتيك العادية اللي بتبقي بزرار, بس أنا محبتش أجرب, وبقف خالص قبل ما أجيب R.


ال M
لما تكون جايب D وماشي بالعربية أو واقف,
في حارة في الجنب الشمال من ال D في الفتيس مكتوب جمبها M
M أختصار لمانيوال ودي اللي بتخليك تتحكم في نقل الغيارات, وتثبت العربية علي غيار معين, وتحرق علي الغيار وتنقل متأخر أو بدري وتسقط غيارات زي الفتيس المانيوال بالظبط.
ولما بتحرك العصاية ناحيتك للشمال بيظهر لك في الطابلوة الغيار اللي أنت عليه, لو كنت واقف مش بتتحرك هتلاقيها كاتبة 1 بدل D يعني الغيار الأول,,

ولما تمشي بالعربية مش هتنقل طبعاً وهتزق عصاية الفتيس لقدام ناحية الطابلوة واللي مرسوم عندك في الفتيس + عشان تنقل للتاني, ولما توصل للرابع وعايز تجري في منطقة مثلاً هتزق العصاية لتحت عشان تجيب التالت وهكذا.

ملحوظة : ممكن في اي وقت تنقل ما بين D لل M وانت ماشي أو واقف, والعكس صحيح,
لو كنت علي ال M وحارق علي غيار ونقلت لل D العربية هتاخد أفضل غيار مناسب للسرعة اللي أنت ماشي بيها وهتكتب لك D علي الشاشة وتنقل الغيارات لوحدها تاني أكنك طلعت عليه من البداية.

أخر حاجة بقي وضع ال D العادي, ليه وضعين تابعين ليه,,
وليهم زرارين منفصلين اللي هما S و النجمة * فوق علي الشمال في الفتيس,

ال S دا الوضع الرياضي Sport : لما بتضغط عليه, بيتكب علي الشاشة قدام في الطابلوة Ds
بيخلي العربية سحبها أسرع وتنقل الغيار متأخر عشان تديك تجميع أعلي في الغيارات, وطبعاً دا بينعكس علي استهلاك البنزين بيزيد بشكل ملحوظ.

ال * دا وضع الجليد Snow: لما بتضغط عليه, بيتكب علي الشاشة قدام في الطابلوة *D
دا في الأساس مصمم للدول اللي فيها جليد وطرق زلقة كتير, لما بتغط عليه العربية بتطلع علي التاني دايماً وتاخد تالت ورابع بس, والحكمة من أنها متاخدش الأول دا عشان تقلل ال Wheel Spin والكاوتش ميفركش علي الأرض ويفضل محافظ علي تماسكة بالأرض,
يعني في العادي أنت لو علي D أو Ds في شوارعنا ومن غير مية ولا جليد, ودوست سنة بنزين زيادة وأنت طالع, الكاوتش الامامي هيفرك علي الأرض ويطلع أمريكاني زي ما بيقولو, وهيعمل نفس الكلام معاك لو بتاخد شارع علي سرعة,
أما علي وضع ال *D لو وقفت علي دواسة البنزين مش هتفرك ولا هتخمس.
وهيخلي تماسك العربية بالأسفلت أعلي, وهنا في مصر لو أخترتة هيخلي العربية تقف معاك في وقت أقل لو قدامك مطب وأنت ماشي علي سرعة, لأنه بيعمل Engine Brake مع الفرامل العادية وبيسقط غيارات بدري عشان يوقف العربية في وقت ومسافة أقل.
وطبعا في حالة ال D وال Ds مش بيعملو كدا,
ال *D بس هوا اللي بيعمل كدا عشان يزود تماسك الكاوتش في الأرض

وعشان تلغي أي وضع بتضغط علي نفس الزرار اللي أنت ضغطت عليه من ال S أو ال *
وممكن تنقل ما بينهم عادي أو واقف بالعربية أو سايق,
وممكن تشغلهم أو تفصلهم عادي وأنت واقف أو سايق,

وإن شاء الله تستلم علي خير,, ومستنين تقريرك عنها.