الموضوع: شويه شغل فى التانك وطرمبه البنزين

كل عام وحضراتكم بخير وعيد سعيد على الجميع بأمر الله

أول يوم العيد بالليل لقيت نفسى عاوز أفك طرمبه البنزين عشان أعرف المشكله اللى كنت حكيت لكو عليها جايه منين
وهى للذكره إن مع وجود من ١٠~١٢ لتر فى التانك ألاقى العربيه بتنتش وكأنها بتخلص بنزين .. وعومه البنزين مع التفويل الاقيها عن علامه ٥٥ لتر

المهم بدأت وفكيت الطرمبه .. لقيت بعيد عنكو المصفاه بتاعه طرمبه البنزين عليها طين ... مع إنى لسه فاكك التانك من حوالى شهرين تلاته وغسلته ونضفته زى الفل
ما علينا .. طبعا نظفت المصفاه بفرشه أسنان خفيفه مع بنزين ... ولقيت فيها خرم رفيع سديته بنقطه معجون حديد

طبعا الفارغه بتاعه الطرمبه اللى فى التانك لقيت فيها طينه ... جبت خرطوم وشفطتها وهنا توصلت لسبب أول مشكله والحمد لله
وهى إن لما بيكون فى التانك صفيحه أو أقل نسبه البنزين داخل فارغه الطرمبه بتقل بسرعه عن البنزين خارج الفارغه فى التانك
لأن مع الشفط لقيت البنزين داخل الفارغه بيخلص والأرضيه بتبان مع وجود بنزين فى التانك ... وكده اللى كان بيحصل فى المشكله الأولى بقى طبيعى

موضوع العوامه
ما كانتش بتوصل للآخر وكنت بشك ان التانك مطبق ومصوص من ناحيه ومن ناحيه تانيه قلت انها بايظه
قلت بقى طالما فكيت أشوف مالها
وصلت العوامه بفيشتها وخليتها فى ايدى وبدأت أعلى وأوطى بإيدى عشان أشوفها فيها إيه
والمفجأه إنها سليمه وزى الفل .. تجيبها للأخر وللنص وتحت تلاقى القرايه مظبوطه وتمام
ملحوظه ( لازم تطفى الكونتاكت وتشغله مع تغيير منسوب العوامه وهى فى ايدك عشان تجيب القراءه بسرعه )
المشكله بقى كانت جوه التانك .. وهى حاجه غريبه جدااا

لقيت ماسوره حديد جوه التانك العوامه مابترفعش للآخر عشان بتخبط فيها !!!!
مش عارف طبعا بتاعه إيه الماسوره دى .... وياريت لو حد يعرف يقولنا ... طبعا تنيتها شويه من طريق العوامه بعد ما كلمت فادى وقلتله وإستغرب برضو من موضوع الماسوره دى

والحمد لله فولت النهارده وللمره الأولى من ساعه ما اشتريت العربيه أمبير البنزين يوصل للرقم ٦٠

آسف على الإطاله بس حبيت أنقل تجربه الشغل ده لعل وعسى يكون فيها إفاده للأصدقاء الأعزاء

كل سنه وإنتو طيبين