هل يوجد حل لعدم سرقة علامة الأسد(رمز بيجو)

**Eng HateM** · 17-10-2013 06:38 PM

كما ذكر الإخوة , لا يوجد حل واقعي فعال بنسبة 100% باستثناء ترك السيارة في جراج خاص محروس.

تقريبا في بيجو وكيا وفولكس فاجن فك العلامة أسهل من باقي الماركات عشان كدا تلاحظ عربيات كتير فيها نفس المشكلة وتلاقي العلامة في الآخر راكبة على توك توك أو لادا

ربنا يحفظنا من الأشكال المريضة ديه .

**airac2002** · 17-10-2013 08:10 PM

للاسف سرقة العلامات دي عاملة ذي هواية جمع الطوابع اللي كنا بنعماها زمان واحنا طلبة
اما الان بتوع التكاتك بيمرسوها بطريقتهم
انا في عربيتي الالفاروميو فبها علامتين كبار في الامام والخلف واربع علامات ملونة في سرر العجل والحمد للة اتسرقو واوح اجبهم من الوكالة برضة يتسرقوا وعرفت من الوكالة ان الموضوع دة منتشر

**Ahmed Amin** · 18-10-2013 02:59 AM

أنا برضه أتسرقت مني العلامة الخلفية أو ماجبت العربية, وضايقتني بس مزعلتش لأني لاقيت شكل العربية غامض أكتر من غيرها.
بعدين أتسرقت العلامات اللي علي الجنوط, ودي ضايقتني أكتر لأن حسيت شكل الجنوط ناقصة حاجة مهمة,,
وأخيراً من حوالي سنة أتسرقت العلامة الأمامية,, ودي بقي اللي زعلتني بجد, لأنها خلت شكل العربية وحش جداً من قدام وكل ما أجي أركبها أضايق,,

المهم سألت عليها في التوكيل لاقيت الأمامية بحوالي ٢٥٠ جنية,, والخلفية بحوالي ٤٤ جنية.
بعدين دورت عليها في محلات الأكسسوارات لحد ما لاقيت الأمامي ب٤٠ جنية, والخلفي كانت ب ١٠ جنية,,
ومتعرفش تفرق ما بينهم ومابين الأصلي,, بس أنا حاسس إن العلامة الأمامية طلوقتي بدأ لمعانها يروح,,

المهم انا جبتهم من محل الأمسسوارات لأنهم معرضين أنهم يتسرقو تاتي في أي وقت تركن عربيتك برة البيت عشان تجيب حاجة, أو
تبات برة بيتك أو حتي لو ركنت عند بيتك و مش عندك جراج.

وأنا المرات اللي أتسرقو فيهم عندي, كانت المرات اللي ببات فيها برة البيت ومش بركن في الجراج,
والمرة الوحيدة اللي أتسرقت فيها العلامة الأمامية كانت المرة اللي العربية متغطتش بيها,,

فاللي مش عنده جراج يجيب غطاء, وأي حد يركن او يبات برة بيته يغطي عربيته.
بس طبعاً الجراج أأمن عشان الخبطات والحكات, وياريت محدش يستهون بالموضوع دا,
لأن العرببة عندنا أتخبطت في الرفرف بعد ما أشاريناها ب ٣ أيام قبل ما الأقي جراج فاضي,,
والموقف دا اتكرر مع ناس كتير هنا في المنتدي أخرهم عمرو,
http://www.nilemotors.net/Nile/382189-301.html

فا ربنا يستر طريقنا, ويهدي العيال دي,,

**EngAhmedSayed** · 18-10-2013 09:41 AM

انا عندى حل
بس محدش يضحك عليا لسة مفكر فى حلا هو

اية بقى الحل هنخلى العلامة اسكوتش

حضرتك هتفك العلامة بنفسك و تقص عليها اسكوتش و الازق مكنها على صاج العربية اسكوتش و الازق على العلامةاسكوتش و لما تيجى تمشى بالعربية الازقها و لما تيجى تركن شيلها و كدة تيبقى زى الحلاوة
و مش هيكلفك حاجة غير ثمن اللازق و الاسكوتش من اى مكان بياع مستلزمات خياطة او مكتبة نظيفة بس

و اى اللى يعمل الاختراع يبقى قولنا و يصورلنا علشان نشوف النتيجة

اية رأيكم فى الاختراع دة

وربنا يهدى كل واحد حرامى
و تنقطع ايده

ربك المستعان
بالتوفيق

**ahmedsrs** · 18-10-2013 11:28 AM

الحل العملى والمثل انك تشيل الاصلية وتركب واحدة مقلدة

**amrelsaqqa** · 18-10-2013 12:42 PM

المشاركة الأصلية كتبت بواسطة engahmedsayed

انا عندى حل
بس محدش يضحك عليا لسة مفكر فى حلا هو

اية بقى الحل هنخلى العلامة اسكوتش

حضرتك هتفك العلامة بنفسك و تقص عليها اسكوتش و الازق مكنها على صاج العربية اسكوتش و الازق على العلامةاسكوتش و لما تيجى تمشى بالعربية الازقها و لما تيجى تركن شيلها و كدة تيبقى زى الحلاوة
و مش هيكلفك حاجة غير ثمن اللازق و الاسكوتش من اى مكان بياع مستلزمات خياطة او مكتبة نظيفة بس

و اى اللى يعمل الاختراع يبقى قولنا و يصورلنا علشان نشوف النتيجة

اية رأيكم فى الاختراع دة

وربنا يهدى كل واحد حرامى
و تنقطع ايده

ربك المستعان
بالتوفيق

هى كفكرة جديدة والله وحلوة ، بس احيانا العلامة نفسها بيبقى وزنها تقيل وممكن تفك وتقع وخصوصا مع السرعة او الفرملة ، وكمان الواحد هيعمل ايه ولا ايه ، هكلبش الدركسيون واقفل الازاز واشيل الاريال و اقفل المرايات واشيل العلامات كمان بنفسى :(
وبعدين محدش هيخلع بنفسه العلامة وهى لسة بلزق الفبريكة بتاعها ، دى المعضلة

**lanos2004** · 18-10-2013 01:25 PM

الحل انك تشترى اسد وتحطه مكان العلامه ونشوف مين الى هيسرقها

**hugan** · 18-10-2013 02:42 PM

الجراج مش حل لانها بتتسرق في مشوار تاني
كنت في عزاء في ميت غمر
وكان صف عربيات طويل من كل الماركات
ورجعنا من الدفن
العربيات بالكامل مفيش ولا علامه اماميه ولا خلفيه
الحل اللي عايز علامه عربيته بعد ماتتسرق
يعلقها من اي توكتوك ماشي في الشارع
وهاتكون علامه اصليه طبعا
او يشتريها من الواد سواق التوكتوك