الموضوع: تكييف بيجو 301

المشاركة الأصلية كتبت بواسطة moha_2k

يا جماعة الخير اريد تفسير منطقي وعلمي

اذا كانت السيارة البيجو 301 والستروين الاليزيه توام في كل حاجة عدا الشكل الخارجي فكيف ظهر مشكلة التكيف في الالاليسه بس ؟
ولو بيجو عملت ابديت للسوفت وير ومش ظاهر المشكلة فهما يعني مش عاوزين يدوا السوفت وير للاليسه ؟

بسم الله الرحمن الرحيم,
أولاً عشان ميبقاش فيه سوء فهم, مفيش حاجة أسمها بيجو مش عاوزين يدو السوفت وير للأليزيه,,

لأن دي شركة ودي شركة,, الأتنين تحت أدارة مجموعة واحدة اللي هيا PSA Peugeot Citroën

بس ستروين ليها تصميماتها الخاصة للعربيات, يعني التصميمات الداخلية والخارجية فيها مختلفة عن البيجو,,
وسوفت ويير مختلف عن البيجو,,عشان هتلاقي معظم العربيات الستروين فيها شغل ديجيتال أكتر من البيجو في الطابلوة,,

ومثال علي دا طابلوة ال C4 هتلاقيه فيه شاشات ديجيتال أكتر مقارنة بال 307 اللي هما نفس العربية ونفس الموتور والفتيس,
شوف كدا طابلوة الستروين C4 عامل أزاي وركز في شكل وحدة الكاسيت CD
والتكييف التاتش, والشاشة اللي فيها التاريخ,, وقارنهم باللي في ال 307



كابينة وطابلوة ال 307


.
..
...
فا بالنسبة لل301 واللأليزية الأتنين نفس الموتور والفتيس والدينامو وكمبروسير التكييف والأجزاء الميكانيكا والعفشة,
وكل القطع بنفس البارت نمبر بيركبو علي بعض لأنهم بيخرجو من مصنع واحد,,
دي صورة مثلا من السيرفس بوكس بتاع بيجو وتفاصيل الموتور بتاع ال301



ودي من ستروين,



نيجي بقي لمشكلة السوفت ويير,
العربيتين كمان بيتوصلو علي الكمبيوتر بنفس الكابل,, لكن كل عربية ليها سوف ويير مختلف تدخل بيه علي العربية عن التاني,,

الأول صورة الكابل,


ودي صورة من سوفت ويير بيجو, واللي بتقدر تدخل بيه علي عربيات بيجو بس,,
يعني مفيش أختيارات لعربيات ستروين هنا,,



دي صورة من سوفت وير سيتروين,

http://www.nilemotors.net/Nile/37514...post3875166943

الخلاصة:
لما يكون فيه مشكلة في سوفت ويير الستروين, ستروين هيا اللي مفروض بتعمل أبديت بعد ما تشوف المشكلة فين وأيه سببها, وتبعته لوكلائها في الدول المختلفة,
ونفس الحال مع عربيات بيجو,,

ومينفعش نقول نروح ناخد الأبديت بتاع بيجو لأني زي ماوضحت لك البرنامجين مختلفين وممكن يكون ملف الأبديت مختلف في الكودنج بتاعه حتي لو كانت الأبديت واحد,,


وتوضيح أخير,
أي سوفت ويير في الدنيا بعد ما بينزل بيكون ليه أبديت, زي الويندوز مثلا بيكون ليه أبديت,,
لو عندك برنامج علي الموبيل كل شوية هتلاقيه ليه أبديت سواء لحل مشكلة او Bug ظهرت في السوفت وير بعد الأستخدام,, أو لأضافة مزايا جديدة,,


تاني العربيتين البيجو 301 والستروين الأليزية خارجين من مصنع واحد بنفس الموتور بالظبط ونفس كل الاجزاء الميكانيكية,,
>> يعني لو كان فيه مشكلة في الاجزاء الميكانيكية سواء كومبريسور تكييف أو دينامو كان ظهر في العربيتين,

لكن البيجو لحد دلوقتي ماشاء الله مفهاش أي مشاكل,, ومشكلة الأليزية راحت بعمل أبديت للسوفت ويير اللي كان فيه bug,
وأنا كنت قايل نفس الكلام دا في الموضوع الخاص بمشكلة الأليزية, والموضوع أتحل لناس كتير فعلاً بعد عمل تحديث للسوفت وير,
http://www.nilemotors.net/Nile/37514...post3875152482

المشاركة الأصلية كتبت بواسطة moha_2k

يا جماعة لغاية دلوفتي في اعضاء شاريين ستروين اليسيه ولسه مشكلتهم ما اتحلتش والمضووع وصل لحماية المسنهلك والتوكيل بيماطل وانا صراحة مش فاهم ازاي العربيتين زي بعض وواحدة فيها المشكلة والتانية لا !!!!!!

علي حد علمي ومن متابعتي لقسم ستروين إن المشاكل أتحلت بعد عمل الأبديت,,
والتوكيل مش بيماطل وحل المشاكل للناس بالفعل وأنا وضحت لك الفرق ما بين العربيتين دلوقتي,,

وبالمناسبة التوكيل وصل له الأبديت حتي من قبل ما أستاذ أسيوطي وأسلام عفيفي يعملو شكوي في حماية المستهلك,,
وكان فيه عضو أسمه seeworld كان أول واحد واخدة هنا في المنتدي,,
وأحنا نصحناهم بعدها يروحو ياخدوة علي طول عشان تتحل مشكلتهم,,,,

وبالمناسبة أنا كمان اللي كنت قايلهم يعملو الشكوي دي في حماية المستهلك قبل ما التوكيل ينزل الأبديت ويهتم بالمشكلة بتاعتهم,,
عشان فيه ناس بتتابع ردودي ومفكراني متحيز للأوروبي وباجي علي العربيات التانية اللي متقفلة في مصر,,,
وبتزعل لما بقول لملاك العربيات اللي عندهم مشاكل فيها يشتكو في حماية المستهلك عشان تتحل مشكلتهم,, وبياخدو الموضوع بشكل شخصي ويدافعو عن عربيتهم الشخصية.!

وأنا بتلكم بوجه عام عشان محدش ياخد الكلام علي نفسه,, وأني لما بتكلم في موضوع فيه مشكلة بحاول أساعده علي حلها,, والحمدلله في الأخر المشكلة طلعت زي مانا فكرت,

وطبعاً الناس اللي مكنش عندها مشاكل في عربياتها في منتدي ستروين مزعلتش من ردودي,,
علي عكس ما حصل في منتديات أخري لما كان التوكيل بيماطل ومش بيحل المشاكل للعملاء,,


ودي الردود بتاعت الناس اللي عملت الأبديت في توكيل ستروين والمشكلة راحت بعده,,

المشاركة الأصلية كتبت بواسطة seeworld

ياجماعة المشكلة اتحلت انا معايا اليزية 2014
وكان غندى نفس مشكلة ضعف اداء الموتور مع التكييف لدرجة اوقات كنت بدوس بنزين مفيش استجابة اصلا
وروحت فرع ابو روش طريق اسكندرية الصحراوى قابلت مهندس اسمه احمد فوزى راجل محترم وقالى ان دى كانت مشكلة فعلا واتحلت ونزلى سوفت وير جديد تمام خد وقت شوية 4 ساعات بس العربية بقيت تمام معايا فى السحب والشد ومش حاسس باى حاجة
وسالته عن صوت العربية بيكون عالى وانا مشغل التككيف قالى علشان دى مروحة واحدة مش مروحتين والموتور بتاع المروحة قوى علشان كدا صوتها عالى وورانى اكتر من عربية موديلات مختلفة لستروين وصوتهم كلهم كدا

http://www.nilemotors.net/Nile/37514...post3875164797

ودي من أستاذ أسيوطي اللي كان شكوي في حماية المستهلك,,

المشاركة الأصلية كتبت بواسطة asuity

الحمد لله العربية لغاية دلوقتي ماشية تمام. ان شاء الله كل مشاكلنا تتحل.
بصراحة لما قابلت المهندس غازي حسيت ان لسة في امل في عز العرب.


والله المستعان

الردود كلها في اللنك دا,
http://www.nilemotors.net/Nile/37514...post3875180771