الموضوع: هـــل الكلام دا صحيــح عن الميــجان !!!

الى الأستاذ صاحب الموضوع....

مش عارف ليه الكلام اللى حضرتك مقتبسه فكرنى بالفيلم العربى القديم اللى كان فيه واحد فى الأذاعة بيقول " الى السيد أحمد أبراهيم القاطن بدير النحاس....لا تشرب الدواء....الدواء فيه سم قاتل " :) :)

يا باشا فى حاجة من الأتنين
الراجل اللى كتب الكلام ده مساقش الميجان أصلاً وبيفتى
أو الراجل ده كان شارى عربية مقلوبة 13 مرة قبل كده على الجانب اليمين و4 مرات ونص على الجنب الشمال.

بص يا أستاذى العزيز

أنا عربيتى مو 2005 وبقالها معايا 3 سنين ونص من الزيرو وعاملة دلوقتى 79 ألف كيلو

غيرت البطارية مرة على الضمان ومرة من حوالى 5000 كم أحسبها حضرتك وقولى بتمشى كام
موضوع الزجاج و كود الكاسيت دول موجودين فى أى عربية أوروبى من فترة التسعينيات ( كان موجود فى عربيتى السابقة اللى هى فيكترا 97 )
موضوع صوت الأبواب صحيح ويتم حله بالطريقة اللى تفضل فرحات وقالها
موضوع بأه أن العربية كل فترة مترضاش تمشى الا لما تروح التوكيل............اللهم أنى صائم
بس أحب أقولك أن لو كان فى فرد واحد فى أوروبا أستنتج الموضوع ده ذى الجهبز اللى كتب الموضوع كانت كل المؤسسات اللى ليها علاقة بالعربيات قامت وفحصت ومحصت الموضوع وثبت صحة الموضوع فأنا أؤكد لحضرتك ان الكيان المسمى ب Renault
واللى رأس ماله مليارات الدولارات كان هيتم وقفه تماماً عن العمل عشان هو كمان ضد المواطنين المصريين الغلابة وبيتأمر مع الحزب أياه ضدهم

معلش كلامى كله شخرية بس مش من حضرتك والله.....ده من عالم الذرة ( بس اللى بتتشوى مش اللى بتنشطر ) اللى كان عامل دماااااااااااااااغ عالية قوى وهو بيكتب.


أستاذ حازم خضر
تحياتى ليك أولاً
أسمحلى أختلف معاك فى موضوع أن الأشاعات دى ليها أساس من الصحة وأن الشعب المصرى بيفهم
مش كل حاجة ليها أساس من الصحة يا أستاذى و كمان معظم الشعب المصرى بيفتى مش بيفهم مع أحترامى للجميع
أنا قبا ما أشترى العربية كان ليا زميل من هواة السمع.....المهم قالى بلاش دى العربية دى كانت مع واحد شغال فى موبيل والدركسيون عمل منه لوك Lock وهو ماشى و معرفش يلفه وكان على الصحراوى والعربية اتقلبت.....
من حسن حظى أن أنا عندى 3 صحابى و كمان واحد قريبى شغالين فى موبيل
وطبعاً حادثة زى دى أكيد هتكون مسمعة فى الشركة كلها و أكيد هيكون الغلبان صاحب العربية بقى معروف فى الشركة كلها ولو أسماً.
الأجابة من أصحابى و من قريب كالأتى " أحنا سمعنا عن الحادثة دى بس مفيش حد....يعرف حد...يعرف اللى عمل الحادثة و مفيش أعلان رسمى عن حاجة زى دى كما هو متبع فى مثل هذه الحالات " :) :) :)

نفس صديقى السميع قالى أن صيانة ال 60 ألف بتاعة الميجان ب 6000 جنيه.....بسأله مين قالك....قالى واحد صاحبه ....جوز بنت خالة مش عارف مين راح عمل صيانة ال60 ألف وكانت ب 6000 جم..............
ملحوظة أخيرة : العربية كانت نازلة بقالها 4 شهور بس......يعنى صاحبها المفروض كده بيمشى 15 ألف فى الشهر........يا بلاش

أسف للأطالة