علشان لما حد يقولكوا إن الشعب المصري متدين بطبيعته تبقوا تصدقوا

**أبو آسر** · 22-10-2013 11:48 PM

أول أمس تم سرقة سيارة جاري وصديقي موديل دايهاتسو تيريوس 2013 لسة زيرو جايبها مكملتش شهر ب142500 جنيه
تم تثبيته من 4 بلطجية بالرشاشات الآلي على طريق المصانع بمدينة العبور وهو في طريقه إلى عمله بمدينة السلام في عز النهار بعد صلاة العصر مباشرة وضربوا حواليه نار من كل جهة للإرهاب والحمد لله إنه لم يصاب بأي رصاصة طائشة ولكنه فقد القدرة على السمع عدة دقائق من صوت الرصاص اللي كان جنب ودنه مباشرة ونزلوه وخدوا العربية واتصلوا بيه بيساوموه على 50 ألف جنيه قالهم مش معايا غير 12 ألف وبعد كده قفلوا الموبايل ومتكلموش تاني
طبعا راح عمل محضر في قسم الخانكة والبهوات اللي مش فاضيين طبعا للحاجات الهايفة دي علشان مشغولين بمحاربة الإرهاب قالوله اتفاوض مع العصابة !
ومش هتكلم أكتر من كده علشان الموضوع ميقلبش سياسة والناس بتزعل بس مش هقول غير حسبي الله ونعم الوكيل ونصيحة لكل واحد معاه عربية يبقى يحوشله قرشين يعينهم لأي ظروف علشان عربيته ممكن تتسرق في أي لحظة فيكون مجهز المبلغ بتاع المساومة ويوفر على نفسه مشوار القسم خسارة ال5 ولا ال10 جنيه اللي هيصرفهم في التاكسي والكام ساعة اللي هيضيعهم هناك

المهم بأه في الموضوع إن جاري لما كلموه يتفاوضوا معاه بيقولهم وأنا إيه اللي يضمنلي أجيبلكوا الفلوس تدوني العربية ؟
يقوم الحرامي البلطجي يرد عليه بكل جدية وخشوع ويقوله:
يا بيه احنا مبنقبلش على نفسنا فلوس حرام !

صدقتوا إننا شعب متدين بطبيعته ولا لسة ؟!!

**Medomedoz** · 23-10-2013 12:11 AM

تلاقى واحد يقوللك هو ايه اللى وداه هناك !! حسبنا الله ونعم الوكيل

**تامر.محمد** · 23-10-2013 12:41 AM

للحق يعني , دي مش ازمة شعب , دي ازمة حكومة

هي ازمة الشعب اللي ساكت على او بيحب دي الحكومة
و منه كل الاشخاص اللي هاييجوا يقولوا التعليق اللي انا متوقعه

**grumby78** · 23-10-2013 01:24 AM

اعتقد ان اي حد بيشتري عربيه جديده الايام دي لازم يأمن تأمين شامل . منعا للمهازل اللي بتحصل للناس في الطرق السريعه وطرق السفر . ربنا يصبره ويعوضه خير ان شاء الله .

**تامر.محمد** · 23-10-2013 01:36 AM

المشاركة الأصلية كتبت بواسطة grumby78

اعتقد ان اي حد بيشتري عربيه جديده الايام دي لازم يأمن تأمين شامل . منعا للمهازل اللي بتحصل للناس في الطرق السريعه وطرق السفر . ربنا يصبره ويعوضه خير ان شاء الله .

انا عايز للأسف اصدمك :(
امبارح او النهارده صفحة المنتدى على الفيس اعلنت عن ان عضو اثناء محاولة سطو على عربيته قدام هايبر وان ........... لقي مصرعه :(
ولا تأمين ولا غيره
الله يرحمه

**أبو آسر** · 23-10-2013 01:57 AM

المشاركة الأصلية كتبت بواسطة medomedoz

تلاقى واحد يقوللك هو ايه اللى وداه هناك !! حسبنا الله ونعم الوكيل

هما فعلا قالوله مش احنا اللي منزلينك من العربية يا بيه فمتلومناش احنا العربية جاتلنا واحنا اللي بنتفاوض معاك !

المشاركة الأصلية كتبت بواسطة amr011111

بصراحه عيب اوى على البلد. شويه حراميه هيكونوا كام يعنى بالكتير مليون متحكمين فى 80 مليون
ظباط الشرطه الله ينتقم منهم بصراحه فى عدم تأدية واجبهم ( الا من رحم ربى )

بس اتصلوا بصاحبك بعد ما عمل بلاغ ولا جابوا تليفونه منين

يا باشا لازم تعذر الشرطة برده الناس مشغولة في مكافحة الإرهاب والقضاء على عناصر المحظورة مش فاضيين هما للكلام الفاضي ده مصلحة الوطن أهم من كل شيء إيه يعني الناس تتقلب كل يوم وعربياتها تتسرق في سبيل مكافحة الإرهاب الأسود !!!

بخصوص سؤالك هما لما سرقوا العربية سرقوا موبايله طبعا وهو اتصل على موبايله من رقم مراته وكلمهم

المشاركة الأصلية كتبت بواسطة grumby78

اعتقد ان اي حد بيشتري عربيه جديده الايام دي لازم يأمن تأمين شامل . منعا للمهازل اللي بتحصل للناس في الطرق السريعه وطرق السفر . ربنا يصبره ويعوضه خير ان شاء الله .

للأسف التأمين بيغطي 75 % بس من قيمة العربية يعني هيدفع بتاع 35 ألف جنيه علشان يجيب واحدة تانية لكن المجرمين دول ممكن يوصل معاهم ل15 ألف ولا حاجة ويجيبها ده غير إن موضوع التأمين بيقعد 6 شهور !