مشكلة في كمبروسر تويوتا ياريس

**alalfi** · 23-10-2013 02:50 AM

أرجو الإفادة ممن لديه خبرة تنصحوني بإيه ؟!
من كام شهر إشتريت سيارة (ياريس مانيوال 2009) وذهبت الأسبوع اللي فات لإجراء الصيانة خارج التوكيل (في ورشة فني يعمل أصلاً بالتوكيل) فأخبرني أن كمبروسر التكييف متغير مش بتاعها ومع إن الكمبروسر شغال زي الفل والتكييف 10 على 10 لكن فيه مشكلة في توفيق السير الأصلي مع الحدافة لأنها مختلفة شوية عن حدافة الكمبروسر الأصلي وخيرني إما أمشي حالي وآخد العربية لواحد من بتوع السيور وأركب سير زي اللي فيها (مش أصلي) وده بيشقق بسرعة طبعاً أو أجيب كمبروسر الياريس جديد ب3500 . أو إستيراد . يا ترى فيه حل تاني وهل ممكن تغيير الحدافة فقط ولا لأ ؟!

وعندي برضو الزجاج الأمامي مخبوط وعايز أغيره يا ترى الأصلي بكام ؟! ولو هجيب حاجة غير الأصلي تكون إيه وألاقيها فين ؟!

جزاكم الله خيراً

**saddam** · 23-10-2013 04:57 AM

صديقي المواطن
بالنسبة للزجاج اﻷمامي فتروح الثلاثي في أول الحرفيين عندهم كذا نوع وتختار من أول 450 ولغاية 900 جنيه ومتركبش جريش المصري وفيه جنبه كذا محل لو حبيت تراجع اﻷسعار
بالنسبة للكباس أولا كباس المستعمل التويوتا إستيراد عالتجربة بأقل من 600 جنيه والقصة عندك حلها بسيط
أولا السير عندك لو بيقعد أكثر من 3 شهور فده مش بطال وتجيب سيور محترمة من مملكة السيور في التوفيقية وتاخد إثنين إحتياط كمان في الشنطة مش غالي الكوري ب 25 جنيه ولكن لو بتاكل سير بمعنى بقطع كل فترة مش تقلي تشققات التشققات عيب في نوع السير وليس في زوايا طمبورة الكباس مع الشداد وغيره ولو بتقطع سيور فبسيطة نروح لكهربائي عالي المزاج وتشوف السير بيقطع من أنهي زاوية ويرتب القواعد بتزويد وردة هنا تقليل ورده هناك منفعش حتودي الكباس للخراط يزحفلك مكان القواعد وكله سهل وبسيط والراجل أبو 3500 ده مش عاوزك تسلم عليه تاني مدى الحياة
وبالتوفيق وإلى اﻷمام ومن نصر إلى نصر
ودمتم للنضال

**alalfi** · 23-10-2013 02:20 PM

المشاركة الأصلية كتبت بواسطة saddam

صديقي المواطن
بالنسبة للزجاج اﻷمامي فتروح الثلاثي في أول الحرفيين عندهم كذا نوع وتختار من أول 450 ولغاية 900 جنيه ومتركبش جريش المصري وفيه جنبه كذا محل لو حبيت تراجع اﻷسعار
بالنسبة للكباس أولا كباس المستعمل التويوتا إستيراد عالتجربة بأقل من 600 جنيه والقصة عندك حلها بسيط
أولا السير عندك لو بيقعد أكثر من 3 شهور فده مش بطال وتجيب سيور محترمة من مملكة السيور في التوفيقية وتاخد إثنين إحتياط كمان في الشنطة مش غالي الكوري ب 25 جنيه ولكن لو بتاكل سير بمعنى بقطع كل فترة مش تقلي تشققات التشققات عيب في نوع السير وليس في زوايا طمبورة الكباس مع الشداد وغيره ولو بتقطع سيور فبسيطة نروح لكهربائي عالي المزاج وتشوف السير بيقطع من أنهي زاوية ويرتب القواعد بتزويد وردة هنا تقليل ورده هناك منفعش حتودي الكباس للخراط يزحفلك مكان القواعد وكله سهل وبسيط والراجل أبو 3500 ده مش عاوزك تسلم عليه تاني مدى الحياة
وبالتوفيق وإلى اﻷمام ومن نصر إلى نصر
ودمتم للنضال

شكراً على الإهتمام
طمنتني ربنا يطمنك انا من أول إمبارح متنكد من الموضوع ده .. السير من يوم ماجبت العربية مبيقطعش مشقق بس الحمد لله .

**atala** · 25-11-2013 09:08 PM

طبيعي جدا انك تلاقي كمبروسور الياريس موديل 2009 متغير لأن الموديل ده كان فيه مشكلة في كمروسور المكيف انه صيني خصوصا الموديلات الي جاية من الخليج وتمن الكمرسور جديد في التوكيل فعلا 3500 جنيه والزجاج في التوكيل مش هيقل عن 1300 جنيه ان مكانش اكثر

**أشرف العدوي** · 30-11-2013 07:54 PM

انا عشت التجربة دي الصيف الي فات في يارس 2007
الاول قولت اروح اسأل في التوكيل
السعر مش 3500
توكيل تويوتا ابو رواش
السعر 8750
ايوةزي ما قريتوه كدة 8750 من غير مصنعية التركيب
روحت عند البرجسي في شارع مراد كان بـ 7000 و شوية فكة

المهم نزلت الحرفيين و اشتريت واحد استيراد بتاعها الاصلي كنت عامل موضوع عنه في قسم ياريس و باظ
و الي اشتريت منه كان نصحني في الاول اني اركب بتاع ايكو 2002 و هو بيركب على نفس القواعد بس بيتغير اتجاه خرطوم واحد بيتعمل في المكبس و فعلاً غيرته و شغال زي الفل الحمد لله
و مركب عليه سير كاتينة اصلي و هو بيبقى في ريجلاش المفروض علشان تشد السير ممكن تتحكم فيه

http://www.nilemotors.net/Nile/347188-a.html