ايجار السيارات مشروع ياريت حد يفيدنى فيه

**mimo_mohamed** · 13-09-2008 06:28 AM

انا عندى متسوبيشى لانسر 2008 اوتوماتيك 1600
لسه زيرو مامنتيش عليها حتى
وعايز احطها فى شركه تاجرها منى مده طويله وباعلى ايجار ممكن وتكون مضمونه وامان وترجعلى العربيه بحاله كويسه
انا عرفت ان ايجار لانسر 2008 بيكون 4000 جنيه او 4500 فى الشهر
فى المكاتب بيقولوا 3500لانهم طبعا بيطلعوا بباقى المبلغ ليهم شهريا مكسب
عايز اعرف الموضوع ده كويس امشى فيه
ولا فيه مخاطر خصوصا انى معتمد على التاجير انه هيسد اقساط العربيه
وعايز اعرف ايه الضمانات اللى اخدها ولازم اامن ولا كفايه انه هاخد ضمان من الشركه انها ترجعهالى بحاله كويسه مثلا80%
وطبعا فيه حكايات نصب كتير ومش عايز اقع فيها
عايز النصيحه منكوا
____________
تحذير للعضو من تكرار نشر نفس الرسالة بالعديد من الأقسام الأخرى
الإدارة

**jusuf** · 15-09-2008 01:25 PM

والله ياخي الفاضل هذا الموضوع انا مشغول بيه جدا من مدة ... ولم استقر فيه على رأى .... اضم صوتي لصوتك واطلب المساعدة ... خاصة موضوع المكاتب ... وهل فيه حد عند خبرة فيها .. يعني موضوع الثقة والامانة وعدم النصب او التأخير في الدفع ... رجاء شديد حد يساعدنا وجزاكم الله خيرا...... ورمضان كريم

**yasserayad** · 16-09-2008 12:50 AM

المشاركة الأصلية كتبت بواسطة jusuf

والله ياخي الفاضل هذا الموضوع انا مشغول بيه جدا من مدة ... ولم استقر فيه على رأى .... اضم صوتي لصوتك واطلب المساعدة ... خاصة موضوع المكاتب ... وهل فيه حد عند خبرة فيها .. يعني موضوع الثقة والامانة وعدم النصب او التأخير في الدفع ...

رجاء شديد حد يساعدنا وجزاكم الله خيرا......

ورمضان كريم

+1000000
وانا كمان مهتم جدا معاكم

**Dr.A.Nabil** · 16-09-2008 05:05 AM

المشكله انت جايب العربيه للاستثمار
ولا هاتأجرها فتره وتستخدمها بعد كده

للعلم
أي حد بيأجر عربيه
وبيستخدمها لمسافات وايام طويله
غالبا بيحطلها بنزين 80
عشان بوفر
ماهي مش عربيته
و تولع العربيه مش مهم
تسقف وتكركر
مش مهم

خللي بالك

**jusuf** · 16-09-2008 11:19 AM

الموضوع بختصار شديد انه عندي مبلغ حدود 100 الف جنيه متوفرة ....واحتاج دخل شهري من هذا المبلغ حدود 3 الاف جنيه... ولمدة سنة او ثلاث سنوات ... ودرست بعض الفرص المتوفرة فوجدت ان شراء سيارة وتأجيرها لشركات البترول او عن طريق المكاتب هي الفرصة المناسبة لظروفي ... الستثمار كله مخاطر ومشاكل ...وانا صعب اقف بنفسي على استثمار المبلغ ... اعتقد كده الامر واضح .. هل ممكن حد ينصحني .. اعمل ايه بالمبلغ وانا مستعد لكل الشروط .. وجزاكم الله خيرا وتقبل الله منا ومنكم الصيام والقيام.

**jusuf** · 16-09-2008 11:42 AM

المشاركة الأصلية كتبت بواسطة ahmodium

المشكله انت جايب العربيه للاستثمار
ولا هاتأجرها فتره وتستخدمها بعد كده

للعلم
أي حد بيأجر عربيه
وبيستخدمها لمسافات وايام طويله
غالبا بيحطلها بنزين 80
عشان بوفر
ماهي مش عربيته
و تولع العربيه مش مهم
تسقف وتكركر
مش مهم

خللي بالك

السلام عليكم اخي الفاضل ...جزاكم الله خيرا عل الاهتمام...
يا دكتور أحمد السيارة سوف يتم تسليمها علي الزيرو ... واعادة استلمها بعد ثلاث سنوات بضمان الوكيل ...وكمان المكتب اوالشركة عندها في العقد شرط جزائي .. دفع قيمة المدة المتبقية من العقد اذا ارجعت السيارة قبل نهاية المدة المتفق عليها...وعندك ايصال امانة بقيمة السيارة ... وغيرها من الضمانات التي يمكن ان تشترطها بنفسك في العقد وبوجود المحامي الخاص بك....

...كلام جميل.. لكن برضه عدم الثقة والخوف من تضييع الوقت في المحاكم وشغل النصب

يبقى هو الخوف الوحيد والمستمر في هذه الامور ... وكما يقال ان صاحب القرش جبان كلا م صحيح ..لانه صعب توفر مبلغ وتتعب فيه وتتركه في يد غير امينه.... انتظر المساعدة من اصحاب الخبرة في الاستثمار

وكل من له خبرة في تأجير السيارات..

**ana** · 23-09-2008 05:04 PM

نصحتى ليك انك متاجرهاش لمكاتب تاجير لان فيها مخاطر جامده انا ليا واحد معرفه كان عامل نفس حوارك بس لانسر 2007 وواحد خد العربيه ولغايه دلوقتى منعرفش عنها حاجه العربيه ممكن تتسرق وتترش وتتقطع عشان تتباع قطع غيار فى الحرفييين والله للامانه الموضوع ده شغال اليومين دول على ودنه وبالذات فى اللانسر لان مفهاش عوامل امان خالص لو هتاجرها تاجرها لشركه سياحه فقط

**SmartMega** · 24-09-2008 02:14 PM

نصيحة من أخ اوعي تأجر لمكاتب إيجااار لأن في الغالب اللي بيأجر العربيات دي شباب وطبعا نظام تخميس بالعربية وأمريكاني وبيطلعوا عين أم العربية وأنا بنفيسي أعرف واحد وهو بيخمس العربية اتخبطط منه في الرصيف وجابت مقص ورفرف وحاجات تانية كتير طبعا البية راح خلص الحوار دة بسرعة وعمل اللازمة ودفع 500 جنية ولما راح المعرض كان في زبون تاني مستني العربية ومستعجل فقام واخد العربية في الضلمة ومحدش واخد باله .... نصيحة من أخ لو عايز تأجر يبقي تأجر بس لشركات بترول أو سياحة بيبقي مضمون وأنا ليا واحد صاحبي شغال في شركة بترول ولسة شاري عربية كرولا ومأجرهالهم ب 5000 جنية أو أكتر في الشهر بعقد 3 سنوات وبيبقي إيجار علي نضيف ومضمون وعلي فكرة لازم علشان تعمل الحوار بتاع البترول دة يكون ليك معرفة فيه ... أتمني أكون أفدتك