الموضوع: سارينه فيدرالي لالا

بص مع احترامى طبعا لكلام حضرتك
بس الواصل واصل برضو
و شكرا

شوف يا اخ حسام
الناس اللي انا بتكلم عنهم دول ما بين اقارب درجه اولي و اصدقاء لللاسره يعني انا عارفهم كويس قوي و اقسملك ان الواحد فيهم لما يجي يركب عربيته و يسوق اول حاجه يحط الحزام و لما ييجي يدخل اي لجنه بيعطي انتظار ! عادي جدا
يعني انا قصدي من الكلام ده انه الالتزام حلو و الواحد لما يبقي ملتزم بالقوانين و محافظ علي عربيته و مظبتها كويس امن و متانه وخلافه حيبقي الموضوع سهل و مش حتدي فرصه لاي ضابط عنده مركب نقص مهما كانت رتبته انه ( يتنطط) آسف في التعبير . و لكن الخلاصه اللي انا عايز اوصلها انه علي تجربتي ما بتفريقش اذا كان في التزام طبعا من عربيه راكبها لواء شرطه و عربيه تانيه راكبها موظف او دكتور او مهندس او صنايعي حتي مع احترامي للجميع لانه مش بيبقي معروف مين اللي راكبها او مالهاش هويه مميزه , و النقطه التانيه ايضا انه يجب ان يكون الانسان متواضع و كل ما زادت مكانته كل ما زاد تواضعه و ده بطبقه في شغلي و اننا جميعا ندور في منظومه واحده و كل واحد بيؤدي دوره , و انا هحكي لحضرتك موقف انا عايشته بنفسي و معلهيش طولت عليك , اني انا كنت راكب مع واحد قريبي و هو مسؤل امني كبير و كنا نازلين نزور واحد مريض في المنوفيه و كنا مستعجلين و كنا نازلين بعربيه الشغل بتاعته لانه كان لسه مستلم جديد و ما لحيقش يجيب عربيته و المهم اني انا كنت المرشد و العربيه كان باين عليها انها لشخص مهم و معروف دي بتاعه مين , و المشكله كانت اني نسيت الدخله منين و قعدنا نلف و هو كان عصبي من الموقف و انه كان لازم نرجع قبل الظلام و فجاه الوحي نزل و افتكرت و قلت له الدخله من هنا فقام دخل شمال بسرعه زي ما قلت له بدون ما يدى اشاره او حتي يبين انه عاوز يدخل و الكارثه انه كان خلفنا مقطوره (نقل بالعبور ) سيكس ويل و لما حصل دا قدامه قام ضارب فرامل جامده مع كلاكس مستمر و طبعا لكو ان تتخيلو ا ده عمل ايه عشان يلم نفسه مننا , و ربنا ستر
المهم في الموقف بتاع قريبي و هو ان السواق طبعا تضايق بشده و نزل زعق و قال كلمه سيئه جدا ( شتيمه) لقيته فتح الشباك و قام مشاور للسواق الغاضب بيده معتزرا , اللي انفعل هو انا قمت نازل عشان اتخانق مع السواق لقيته شدني للداخل و زعق فيا و قالي ( ده حقه) و احنا اللي غلطانين.
فالمهم ان الواحد يراعي ربنا عشان يسترها معاه
و اخيرا آسف علي الاطاله و متشكرين جدا

كلامك جميل يا ZOZODERAZ

بس للأسف أغلب الواقع مش كدة

أنا فعلا منكرش اني شفت ناس مراكز ومناصب عليا وعربياتهم وعربيات أسرهم عادية جدا وعلى فكرة ده لما بيبقوا ف مراكز عالية.

بس فيه برضه العكس..ودول الأغلبية..أي ظابط أو وكيل نيابة أو حتى قرايب أي حد ف الشرطة بيبقوا ماشيين على حس فلان ومعاهم الكرت بتاعه يطلعوه ف أي كمين وبيعدوا حتى بعد قوانين المرور الجديدة

المشكلة ف مصر اختراق القوانين من الطبقة الواصلة دي..والأهم ان الكماين فعلا بيعدوهم ده ممكن ميوقفش أصلا عربية شايفها متفيمة ونمرها سودا وعليها النسر خوفا لا يكون صاحبها واصل ويجيبله مشاكل
أصلا انا شفت كمان موقف بعيني..كنت ماشي ف زفة فرح قريب كان تبعهم واحد واصل..عدينا على لجنة..شغل السرينة الفيدرالي دي ومحدش قدر يهوب ناحية الموكب..كان في موكب ف نفس اليوم واحنا بنتحرك بعد كدة..اللجنة موقفة الصف كله وكل عربية صاحبها يدفع الغرامة لما حصلو الافات ف اليوم ده
طب مش ده الظلم بعينه

يا أخي الفاضل داحنا عسكري المرور بيوقفلنا الشوارع والميادين بالخمس والعشر دقايق وانت متعطل عن مصالحك وف الآخر تلاقي عربية ظابط رتبة مش كبيرة للدرجة..ولا موكب ولا حاجة..ويحييه ف الآخر..طب ما ساعدة الباشا يمشي زي ما الناس العادية ماشية..هو هيتخطف..ده محدش يعرفه -أنا آسفة لو كنت محتدة ف كلامي بس أصل المواضيع دي فعلا تنرفز-

على فكرة لو كل أصحاب المراكز والظباط وأسرهم التزمت أتحدى تلاقي أي مواطن تاني مخالف.