الموضوع: طريقة عزل صدر وارضية السيارة (دايو لانوس) . بالتفاصيل والصور

المشاركة الأصلية كتبت بواسطة michohat

موضوع رائع
تسلم ايدك
لا اخفيك سرا اني بتلكك ان مفيش جراج للعربية علشان معملش كده
لاني متأكد اني لو استفردت بها هفككها

حضرتك الارما فلكس جبتها منين
كان عندي حته صغيرة ارما فلكس بس كان في ظهرها لاصق وملاحظ ان الارما فلكس هنا مفيش له لاصق ف ظهره فهل انت فضلت النوع ده في الشغل

الارما فلكس جبتة من شارع نجيب الريحانى فى القاهرة ما بين العتبة ورمسيس
الفرخ تخانتة 9 مم ومقاسة متر فى مترين وسعرة 75ج
وكان بدون لصق ذاتى
اللى بلصق ذاتى دة بيكون المقاسات الرفيعة 3 مم و4 مم

لا
هيكرمش معاك من حرارة الموتور
اصل انا قعدت اجرب كل الافتاكاسات دى مع نفسى
هوة بيعزل حرارة لحد مستوى معين نقدر نقول متوسط

لكن الارما فلكس منة المواسير بتستحمل شوية
عشان كدة تلاقيهم عازلين بعض مواسير التكييف الالمونيوم جنب الموتور بيها

المشاركة الأصلية كتبت بواسطة ahmedsehimy

بعد التحية

انا الصراحة مش متابع كل مواضيعك بس اللي بقراه منها بنبهر بيه جدا زي موضوع سربنتينة السخن و الموضوع ده. احب اقولك انك مبدع و هايل و ربنا يبارك فيك و الاهم ان قلبك جامد

انا عندي سؤال عن المواد يعني انا عايز اعزل صوت لعربيتي النوبيرا استخدم مادة ايه؟؟ انا فهمت ان الارما فلكس ده للحرارة اما بالنسبة للصوت ايه اسم المواد و اجيبها منين و طبعا لو هخلي سروجي يعملي الموضوع ده هيرزعني قد ايه تقريبا (لاني عمري ما اقدر اعمل الموضوع ده).

ودمتم للنضال

اولا متشكر جدا على اطراءك الجميل

ثانيا بالنسبة للارما فلكس هو بالاساس عازل حرارى لكن لما تقفل وتكتمة صح بيبقى عازل صوت برضو بنسبة 50 او 60%

والنسبة اللى انا كاتبها دى حقيقية من واقع التجربة
بس المهم انك لما تيجى تفردة وتلزقة فى صدر وارضية العربية هيبقى كانك بتعزل ضد الهوا
يعنى متسيبش سنتيمتر واحد فية فراغ

لكن المادة اللى اشد منها هيا الصوف الصخرى

بس للاسف ساعة ما لفيت ودورت ملقيتش غير تخانة 5 سم فدى هتعمل مشكلة جامدة فى التقفيل وبصراحة انا تخوفت انى معرفش اقفل التابلوة لان 5 سم مش قليلين

والمفروض ان فية تخانة منة 3 سم بس لما لفيت عليها ملقتهاش فاشتغلت بالارما فلكس وعملت زى ما قلت لك

المشاركة الأصلية كتبت بواسطة ahmedsehimy

طيب اجيب الصوف الصخرى منين...يعني مثلا او تقولي بيباع عند حد بيبيع مستلزمات ايه

فية محلات متخصصة عوازل فقط ممكن تسال عليها
العاشر من رمضان عندنا فيها المحلات دى
والقاهرة هتلاقيهم فى نجيب الريحانى وكلود بيك جنب رمسيس

بس خلى بالك
لو جيت تعمل الموضوع دة عند الصنايعية يبقى فية 2 هيشتغلوا فى العبية
كهربائى عشان يفك التابلوة
وسروجى عشان الفرش

ولو لقيت الصوف الصخرى ال 3 سم بعد ما تلزقة ابقى الزق فوقة طبقة ارما فلكس 4 مم عشان يبقى انت كدة عملت صح الصح ودة اللى انا كنت هعملة لو لقيت الصوف الصخرى

وقبل ما تبدأ شغل فهم السروجى انت عايز تعمل اية ووريلة التخانات اللى معاك
عشان مش بعد ما يفك يقولك لا متنفعش