الموضوع: سيراتو ولا فلونس

المشاركة الأصلية كتبت بواسطة amgomaa

سيراتو هاي لاين ركبتها مع واحد معايا في الشغل لسه شاريها مختلفه تماما عن السيراتو الشكل اللي قبليها وكمان العفشه كويسه جدا وتنك كماليات بجد حاول تركب العربيتين وتجربهم و تشوف انت مستريح لايه اكتر ومتصدقش اللي يقولك عوامل امان الاتنين لو هتشتري الهاي. لاين ٢ ايرباج وفرامل abs ومنضحكش علي بعض فلونس ايه بس اللي اوروبي العربيه في الاصل كوري ومتجمعه في تركيا ومحطوطلها موتور وفتيس ياباني يعني تقريبا تشكيله من كل قارات العالم الا اوربا بس عشان محططوط عليها علامة رينو بقت اوربي انا مبعبش في العربيه انا بتكلم علي اللي ماسك في اوروبي اوروبي مع تمنياتي لك بالتوفيق في الاختيار

يا باشا اللفليونس الهاي لاين فيها 6 أيرباج مش 2 بس....

و للعلم رينو تمتلك حصة فى نيسان و سامسونج و داتشيا..........لو مش هتستفيد من الكلام ده يبقى شركة فاشلة.

زي بالظبط كده فولكس فاجن جروب......بتلاقي شاسيه معين فى أكتر من موديل فى شركات مختلفة........و موتور الأساس بتاعه هو هو........بس كل شركة عاملة فيه شوية شغل علشان يناسب موديلها........دي حاجة طبيعية دلوقتي.

الأوروبي فى الموضوع هو ال standards و ال quality control و ال quality assurance .

المشاركة الأصلية كتبت بواسطة hugan

نغمه اوروبي وكوري
اظن انتهت من كل دول العالم
مش موجوده غير في مصر

يا باشا مش هتنتهى طالما الكوري بينزل فى مصر حسب مواصفات الشركة اللى واخدة التوكيل.

شيل الأيرباج يشيل الأيرباج.............شيل ال ABS يشيل ال ABS الخ.

الميجان كانت بتنزل فى كل دول العالم ب 6 أيرباج ABS تجهيز أساسي......مفيش وكيل يجرؤ يفتح بقه و يقول نزلوهالي ب 4 أيرباج بس.

المشاركة الأصلية كتبت بواسطة devil_storm

سيراتو الجديده رائعة و ناعما جدا مقارنتا بالشكل اللي قبليها و فيها كميه اوبشن كتير جدا غير خامتها الداخليا من اول فئة sx ممتازه و تسارع و اداء عالي جدا. كمان شبابيه جدا عن الفلوينس

السيراتو sx تتميز عن الفلوينس
ماتور و تسارع قوي - تكييف ثلاجة - اوبشن اكتر - اعتماديا اعلي - شكل داخلي و خارجي اجمل بالفوانيس الليد - فتيس افضل - صيانه اسهل - سعر اعاده بيع افضل - شكل احدث و قدامه ٤ او ٥ سنين

الفلوينس تتميز عن السيراتو
للاسف مش لاقي حاجه واحده حتي الخامات السيراتو sx تتفوق!!!



تصميم اجمل و احدث interior and exterior و لمسات جماليه بالنواكل و اوبشن اكتر و كل حاجه لصالح السيراتو و عذرا للفلوينس

أنا هرد عليك فى الموضوع ده......

دي كماليات الفليوانس من على موقع رينو ( أعلى فئة)

1- جنوط 17 رياضية
2- أنظمة الفرامل التالية ABS, EBD & BAS ( Brake assist system)
3- طنابير خلفية سكاكين
4- 6 أيرباج ( راكب أمامي - سائق - ستائر جانبية للراكب الأمامي و السائق - ستائر جانبية للركاب الخلفيين)
5- أموبيليزر ( بيغني عن جهاز الأنذار)
6- تكييف ديجيتال ديوال زون مع مخارج تكييف خلفية
7- 4 أزاز كهرباء بلمسة واحدة
8- فتحة سقف كهرباء ( مع ملاحظة أن الأزاز و فتحة السقف فيها خاصية ال anti-Pinch اللى بتخلى الأزاز أو الفتحة يقف تلقائي لما يكون فيه حاجة بتعوقه ( أيد طفل صغير مثلاً)
9- مفتاح زكي ( بصمة كما يقال عنه ) و ممكن تفتح العربية أو تدورها و تسوق و المفتاح فى جيبك.
10- باور كهربائي متعدد المستويات ( بيتقل مع السرعات)
11- إمكانية تحريك الدركسيون فى 4 إتجاهات....فوق و تحت و ورا و قدام
12- أنوار زينون أمامية مع ليدات ( الأنوار بخاصية auto height adjustment 9)
13- خاصية أضاءة الأنوار أوتوماتيكياً فى الليل أو عند الدخول فى المناطق المظلمة.
14- خاصية تشغيل المساحات تلقائياً عند هطول الأمطار
15- خاصية follow me home اللى تخليك تقدر تسيب النور العالى منور لمدة دقيقة على ما افتكر بعد ما تقفل العربية لحد ما تنزل و تشيل حاجاتك و تدخل بيتك ( مفيدة فى المناطق المظلمة أو عند إنقطاع النور)
16-خاصية تشغيل الأنورا عن طريق الريموت
17- فوجات أمامية مع ليدات.
18- مراية جانبية طي كهربائئ مع خاصية أذالة الرطوبة
19- مراية صالون ذاتية التعتيم.
20- مثبت و محدد سرعة ( المثبت بيفرق عن المحدد)
21- باركنج سيسنور خلفى
22- كمبيوتر رحلات بيعرض 6 شاشات معلومات ( غير شاشة التحذيرات و مواعيد الصيانة)
23- راديو و سي دي و MP3 و بلوتوث مع 6 سماعات مع مخرج AUX و تحكم فى النظام الصوتي من عجلة القيادة.
24-درج تابلوه ثلاجة.

ده اللى أنا اعرفه.....و إحتمال يكون فيه حاجات تانية أنا مش فاكرها.

المشاركة الأصلية كتبت بواسطة devil_storm

تكييف السيراتو لا يقارن بالفلوينس تكييف السيراتو افضل كتير عن تجربه طبعا
انا واحد صحبي معاه الفلوينس و دايما يشتم في تكيفها ... لازم مشوار طويل و طريق سريع علشان يبرد كويس و ارفان جدا منه في الزحمه و كل شويه يعملوا صيانه بس دي الفلوينس ٢٠١٢ معرفش بقي التكييف في الفيس لفت نظامه ايه و هل اتغير فعلا ولا لا

ممكن يكون كلامك على قبل الفيس لفت......في الفيس لفت التكييف هو هو تقريباً بتاع التيدا و القشقاي.

مع العلم أن موضوع التكييف ده موضوع نسبي يفرق من شخص للتاني

معانا واحد فى القسم هنا دايماً شايف أن تكييف الميجان أقل من المقبول و أنا شايفه جيد........و معانا واحد تالت شايفه جيد جداً.

ماشي نقارن سيراتو sx مع فلوينس e3 و الاتنين سعرهم واحد ١٧٩ الف


السيراتو تزيد عن الفلوينس ( ده اللي فكرو دلوقتي):
فوانيس ليد خلفيه
Power steering يمكن التحكم فيه normal - sport - comfort
سنسور امامي
انذار
جنوط اسبور ١٧ شكلهم تحفة


خاصية ال welcome light ان المرايات و الاوكر تنور و المرايات تتفتح لما تقرب من العربيه
اوكر نيكل و شكمان نيكل و دفيوزر رياضي
تحكم في فقرات ظهر كرس السائق كهريائيا
مرايات باناره ليد



أنا مش عارف أسعار السيراتو........بس من كونتاكت كارز مفيش 179..........أول حاجة فيها جنوط 17 ب 185 تقريباً....هل دي الفئة اللى بتتكلم عليها ؟

و عموماً..........الجنوط ال 17 فى مصر مش ميزة

كمبيوتر السيراتو متطور عن كمبيوتر الفلوينس و ممكن تتحكم في حجات كتير في العربيه ذي طريقه فتح و غلق البيبان - طريقة الاضاءه - مواعيد السيرفيس - ...

ممكن توضيح ؟........يعني أزاي بيتحكم فى طريقة فتح و غلق الأبواب.....و أزاي بتتحكم فى مواعيد السيرفس ؟ يعني المفروض تكون السيرفس بعد 10 أنت بتقول لأ أنا عاوزها بعد 15 ألف ولا أيه ؟


الفلوينس تزيد عن السيراتو
ستاير جانبيه و خلفيه


لا يا باشا دي بانت و طول عمرها باينا خش علي مواقع تقييم الاعتماديه و قلة الاعطال العالمية و اقرا شويه شوف مثلا j.d.power ، كمان السيراتو نفس ماتور و فتيس و شاسيه و نظام تعليق و تكييف الالنترا و شوف اعتماديه الالنتر اد ايه

تاني.......موقع JDPower ؟

بنفس المنطق...........الفليوانس نفس فتيس و موتور التيدا.......ادخل شوف إعتمادية التيدا


خامات الفلوينس حلوه بس تصممها عقيم مثال صغير قارن كنسول الفلوينس بكنسول السيراتو - شوف شكل الكاسيت هنا و هنا - شوف شكل الفتيس هنا و هنا - سوق العربيتين بليل و اتفرج علي الاضاءه ال red الجميله في السيراتو مقارنتا بالفلوينس - قارن شكل الطاره بالليل هنا وهنا - شوف النواكل متوزعه بدقة و عنايه ازاي في السيراتو مقابل الفلوينس

هو حضرتك مش شايف ان التصميمات دي بتبقى أذواق ؟ ولا دي مش واردة ؟



انا معرفش الفتيس الجديد للفلوينس لكن انا الفتيس cvt مش بيعجبني من ايام اللانسر بوما
انا بيعجبني الفتيس العادي ال ٦ سرعات اداءه جميل و مشكله قليلة
و فتيس الفلوينس القديم وحش و في مشكله النتشة بين الاول و التاني و اربع سرعات بس

يا باشا أنت مش بيعجبك...........هل ده معناه أن الفتيس وحش ؟
و تاني جملة دي....هل معناها أن ال CVT مشاكله كتير ؟؟؟ تعرف كام واحد معاه لانسر بومة حصله مشكلة فى الفتيس ( بفرض أنه نفس الفتيس اللى نازل هنا هو اللى نازل هنا..........و برضه بفرض أن الفتيس اللى نازل من 8 سنين أو أكتر لسه محصلش فيه تعديلات خالص)

فتيس الفليونس القديم مش وحش ولا حاجة............و نفس النتشة اللى أنت بتتكلم عليها موجودة فى عربيات تانية كتير أشهرهم الأوبل الأسترا...........دي طريقة عمل الفتيس كده.......مش معناها أنه بايظ.

و معاك أنه أربع سرعات بس و دي الحاجة الوحيدة اللى تخنق فيه.

معلش لو حد حاسس أن ردي غلس شوية..........أنا أكتر حاجة أكرهها في حياتي أنك تبنى تقييم المفروض أنه يفيد حد أو على الأقل هياخد قرار على أساسه بناء على ذوق شخصي و ده بيختلف من شخص للتاني أو مجرد علشان أنت سمعت حاجة أو علشان أنت مجربتش.

أنا متفرقش معايا العربية خالص حتى لو طلعت صفيحة زبالة متنقلة.....بس يكون عن حق مش عن تحيز أو عدم معرفة.

المشاركة الأصلية كتبت بواسطة zangry

الجنوط الـ17 معدتش بتنزل وبقت 16 في الهاي لاين بس الباقي كله صح ودى غلطة من الموقع

مش متأكد طبعاً من الموضوع ده.....يمكن يكون كلامك صح

بس المواصفات دي بتاعة الفئة es4 اللى هي ب 200 ألف جم و بتكون بفرش جلد بيج.