الموضوع: إمبارح غيرت جوان وش السلندر

إمبارح غيرت الجوان من غير مقدمات. المية مكنتش بنقص ولكن من يومين لقيت القربة فاضية خالص مع إن حرارة العربية عادية ومابتوصلش 95 خالص ولا يوجد أى تسريب فقلت اشيك على الزيت لقيته عامل زى الطحينة بس على خفيف أوى وكمان لقيت آثار طحينة خفيفة علي غطاء الزيت من تحت والسحب كان بدأ يكون وحش أوى. الميكانيكي فك البوجيهات لقينا آثار مية على بوجيه واحد منهم ولون الشمعة محمر. اشتريت جوان جديد بيقولوا عليه انجليزى بس مش مكتوب عليه بلد الصنع وشكله تايوانى وهو ده احسن حاجة لقيتها فى الزقازيق وجبت طقم جلد صبابات وطقم بوجيهات 2 شمعة وبالمرة غيرنا جوان الفرن وكان في مسمار مكسور فى الفرن عملته بالمرة و مسحنا الوش فى المخرطة.
الحكاية دى كلها أخدت 5 ساعات واتكلفت 750 جنيه وكمان غيرت أويل سيل اﻷسبراتير علشان لقيت إمبارح زيت كتير على الموتور جاي من ناحية اﻷسبراتير. بعد الشغل دى الحمد لله السحب اتحسن أوى بس لسة هراقب المية أشوفها عاقل ولا ﻷ.
دلوقتى لية سؤالين أولا: هل لازم أغير زيت الموتور ﻹن الميكانيكي قالى مش لازم ﻹن المية اللى فى الزيت هتتبخر مع الوقت.
ثانياً: أثناء الشغل سلك بوجيه خرج من الجلدة اللى راكب فى البوجيه والميكانيكي ربطه تانى بالضغط فهل أغير السلك ده أفضل وأجيب جديد ولا إستيراد. وشكرا لكم