كنت هعمل حادثة تاني بس ربنا ستر .............

**dr_abooody** · 13-09-2008 06:46 PM

من شهر كنت على الدائري و كنت ماشي بال 128 بتاعتي على 90 و فجأة لقيت حاجة كدا زي صخرة كبيرة في الحارة الشمال روحت كابس فرامل و شلت رجلي بس الفرامل بتخلى العربية تحدف شمال جامد كأنها بأمرك كدا روحت خابط في السور الخرسانة و اتقلبت و الحمد لله ربنا نجاني انا و العربية بصراحة كانت القلبة الكوتشات في السما و راسي في الارض up side down يعني و ربنا عداها على خير و صلحتها و روحت لميكانيكي ظبط الفرامل و غيرت 4 تيل امامي و خلفي و المهم الفرامل بقت حلوة و كويسة و احسن من الاول بكتير و مكنش في حدفة

النهاردة و انا ماشي على الكورنيش في هدوء و سلام و مشغل القران هوب واحد بتاع ميكروباس كان راكن و اتحرك فجأة ادامي و كان جمبي مرسيدس المهم روحت كابس فرامل اني اهدي راح عاملة صوت الكاوتش دة اهههههئ و العربية راحد عاملة كدا بردة تحدف شمال بتأمرك يعني و كنت هخبط في المرسيدس راح الراجل موسع روحت عديت و ربنا ستر وسيطرت على العربية

دلوقتي لية بتحدف تاني مع اني مغير حاجات كتير ايام الحداثة الاولى مغير 2 مساعد امامي و مقص خلفي
و العربية بتمشي مسطرة دلوقتي و جربت تغيير حكاية الكاوتش اليمين مكان الشمال و اللي ورا ادام بدلتهم يعني كلهم
يعني المشكلة في الفرامل بس يا ترى ممكن تكون اية المشكلة دة هل ماستر عمومي و لا المواسير مش نضيفة و لا اية بالظبط و لا كبس الفرامل بيخلى العربية تحدف و لا اية يعني بجد انا من زمان و الفرامل دة تعباني و مش عايز اركب العربية تاني غير لما اصلحها

مع العلم ان الحدفة الشمال عاملة زي الشعرة ساعة تروح و ساعة تيجي
مش موجودة دايما لاني مشيت بالعربية كتير بس حصلت في موقفين الموقف دة و كنت مرة ماشي في شبرا و بردة اللي ادامي و قف فجأة روحت دايس فرامل و حدفت شمال بردة

و جربت كدا في اماكن فاضية و اجيب 80 و اكبس تقوم بحس ان الحمل كلة بيروح على الكاوتش الشمال الامامي و تبقى عايزة تحدف
و ربنا يستر علينا كلنا

**WalidAdel** · 13-09-2008 06:56 PM

هو من كلام حضرتك في مشكله في الفرامل و انها في فرده بتمسك متاخر عن بفيت الفرد مما يؤدي الي حدفه الشمال اللي حضرتك بتتكلم عليها
العيوب بقي ممكن يكون الماستر بتاع الفرده نفسه هوه اللي بيتاخر في الفتح بس بقي السؤال انهي ماستر بتاع انهي فردي هنا السؤال اللي انا نعرفوش و تقريبا يتعرف بعد فك ماستر ماستر و الميكانيكي يجربوا
و الله اعلم

**dr_abooody** · 14-09-2008 02:08 AM

اية يا جماعة محدش عارف ممكن السبب يكون اية

**Abdo_Eldesokey** · 14-09-2008 05:30 AM

أنا الحكاية دي حصلت معايا في عربية جدي الـ 132

مع الفرامل بتحدف شمال ... بس مع التعود الواحد خد على الموضوع وبقى بيعمل حسابه

**medomada** · 03-10-2008 09:22 PM

الموضوع ده حصل معايا فى عربيتى ال 127 و دوخت لحد ما عرفت السبب
طبعا معرفش عربيتك فيها نفس لمشكله ولا لأ
المهم المشكله كانت خدش فى القنطره ورا فا كل ما افرمل العجله الخلفيه اللى عنده الكسر تتحرك من مكانها نتيجه مقاومه الأرض ليها و بالتالى العربيه تتجه للشمال
و ده بيبان فقط عند السرعات العاليه و الفرمله
طبعا بعد ما اكتشفت كده لحمت القنطره و ضبط زوايا و بعدها أصبح كله تمام و ذلك بدون عمل أى شىء فى الفرامل
لاحظ ان العربيه كانت 127 يعنى مش بالضروره ده يكون السبب عندك لكن فقط اكشف على الجزء الخلفى.

**Ahmed Selim** · 03-10-2008 09:28 PM

بص على مساتر العجل اليمين لأن لو ماستر بايظ يبقى فى عجلة يمين مش هتمسك زى الباقى وبالتالى العربية تحدف شمال

غير كده بص على خراطيم الفرامل برضه ويستحسن تغيرها لأنى معتقدش أنها غالية