الموضوع: اختبار الكوروﻻ 2014 في المطبات

المشاركة الأصلية كتبت بواسطة psycholain

بسم الله الرحمن الرحيم
بما ان موضوع ارتفاع العربية كان عاملي هسهس و مخوفني جدا ، فقررت اني اختبر عربية صديق ليا استلم امبارح.
و انا بصراحة طلبت اني اجربها بنفسي ، انا مش هتكلم علي الوهم بتاع العربية بليل مع الاضاءة الزرقاء و شكل التابلوه، سيبو الكلام ده مفاجئة ليكو لما تستلمو و تركبوها احساس فظيع بجد.
التجربة كانت في مصر الجديدة و بالتحديد ناحية شارع عمار ابن ياسر و بالتحديد في شارع جانبي عند بيت صديقي فيه مطب وحش جدا و هو بيحك فيه كل يوم بعربيته المازدا 3 وهو راكب لوحده و طبعا كان فيه مطبات كتيرتانية جربت عليها العربية بس كان ده اوحشهم.
و المفاجئة وانا قلبي كان بيدق جامد ﻷني كنت واخد قرار لو حكت هعييد نظر في شراء العربية.
المهم كنت راكب انا و هو بس للاختبار و بدأنا في مطبات عادية الاول و اخدت المطب و محكتش خالص جربت علي كده في 3 مطبات و اخدتهم كلهم عدل و مش بزاوية كمان وكمان جربت اخدهم بضهرى زي الفل برضو.
المهم جينا علي المطب المتوحش و هوصفهولكو هو مطب رفيع مش عريض و كمان عالي و باين عليه اثار تكحيت عربيات و انا مصوره كمان و هو بنفسه اكدلي انه بالمازدا 3 لو راكب لوحده بيحك.
المهم اخدت المطب براحة و محكتش خالص رحت راجع عليه بضهرى محكتش و قلت اجرب تاني محكتش برضو.
المهم مهديتش الا لما ركبت مراتي كمان عشان نبقى 3 في العربية و الحمد لله محكتش ولا مرة و كمان من غير ماخد المطب بزاوية وﻻحاجة.
وكمان نزلت بالعربية و خليته يطلع علي المطب واحدة واحدة عشان اتفرج علي الخلوص للعربية في كل الاماكن ، و طبعا شفت التصفيح الفظيع بتاع العربية و صورت خلوص العربية من علي المطب من الاكطدام الامامي قبل العجل و بعد العجل و في نصف العربية و في اخر العربية، في وجهة نظرى مش وحش خالص بالنسبة للمطب ده، و الكاوتش كان مضبوط علي 30.
فبصراحة انا اتطمنت علي المطبات الله اعلم ممكن سواقتى هادية و ممكن لو حد تاني حامي شوية تحك بس انا برضو المطبات التانية العادية جربت اخدها بسرعة شوية و كانت تمام.
و طبعا مقولوكوش بقا جربت البلوتوث و الاوتوبارك فاجر جدا و عرف يركنى في مكان ضيق نسبيا. و الباركنج سنسور رائع بالزات الامامي بيجيب من الجنب كمان مش قدام بس و بيرسملك شرط تدل علي المسافة مع صوت تحذيرى.
و اختبرت ال esp و ال trc بصراحة الواد كان هيعيط منى بس كنت نفسي اجربهم.
العربية مكلبشة علي الارض بجد فعلا غير 2011 اللي معايا.
لما قفلت الزجاج حسيت اني في عالم تاني و لو فيه قنبلة برة مش هسمعها بلا مبالغة.
دوست علي السبورت موود حسيت ان العربية بقت طلقة بمعني الكلمة فعلا فليتضخم الوحش .
حاجة اخيرة العربية واسعة جدا جدا جدا جدا و لو حبيت اقول من هنا للصبح مش هيكفي انا جبت الكرسي الامامي ورا خالص و بصراحة مكنتش طايل الدواسات و ورايا كان لسة واسع جدا .
بجد بسم الله ما شاء الله و الموضوع كان راعبني من كلام الناس بس و كنت فاكر انها هوندا من كتر التحذير من الانخفاض بس الحمد لله طلعت كوروﻻ مش هوندا ههههههههه
تقبلو تحياتي و جاهز لكل الاسئلة.

الحمدلله....أختيار موفق جدا و ربنا يتمملك الأستلام على خير و تفرح بيها و ألف مبروك مقدما