الموضوع: سؤال هام لملاك بيجو 301 بخصوص عزل السيارة

المشاركة الأصلية كتبت بواسطة Akram.Gamal

مرحب برجوعك يا احمد

اعتقد ان لو الموضوع بسبب النفشه يبقى مفروض انه ده طبيعى و مش هيروح بتبديل مكان الكاوتش
و العربيه اصلا جديده مش محتاجه ولا ترصيص ولا تبديل ولا ايه ؟

و لو سمحت طلب
ياريت موضوع عن التامين على السيارات

أهلاً يا أكرم. :)

النقشة بتبقي السبب المحتمل و الرئيسي في حالة لما يكون عندك صوت ونة بيظهر علي سرعة معينة,,
في رينچ زي من ٨٠ ل ١٢٠ بعد كدا تختفي صوت الونة دي,,

ومش بتظهر علي السرعات التانية العالية أو الأقل,, ودي اللي كانت عندي وراحت وعند عمرو السقا,,
يعني لو نفس الصوت الونة دي مش بيظهر علي ١٣٠ وبيزيد معاك وانت بتزود سرعة متبقاش مشكلة عزل هواء,,


يعني عشان نبسطها أكتر,,
(١) فيه فرق ما بين صوت الهواء الخاص بالعزل واللي بيظهر غالياًبعد سرعة ١٥٠,,
دا بيبقي صوت خاص بعزل وتقفيل العربية والكاوتش اللي في الابواب ما بين الباب وجسم العربية.

(٢) وفيه الونة اللي بتظهر علي رينچ سرعة من ٦٠ إلي ٩٠. أو من ٨٠ إلي ١٢٠,,
دي ونة صوت خارجة من نقشة الكاوتش وأحتكاكه بالأرض علي سرعة معينة,,
ودي حصلت لي اول ما غيرت من كاوتش Good Year الفرنساوي اللي كان نازل مع العربية وجبت Kumho فيتناني سمعتها ما بين سرعة ٨٠ ل ١١٠
وقبل السرعتين دول أو بعدهم مكنتش بتظهر, وضايقتني وقتها لاني فكرت انها في خامة الكاوتش ومش هتروح, لكن راحت بعد حوالي ٢٠٠٠ كيلو لوحدها.

فهيا بتروح لوحدها مع الوقت لما كل الكاوتش بيبقي بسوا واحد,,
أو لما تعمل Tire rotation وتغير أماكن الكاوتش عكس بعضه.

وحاضر هعمل موضوع عن التأمين قريب جداً إن شاء الله.

المشاركة الأصلية كتبت بواسطة amrelsaqqa

مبروك يا ابو حميد ، كفارة يا ريس :d

انت قلت نقطة مهمة على فكرة في موضوع الكاوتش

المشكلة اساسا انى فعلا غيرت فردة لان الفردة الامامية يمين اتقطعت من ازازة تخينة في رابع يوم للعربية ، ومن ضمن العين اللى العربية كانت واخدها :(

المهم جبتها جود يير من عند مصباح اللى في 7 شارع السودان ، وهى نفس النقشة ونفس المنشا وكل حاجة بالظبط ، ولكن للاسف لان كان كل همى انى الاقى الفردة و كمان اعتمدت على انى المفروض جايب من موزع محترم ، نسيت ابص على تاريخ الانتاج ، ومشيت بيها بتاع 1000 كيلو وبعدها جيت ابص عليها لما حسيت ان الاي بي اس بيبقى بيشتغل اكتر من الاول شوية ، لقيتها من اخر 2011 يعنى للاسف تعتبر قديمة جدا

انا من يوم ما الفردة الاصلية اتخرمت وانا كنت مستخسر انزل الاستبن والعربية كانت لسة 250 كيلو :(
فخليتها زي ما هى وقلت اسيب الاستبن زيرو



كويس انكوا فتحتوا الموضوع انا اتكدرت جدا يومها بس كنا في عيد وقلت لازم بعد ما ارجع اتخانق معاهم ، ورجعت قلت ولا هعرف اعمللهم حاجة

المهم على ما اجازة العيد خلصت الواحد كسل واتلهى ونسى الموضوع وكل اللى عملته انى رجعتها ورا عشان لو ناشفة شوية ما تأثرش على الفرامل واداء العربية

الفكرة بقى الفردة الجديدة دى سواء وهى قدام او هى ورا ، الصوت موجود

بس مش فاكر خالص انى كنت بسمع الصوت ده قبل ما اغير الفردة ، وفي نفس الوقت مش عارف هل ده بسبب انى كنت لسة مش ملاحظ العربية اوى ، ولا فعلا الصوت ده ظهر بس مع تغيير الفردة ؟


عموما هجرب حاجة وهى انى هخلي الفردة دى ع الشمال واشوف الصوت هييجى من الشمال ولا لا

الله يبارك فيك يا معلم. :)

وطالما أنت بتقول مش فاكر الصوت كان موجود قبل كدا ولا لأ,
وكمان إن الصوت بيظهر في رينج سرعة معين ومش بيفضل يزيد,,
يبقي كدا زي ما قلت لك يبقي من خامة ونقشة الكاوتش,,
ومالوش دعوة بالعزل لأنه لو من العزل كان الصوت هيفضل يزيد معاك طول مانت بتزود سرعة,,


أنا غيرت الكاوتش الأصلي بعد 5 سنين من تاريخ الأنتاج, يعني كتر خيرة كان بدأ ينشف ويبقي مش مريح,,
ولما جبت الجديد كان ناعم أووي وزي الفل, وبعد أقل من 200 كيلو بدأ يعمل صوت الونة دي وكان من ورا برضه,,
بس بعد حوالي 2000 كيلو تقريباً راحت ال ونة دي وظبطت لوحدها,

وزي مانت فكرت, طالما عندك كاوتش اللي هوا 2011 دا, خليه ورا,,
وهات اللي ورا قدام, عشان تبقي مأمن نفسك أكتر,,
وفكك من أنك تخلي الأستبن زيرو,, لو الأستبن تاريخ أنتاجة 2012 أو 2013
حط مكانة الفردة اللي 2011 وخليها أستبن,, وخلي كل اللي العربية ماشية بيه الكاوتش الجديد بس,,

ومتكدرش نفسك ولا حاجة ياريس,, مفيش حاجة مستاهلة,
ومفيش حاجة بتفصل زيرو أو سيلمة ولا بتفضل علي حالها في البلد دي,,
بس أهم حاجة الستر علي الطريق.

المشاركة الأصلية كتبت بواسطة amrelsaqqa

يا سلام على كلامك والله انت كلامك بيريح الواحد جدا ، ربنا يكرمك بجد :)

ربنا يخليك يامعلم,
ربنا يكرمنا ويكرمك يارب,

المشاركة الأصلية كتبت بواسطة medori

حمدا لله على السلامة يا أبو حميد، نورت القسم من تانى
دلوقتى فى ناس تانية مشاركين فى الوضوع من الاول و عندهم نفس المشكلة من غير ما يغيروا الكاوتش، مش ممكن تكون حاجة تانية فيها مشكلة؟ انا معلوماتى فى الموضوع دة قليلة شوية، مش ممكن تكون بلى العجل مثلا؟

الله يسلمك, والقسم بنور بناسه وبمشاركتكم :-)

اللي عنده نفس المشكلة بنفس الوصف بتاع عمرو أنها تيجي علي رينج سرعة معين وقبل الرينج دا وبعده مفيش صوت هتبقي مشكلة كاوتش,,
مش مشكلة عزل ولا بلي عجل,,

لأن حتي عمرو ملاحظش الصوت غير بعد ما غير الفردة بواحدة تانية,,

بلي العجل هيعمل صوت دايم لو كان خشن وهيزيد مع السرعة, مش هيبقي في رينج معين ويروح,,
والعزل السئ هيعمل صوت هواء من بعد سرعة 150 مثلاً ويزيد برضه مع السرعة,,


ممكن نقول نستني شوية لحد ما الكاوتش يتظبط كله ويبقي بسوا واحد,, أو يطبع لو كان اللفظ صح,
لأن دا اللي حصل معايا بعد ما جبت الكاوتش الجديد,,

أنت أيه أخبار العزل والسحب معاك ؟
وهل فيه صوت علي سرعة بطيئة أو عالية ؟؟