الموضوع: @@ تقييم البيكانتو 2008 بعد 3500 كم @@

بسم الله الرحمن الرحيم
تقييم البيكانتو 2008
اسمحوا لي في البدايه اوضح اني هقتبس العناوين الرئيسيه من موضوع للعضو ahmed_su(من موضوع تقييم السيراتو بعد 1000 كم بالصور ) للتسهيل علي نفسي في الكتابه وحتي لايحدث لبس او انسي بعض العناوين........

1-المحرك: 1100 cc من صنع شركة هيونداي وموجود عليه علامة هيونداي علي الجانب الايمن للمحرك (مش عارف مخبينها ليه) ... المحرك هاديء الصوت تماما حتي 3000 لفه في الدقيقه ثم بعد ذلك يعلو صوته (بس مش قوي يعني)
السحب ممتاز جدا ومش بحس انه 1100 خالص ... استهلاك البنزين لسه ماحسبتوش بس اعتقد انه كويس.

2-الفتيس: 5 سرعات مانيوال سهل جدا في النقل وده اكتر حاجه بحبها في العربيه
تحس ان النقله بتروح لوحدها .

3-العفشه والتعليق: العفشه كانت ناشفه الي حد ما اول ماستلمتها بس بدأت تلين وتطري... والعربيه عاليه عن الارض ومن الصعب تماما انها تحك في اي مطب (ساعات بيركب معايا فيها ثلاثه اوزان تقيله فوق ال95 كيلو وعمرها ما حكت في اي مطب)...

4-الباور: كهربائي وجيد ماتحسش انه تقيل .

5-الفرامل: جيده جدا علي ال1100 بس المشكله اني بحس ان التيل خشن شويه يعني لما بدوس فرامل بسمع صوت الفرمله مش صفاره ولكن صوت خشونه طفيفه.

6-الثبات:جيد جدا انا جربته لغاية 140 كان كويس وافضل من عربيات كتير ركبتها قبل كده ...بس العربيه بتبقي غير مستقره في الطرق الغير ممهده لو مشيت عليها بسرعه(بحس انه بتتنطط).

7-الابعاد: جيده جدا وعمليه بالنسبه لوسط المدينه .

8-المقاعد: الاماميه مريحه جدا ولكن الكنبه الخلفيه كانت عايزه تتنجد شويه ولكنها جيده.

9-التقفيل الداخلي:ممتاز جدا علي الرغم من ان الخامات بلاستيكيه ولكنها نظيفه جدا وتحس فيها بالاناقه والبساطه ... والعدادات واضحه واللون البرتقالي فيها فاجر جدا.

10-الشنطه:مش هتكلم فيها لأن حجمها واضح من حجم العربيه.

11-التكييف:بشغله علي 3 في الظهر وبالليل 1 ...هو كويس بوجه عام بس مش جامد قوي والتأثير طفيف جدا علي سحب الموتور.

12-النظام الصوتي:طبعا العربيه من غير كاسيت بس ركبتلها واحد سوني سنتريت عامله 700 جنيه (الصراحه شكله عجبني جدا) والسماعات صوتها كويس قوي لغاية 30 درجه بعد كده بيقل كفاءة الصوت.

13-العزل:ممتاز جدا لاتشعر بأي شيء بمجرد غلق الزجاج تحس انك في دنيا تانيه.

طبعا العربيه فيها 2 زجاج كهربائي فقط وكمان ركبتلها سنتر بريموت وفرش جلد ودواسات محترمه وربنا يبارك.
اي سؤال تاني انا تحت الامر.............

alf mabrook
its nice car picanto
rabna yabareek