الموضوع: قصص حقيقية عن الحسد .. اللهم احفظنا من كل شر

المشاركة الأصلية كتبت بواسطة anaslbda

أفتكر من حوالي سنتين أحد الزملاء ورث مبلغ محترم من والده الله يرحمه, وجاب مرسيدس c200 موديل 2001, أوّل ما جابها الشغل ابتدت تعليقات من نوع "مرسيدس مرّه وحده!, الله يرحم ايّام الصني! , ما تجيب لفة يا عم"
سبحان الله جايين نطلع بيها آخر اليوم, العربية حالفة ماهي دايرة! في ايه يا عم الحج؟ أتاري العربية جابت مارش. وروحنا قطرناها للحرفيين وغيّرنا مارش ب 600 جنيه.

مشاركة حضرتك خلتنى افكر هل فعلا دبح شئ او اخراج شئ لله عند شراء شئ او حدوث مناسبة سعيدة ممكن يمنع الحسد؟!

المشاركة الأصلية كتبت بواسطة ahmed4000

انا اعرف واحد بيقولى انه بيحسد نفسه مبيحسدش الاخرين
يعنى لو قال العربية شايلانى وعمرها معطلت ميعديش يومين الا وتبوظ
:)

ده ينطبق عليه مقولة ما يحسد المال الا صاحبه

المشاركة الأصلية كتبت بواسطة a.saad

اول ما جبت العربية
واحد صاحبى شافها فى الشغل وانا خارج معاه على رجلى من المبنى وبعدى الشارع
اتكعبلت فى جنزير من الحواجز اللى بتوضع لعدم ركن السيارات ووقعت على وشى
رجلى اتجبرت 3 اسابيع
و3 شهور علاج طبيعى
الحمد لله ان الشارع كان فاضى من العربيات
الشارع ده شارع رمسيس بعد الاسعاف بشوية

لا حول ولا قوة الا بالله
المشكلة ان موقف زى دة عمره ما يتنسى

المشاركة الأصلية كتبت بواسطة a.saad

واحدة زميلتى لو دخلت عندها الغرفة فى الشغل
وخطيبتى ادتنى رنة
يبقى احلى خناقة اليوم ده

بلاش تقولها خطيبتك يا عم
قولها ده واحد صاحبى وعايز فلوس هههههه

المشاركة الأصلية كتبت بواسطة الاستاذ

فى حجات بتبقى صدفة وحجات حسد بجد
يعنى واحد يروح يعك فى الاكل وهو راجع شاف جاره وسلم عليه فى الراجل تعب قالك دة عين جارى
مع انى السبب انى هو عك فى اكله او واحد مثلا لسة مشترى عربية جديدة وتتخبط يقلك انا اتحسدت
لكن ميقلش انى السواقة فى مصر زفت او انه لسة جديد فى السواقة او واحد ماشى بسرعة كبيرة ويعمل حادثة
بردوا يقلك دة حسد انما ميقلش انا بسوق بسرعة او واحد رايح زيارة للناس فى عز ازمة الكهرباء والنور بيقطع كل يوم
فى يقلك دة قدمة فقر مع انى البلد فيها مشكلة طاقة او وحدة عامله فرحها فى الشتاء والمطرة تمطر تقلك دة عين
ياستى احنا فى شتاء او واحد مهمل فى شغلة فى يستغنة عنه يقلك اتحسدت انت اصلا انسان مهمل او الى بيقول صاحبه كان شغال فى السياحه وكان بيكسب واتحسد هههه دة على كدة الراجل الى حسد صاحبك دة خارق عشان وقف حال السياحة فى البلد كلها واحد هيقولى اية يعم اومال اية الحسد بقا اقوله خد عندك واحد لابس خاتم لسة جديد ولسة واحد شايفة يروح حسدة فى الخاتم يتقسم نصين او واحد يكون ماشى ولابس ومتشيك ولابس بدله نوع نضيف فى صاحبه يشوفه ويحسده فى البنطلون او الجاكيت يتقطعوا وقيس على كدة حجات كتير

قياسا على المواقف السابقة للكلام اللى باللون الازرق، ليه ميكونش الخاتم اتكسر لانه صينى او رخيص او خامته رديئة مثلا؟! وليه ميكونش اللى قطع الجاكت هو عدم حرص صاحبها او انه كان ساند على حديدة مثلا واتقطع؟!

الحسد بيبان وبيبقى مش محتاج تفسير او تحليل عميق
هوب .. دب .. ربنا يعوض عليك !

اعرف راجل كبير فوق الستين سنة بس اسطورة والناس كلها عارفه قدراته الخارقة وله مواقف عجيبة ومزاج خاص فى الحسد، يعنى مثلا اى دابة تعدى قدامه تاخد الجرعة ومتعديش تانى (حمار، بغل، بقرة، جاموسة .. الخ) هو بيعز الحيوانات متفهمش ليه وله نوادر تحكى فى هذا التخصص النادر

ابنه معاه عربية نقل جامبو عمل حادثة بيها بيقول ابويا فى اليوم ده الصبح قبل ما اطلع بيقولى محافظ انت عالعربية لا عمرة ولا خبطة .. على اخر النهار كان خيش والعربية صرفت قد كدة !

مرة برضه كان معدى على ناس بتحفر اساس لبيت وقف فوق دماغهم وقالهم الارض حلوة مجابتش ميه مفيش متر والتانى والمياه طلعت وعملت بحيرة بشكل غريب (طبعا ده كان شئ متوقع بالنسبة لهم اصلهم عارفينه :)

اما الموقف ده فحصل معايا شخصيا .. كنت انا ومعايا واحد جارى بنجهز حبال الزينة والانارة بتاعة المسجد اللى جمبنا عشان شهر رمضان وقاعدين بنجرب كل لمبة فى الدواية بتاعتها قبل صلاة العصر كدة ودخل صاحبنا فجأة، والله العظيم لا قال سلام عليكم ولا نطق بكلمة واول ما شاف كرتونة اللمبات الجديدة والادوات والزينة لقيته بص عاللمبة اللى فايدى انفجرت فى وشى فى نفس اللحظة والكهربا عملت قفلة !!
الباشا خد بعضه ومشى بعد ما ادى المهمة بتاعته
وانا سبت الزينة وروحت

المشاركة الأصلية كتبت بواسطة hugan

ههههههههه
لاء الراجل ده عدي كل الحدود

على فكرة الراجل ده شهرته فى المنطقة (الظابط) الناس مسمياه كدة
وشوف بقى الظابط لما بيعدى اللى بيخاف بيعمل ايه هههههه