الموضوع: تجربة الفكترا B مع البنزين 95

سيارة التجربة : فكترا 98 1600 كامة واحدة مانيوال

فترة التجربة : حوالى اسبوع ونص او اسبوعين

بداية او سبب التجربة :
دايما كانت لية ملاحظة على الموتور دة انة خشن شوية وبالذات وهو بيطفى ساعات بيعمل رجة شوية كأنة مش مظبوط (خشن مش عربية لادا يعنى فى السلانسية هلدى وصوتة ناعم انما فى الجرى والقرص مش ناعم اوى) المهم سألت ميكانيكية اوبل كتير وسألت التوكيل وكلة بيقولى عادى مفيش حاجة وعلى الجهاز مفيش حاجة !! طيب الرجة دى اية (رجة خفيفة وانت بنطفى) الكل يقول لأ هى كدة عادى بالعكس عندك اخف وانعم من ناس كتير .. !!!
موضوع محير وخصوصا احنا مبنتكلمش على شركة بتصنع عربيات من اول امبارح , فى الاول مكنتش مقتنع بس قولت مادام الكل بيقول كدة خلاص هوجع دماغى لية المهم بدأت الاحظ ان العربية وهى باردة بتطفى عادى عكس لما تسخن تحس بالرجة شوية عكس لما تبقى مشغل التكييف ومحمل على العربية او بتجرى والجو حر بتبقى زيادة !! معنى كدة ان الرجة دى مرتبطة بدرجة الحرارة مش الموتور هو اللى كدة لأن لو موتور العربية كدة مكنتش هتفرق باردة ولا سخنة.

طيب اية علاقة درجة الحرارة بالرجة دية ؟؟
علشان نعرف اية العلاقة لازم نقول ان الموتور دة نسبة الانضغاط بتاعتة 8,8 يعنى نسبة انضغاط منخفضة معنى كدة ان العادم طالع بكمية طاقة او حرارة عالية معنى كدة ان صمام العادم هتتنقل لية كمية حرارة عالية نتيجة خروج غازات العادم (عملية انتقال حرارة بين العادم والصمام) يعنى الصمام دة بقى hot spot او مصدر حرارة يعنى ممكن يعمل اشتعال للخليط غير البوجية .

طيب اية علاقة دة بالرجة؟؟
علاقتة انك لما هتطفى العربية وبالذات لو الجو سخن ومحمل على العربية هيبقى صمام العادم درجة حرارتة عالية وبالتالى ممكن يؤدى لاشتعال الخليط جوة السلندر لما تطفى ودة اللى هيعمل الرجة

يبقى الحل ان احنا نقلل درجة حرارة الموتور بس دة هتضطر تلعب فى العربية وهتبرجل العربية لأن الموتور مصمم للعمل باعلى كفائة على درجة حرارة معينة ودة اللى نظام التبريد بيحاول يحافظ عليها فى الرينج دة ..
طيب ماهو فية حل تانى اذا كان المشكلة فى درجة الحرارة واشتعال خليط الوقود بدون البوجية طيب منجرب نوع بنزين من البنزين بتاعنا اللى ربنا وحدة يعلم بية يقاوم الظاهرة دى , معروف كل لما يعلى رقم الاوكتان تبقى مقاومة البنزين دة للاشتعال الذاتى اعلى طيب بما ان انا بحط 92 يبقى اجرب 95 نظرا لأن دة اعلى حاجة موجودة هنا
وبنظرة سريعة على الكتالوج العربية تشنغل على بنزين 87 , 91 , 95 , 98 "خالى من الرصاص"

طيب فضلت ماشى بالبنزين اللى عندى لحد لما التانك قرب يفضى واللمبة تنور وروحت حطيت 20 لتر 95 وانتهزت فرصة نزولى فى مشوار تبع الشغل فى المهندسين فى اليوم دة يعنى حرارة واشارات وتكييف وقرف علشان اجرب
حطيت البنزين وخرجت من المحطة العربية عادى مفيش فرق طبيعى الموضوع مش هيبان فى ساعتها 92 لسة جوة تانى يوم حسيت ان سحب العربية اتحسن والموتور بقى اهدى , بعدها بيومين تلاتة عبال لما كل ال 92 اتحرق العربية اتهبلت بقى عندها اسهال جرى العربية كانت بتبقى تقيلة على الاول والتانى وبالذات على عدد لفات منخفضة اوى دلوقتى لأ سحبها اتحسن كتير حتى لو على عدد لقات منخفض وحتى لو مشغل التكييف , حطيت بعدها 20 لتر كمان 95 ... الملاحظ كل لما بتمشى علية اكتر السحب بيتحسن والموتور بيهدى اكتر والرعشة اللى كانت لما بتطفى العربية قلت عن الاول حتى لو كنت بتجرى ومحمل وطفيت العربية وملحوظة كمان ان درجة الحرارة قلت عن الاول بس مش عارف احدد قلت اد اية بالظبط او دة مجرد احساس مش عارف بس دلوقتى مثلا لو ماشى عادى جوة البلد من غير تكييف وزحمة وحر بتبقى اقل من 90 لو وقفت فى اشارة بتوصل 90 (طبعا علشان تقيس مظبوط لازم تبقى بنفس طريقة السواقة وظروف الطريق ودرجة الحرارة قبل 95 وبعدة ودة استحالة)

طبعا دة انطباع اولى مش كامل علشان تحس بالتأثير صح محتاج تمشى علية فترة طويلة وتغير الفلتر وتنضف دورة البنزين ورواسب الكربون اللى مترسبة على الصمامات والبساتم وبعدين تحكم الحكم النهائى وطبعا فى ظل اللتر ب 2.75 دة استحالة طبعا والعربية تبوس ايديها وش وضهر على ال 92 والنعمة اللى هى فيها

وبكدة يبقى علمت على مهندسين التوكيل للمرة التالتة او الرابعة مش فاكر

محتاجين بقى واحد فدائى يضحى فى سبيل اوبل ويدور على ال 98 لو لقى اصلا ويجربة ويقولنا عمل اية