تحذير واجب من زيت شيل الاصفر

**Silent~Dream** · 07-11-2013 10:33 PM

يا باشا شكرا على التحذير بس راجل مخضرم فى المنتدى و عارف الدنيا ماشيه ازاى الزيوت المعبئه فى مصر كثير جدا منها مغشوش و فده لا يعيب زيت شل الاصفر او الاحمر 50w20 عشان الاصلى الغير مغشوش ممكن يكون ادائه افضل من كده لكن للاسف حضرتك جبت زيت مغشوش وده وارد جدا جدا فى مصر وعشان كده يفضل اى زيت متعبى برا مصر و كمان من مصدر موثوق عشان الغش

**Silent~Dream** · 07-11-2013 10:37 PM

المشاركة الأصلية كتبت بواسطة ahmadaly1999

طبع rpm 6500 مع زيت معدنى ممكن يعمل كدا
لكن فعلا شيل الترا يستحمل اكتر من كدا ممكن ل rpm 8000 و اكتر لانه موصى به لفرارى
انا بحط شيل الترا و ساعات اجيب على التانى 80 يمكن ال rpm ساعتها بيوصل 6000
بغيره على 25 لـ 30 الف كم ( معرفش ليه مسمينه 10 الاف ) و العربية ماشية 265 الف كم 11 سنة

حضرتك 6500 على التاكومتر عادى لاى زيت معدنى ولا نص تخليقى ولا تخليقى مش فارقه اهم حاجه جوده المنتج والفرق فعلا ان الزيت بيتحلل فى وقت اقل من ظروق القياده العاديه و بالنسبه للى بيقول زيت 10 الاف وكده كثير جدا من الناس مع احترامى ليهم المفروض يبقى اكثر ثقافه و عارف ده ليه 10 وده ليه لما لزوجته تقل و ده يحطه و ده موصى بيه و هكذا لكن ثقافه الناس فى الزيوت دى مع احترامى ليهم لا تتعدى ثقافه الميكانيكى عن الفيزياء النوويه المفروض يسئلوا ناس ذو خبره فى المجال ده او يعلموا نفسهم لكن صعب تلاقى حد بيعمل كده

**saddam** · 07-11-2013 11:14 PM

المشاركة الأصلية كتبت بواسطة ahmedjemy

طيب يا اخ صدام تنصحني احط زيت اية للعربية لاني بحط زيت شيل الترا , انا عربيتي جديدة لوجان 2013 وحابب اعرف برضو اية الاضافات اللى تتحط على الزيت علشان يحمي الموتور , انا من المتابعين ليك ودايما بسم اللله ماشاء الله كلامك بيبقى موثوق فية وباين الخبرة اللى عندك فارجوك ما تبخلش على اخوك بالمعلومة وجزيت خيرا وللامام من نصر الى نصر :)

صديقي المواطن
أنا شاكر ليك جدا ثقتك الغالية على قلبي وبالنسبة للإضافات فلازم تعرف إنها بغيار الزيت وطريقة تغييره الخاصة ممكن تخش ب 850 جتيه ويقعد 20 ألف كيلو وساعة مينزل يكون كبس الموتور أعلى من قبل متحطه ولكن بما إني بحب أجازف وأتحمل مسؤولية أفعالي فمبحبش أنشر تجارب وناس تعملها ويلبسوا في الحيط ويقعدوا يدعوا عليا فلو حضرتك موافق بالكلام ده إبغتلي عالخاص أبعتلك رقمي تكلمني وأدلك وأعلمك كل حاجة لكن أرجوك لو تسمع ومش تنفذ فأرجوك تعفيني إحنه بنقدم نصايح مكلقاني مشاوير وتجارب وآلاف الجتيهات وكمان برد بالتلفون عالناس كلها وفي اﻵخر ألاقيه يحط زيت من دماغه ويقعد ينقي إضافه على مزاجه فبيخليني أزعل وأتعب تفسيا بنمد للناس إيدينا ببلاش وهم بيرفضوها بطريقة مش وطنيه
وهذا ما لزم بيانه ودمتم
وبالتوفيق وإلى الأمام ومن نصر إلى نصر
ودمتم للنضال

**teto2007** · 08-11-2013 07:13 AM

يا جماعة انا بشتغل فى شركة بترول وشكركتنا هى اللى بتوزع الزيوت للشركات زى شل وموبيل وتوتال كل الشركات الزيوت كلها واحد لان ليها مواصفات عالمية ميقدرش يغشها يعنى مثلا api sl من اى شركة زيوت بتبقا كلها واحد مفيش حاجة اسمها زيت احسن من زيت لاتها خاضعة للمواصفات يعنى التعاون زي شل زى موبيل زى اى شركة وشكرا ليكم

**lanos2004** · 08-11-2013 08:22 AM

المشاركة الأصلية كتبت بواسطة teto2007

يا جماعة انا بشتغل فى شركة بترول وشكركتنا هى اللى بتوزع الزيوت للشركات زى شل وموبيل وتوتال كل الشركات الزيوت كلها واحد لان ليها مواصفات عالمية ميقدرش يغشها يعنى مثلا api sl من اى شركة زيوت بتبقا كلها واحد مفيش حاجة اسمها زيت احسن من زيت لاتها خاضعة للمواصفات يعنى التعاون زي شل زى موبيل زى اى شركة وشكرا ليكم

انا فهمت خلاص هشترى زيت التعاون احادى الدرجه
بس ليا سؤال هوة ليه كل نوع بتاع شركه مختلف لونه عن التانى طالما الام واحد

**gadoo30** · 08-11-2013 10:50 AM

المشاركة الأصلية كتبت بواسطة osra26

نصيحة لكل شخص يستعمل زيت التعاون بانواعه
انا بستعمل زيت التعاون اللى فى جركن اصفر
يوجد نوعين واحد 5000 كم والتانى 7000 كم وعندى لانوس 2004 عاملة 110 الف كم والمكنة زى الفى بالرغم انى بغير الزيت بعد ميعاده ب 1000 كم
انا بشجع زيت التعاون وسعره ثلث سعر موبيل وشل

انا كانت عندى دوجان 1996 موتور تمبرا بتحط تعاون وقعدت معايا 4 سنوات وكنت بحط تعاون الاصفر 5000 ومرة ال 7000 بس نقص العربية زى الفل وبعتها فلة وكانت عاملة 185 الف كم والحمد لله السحب حكاية والموتور عمرة ما اتحل وانا كنت تالت ايد بس من ناس محافظة
وزيت التعاون عمرة ما قل معايا
انما في الافيو حطيت شل الترا 10000 ودلوقت بجرب وولف فايتل تك 5w50 وصاحبها القديم كان بيحط موبيل 5000

**D . a .\ AYMAN** · 08-11-2013 11:25 AM

المشاركة الأصلية كتبت بواسطة lanos2004

انا فهمت خلاص هشترى زيت التعاون احادى الدرجه
بس ليا سؤال هوة ليه كل نوع بتاع شركه مختلف لونه عن التانى طالما الام واحد

التعاون مش وحش بس كود الخدمة بتاعه أقل من شل أو توتال مثلا .. عشان كدة مش هايقعد قيد الاستخدام فترة زيهم ولكن فترة خدمته أقل .. وبيتحلل أسرع

يعني مثلا التعاون مستوى الخدمة بتاعه على ما أذكر كان sj ... لكن مستوى الخدمة بتاع الشل أعتقد كان sn أو sl وعشان كدة الشل بيخدم مدة أطول وفي ظروف أصعب

وعموما انت ماينفعكش غير زيت تخليقي سواء بقى التعاون أو أي شركة ولكن لازم زيت تخليقي ... لأنه هو الزيت اللى من مواصفاته إنه كل ما تحرق عليه أكتر في اسلوب القيادة بيسد أكتر .. بعكس المعجني اللى كل ما تحرق عليه كتير بيفقد لزوجته أكتر

اللى بيفرق زيوت أي شركة عن التانية هي تركيبة الإضافات اللى بتتحط على الزيت ... وفعلا كل الشركات بتاخد الزيت المعدني بتاعها من مصر للبترول فقط .. لكن معامل الخدمة اللى هو api ده بيتحدد بناء على نوعية وكمية الإضافات اللى بتحطها الشركة الموزعة للزيت واللى ماركتها هاتتحط على العلبة

كل ده بالنسبة للزيت المعدني أو حتى النصف تخليقي

لكن الزيت التخليقي بالكامل فهو بيخضع لمواصفات الشركة الأم ... لأن الزيت التخليقي بيتم تصنيعه في المعمل بالكامل وماهواش زيت معدني عشان ياخدوه من مصر للبترول ... يعني مثلا زيوت شل بيتم تصنيعها في مصنع شل في المنطة الصناعية الرابعة في 6 أكتوبر ومكتوب على العلبة بتاعته كدة

وبرضه بيخضع لنفس معايير الخدمة api ... ومعيار الخدمة بتاع الشل التخليقي حاليا اللى موجود في السوق sn ودي متأكد منها عشان لسة مغيره من إسبوع تقريبا

وتوتال كان sm عشان كنت حاطط منه في العربية من حوالي أربع شهور

**mohamedxsayed** · 08-11-2013 03:51 PM

والله انا نفسى أدخل موضوع زيت الاقى اغلبيه ناس متفقه على نوع واحد
بس مفيش كله شويه متحيزين لنوع وخايف اجرب زادو او وفولف لانى قريت ان ناس اشتكت منهم
عشان كده انا هكمل على شيل الترا او ممكن كاسترول