الموضوع: ربنا يعافيكم...فيه حد عنده تجربه مع الانزلاق الغضروفى

المشاركة الأصلية كتبت بواسطة amrelsaqqa

ما شاء الله ، انا دخلت وشوفت العناوين ومهتم بالموضوع بس عندى كذا استفسار في الاول بعد اذنك

-حما حضرتك اتحسن بعد كام جلسة تقريبا ، وهل خف تماما تماما ولا لا ؟
-هل العلاج يتطلب الاستمرارية ولا بعد كذا جلسة بتخف نهائيا ومش بتحتاجه ؟
- هل معنى ان حماك اشترى الجهاز ان الجلسات ما بتنتهيش ولازم يستمر عليها ، ولا انا فاهم غلط ، وليه اشترى الجهاز لما الجلسات مجانية ؟

معلش لو هتعبك بس والله انت متعرفش هدعيلك قد ايه لو اللى في بالى حصل :)

بالعكس يا أخي الحبيب أنا تحت أمرك
بص موضوع هو بيخفف نهائيا أو مؤقتا ده مقدرش أفتيلك فيه لأن حمايا لحد دلوقتي الحمد لله كويس جدا لكن لو بذل مجهود غير طبيعي أو عمل حركات خاطئة ممكن يرجعله الوجع تاني بس مش زي الأول طبعا ولما بياخد الجلسات بيرجع يتحسن لكن هو لحد دلوقتي بقاله سنة تقريبا أو أكتر صحته ممتازة الحمد لله مع العلم إنك ممكن تعمل العملية الجراحية والوجع يرجع تاني فمفيش حاجة مؤكدة بتشفي تماما بنسبة 100% كلها أسباب ممكن واحد يخف نهائيا وواحد تاني يخف مؤقتا ويرجعله الألم تاني وأنا عن نفسي عندي البواسير بقالها حوالي 4 سنين ومتعايش معاها باخد مراهم لما الألم بيجيلي والمراهم بتسكن الألم وومكن أقعد شهرين وتلاتة بدون أي ألم وممكن الألم يرجعلي تاني يقعد يوم ويومين لكن برجع أتحسن تاني والحمد لله لا عملية ولا أي حاجة

بالنسبة لعدد الجلسات فدي تقريبا برده حسب حالتك لكن انت بمجرد ما بتاخد خمس ست جلسات بتبدأ تحس بتحسن وغالبا الكورس بيبقى 15 ساعة يعني تقريبا 30 جلسة لو خدت كل يوم جلستين واحدة الصبح وواحدة بالليل إن شاء الله خلال أسبوعين هتبقى زي الحصان

العلاج لا يتطلب الاستمرارية إلا لو حسيت بتعب تاني لو عملت مجهود زيادة أو قمت بحركة خاطئة وحمايا اشترى الجهاز علشان يكمل عليه الجلسات لأنه مقيم بمدينة بدر والمشوار كان بعيد عليه ومكنش يقدر يروح المشوار ده كل يوم زائد علشان يفيد بيه باقي الأسرة أو أي حد مريض يعرفه لأن الجهاز بيشتغل مساج للضهر برده وبيعالج من حاجات تانية كتير غير آلام الضهر فهو جابه للنفع العام يعني لأي حد محتاج وفي نفس الوقت لو الألم رجعله يبقى الجهاز تحت إيده بدل ما يروح المشوار ده كله

زي ما قلتلك جرب المراكز المجانية دي الأول وخدلك كام جلسة لو حسيت بتحسن وتقدر تشتريه فمش هيضرك في شيء أبدأ بالعكس ده هيقيك من أمراض كتير وهيعالجك من أمراض كتير بإذن الله لو مش عايز تشتريه مفيش مشكلة برده هتروح أي مركز من دول تاخد الجلسات كل ما تحتاجها وربنا هو الشافي ومتنساش تدعيلي :)