للمهتمين برياضة كمال الاجسااااااااام

للمهتمين برياضة كمال الاجسااااااااام واهل الخبره في المجال انا بلعب بقالي حاجه وعشرين يوم وزدت الحمدلله 2 كيلو ونص وبحاول اضخم شويه مع العلم طولي 172 ووزني 68 وعاوز اوصل لل 80 ان شاء الله .. المهم ناس قالتلي عالواي بروتين وجربت نوع امريكي في الجيم بس خوفت بصراحه مش عارف ليه وبعد كده جبت انا واي بروتين بس من "امتنان" واول يوم اخده النهارده ايه رأي الناس فيه ؟؟ وياريت تقولولي غلى طرق كويسه اقدر ازيد بيها عالاقل 5 او 7 كيلو في شهر عالاقل مع العلم باكل كويس جدا الحمدلله ومهتم بنظام غذائي خاص بالتضخيم وماشي عليه .. وشكرا مقدماً عالرد :)

ياباشا انت بقالك حاجه وعشرين يوم ياعنى لسه بدرى اوى على اللى بتقوله دا
انا من وجهه مظرى انك المفروض تصبر على الاقل 3شهور علشان تنقى ملم شويه بالرياضه دى ومترميش فلوس فى الارض
ركز اووووى فى التمرين ومتبصش انك ترفع اوزان كبيره وخلاص التركيز اهم من الاوزان
نظم اكلك وجبات ضغيره وعدد كبيره ياعنى مثلا 5-6 وجبات يوميا بس بكميات صغيره وفايده عاليه
وركز اوى على البروتين بجميع صوره لبن بيض سمك لحمه فراخ
فكك من المكملات دلوقتى خالص استنى شويه عليها وكمان انت مش بتعتمد اوى على المكملات حتى بعد فتره من التدريب المكمل باين من اسمه انه مكمل للنسب اللى مش هتقدر تعوضها من الاكل الطبيعى بس باردوا مش هتفضل طول عمرك معتمد عليه هى فتره وشكرا

الرياضه دى عايزه صبر نصيحه اصبر علشان تبنى جسم كويس وسليم مش مجرد ماتسيب التمرين تلاقى جسمك مافيش
انا بقالى حوالى سنتين سايب التمرين ولسه جسمى مشدود الى حد ما وعمرى ماخدت مكمل كان كله اكل طبيعى وتركيز جااامد فى التمرين ليس الا

ماشاء الله :) وانا ناوي الاستمرار فعلا والحمدلله رغم ان لعبت فتره قصيره الا اني شوفت فرق كويس عليا الحمدلله .. وانا ملتزم بنظام غذائي كويس وباكل كويس على قد مااقدر .. بس اقدر اخد نتيجه ان جسمي يبقى كويس واشوف فرق "ملحوظ" بعد فتره قد ايه؟؟

لسة بدرى على المكملات

الفكره ياجماعه اني جالي احباط من واحد اعرفه وعارف انه بيلعب بقاله 6 شهور وبيشيل اوزان ماشاء الله كويسه ورغم ده تقريبا في جسمي!! وشكله ميديش خااااااالص !! وهو مبيخدش مكملات .. وبصراحه انا بدور عالمضمون وعالشكل بردو .. وده كان السبب اني ادور عالمكملات

على فكره جسمك دلوقتى انت ملاحظ عليه انه بيزيد جامد علشان انت شغلت العضلات مره واحده ومهتم بالاكل
بس استنى فتره كده وهتلاقى ان ججسمك مش بيزيد خااااااااالص
علشان هيكون خلاص خد على الاكل الكتير والتمرين
طبعا المشكله دى ليها حل وهو انك كل فتره تغير نظام التمرين و النظام الغذائى علشان تكسر الروتين للجسم

وبعدين موضوع صاحبك دا انا شايف ان العبره مش فى الاوزان اهم حاجه انك تركز فى التمرين ودى قدرات يا سيدى قول ماشاء الله ومتبصش لغيرك مدام انت ماشى صح
وعلى فكره الواى بروتين مش هيخليك ترفع اوزان زياده ولا حاجه
الكرياتين هو اللى يعمل معاك النقطه دى وطبعا فى حاجات تانيه كتيير بس مش وقتها خالص دلوقتى
وربنا معاك يا وحش

1- مالكش دعوه بحد في الجيم غير نفسك
2- المكملات مش قبل 3 او 4 شهور (عالاقل) عقبال ما تكون ملم بزوايا الحركه...الخ
3- واي من امتنان لاتعليق بصراحه خساره فيه الفلوس
4- الوزن اللي بتزيده في الأول ده تنساه تماما عشان ده rate مش هيحصل تاني
5- نظم اكلك كويس واوعى تاكل من الشارع ونام كويس وابعد عن العادات السيئه
6- الواي عموما مكمل غذائي مش سحر, لو معاك تمنه ابقى هاته وطبعا هيعمل معاك فرق مش عايزه كلام بس مش لدرجة انه يزودك 10 كيلو في كام شهر
7- المكملات لو اتاخدت صح مافيش منها اي ضرر الا لو انت عندك مشكله صحيه لاقدر الله

انت لو عايز تزيد وزن و ضخامة يبقى سيبك من الواى
هاتاخد سيرياس ماس او برو كومبلكس او روشن بير "الدب الروسى"
كل دى مكملات ضخامة و زيادة للوزن للناس اللى عندها نحافة
او جسمه كنز و عايز يبقى ضخم شوية و عريض

طب ايه ياجدعان :d ايه الاحباط ده ؟؟؟ :d يعني مش هشوف فرق لمدة شهوووووووووور؟!! :( يعني اقدر اخد نتيجه بعد سنين ولا ايه :d :d

اقتباس:

---

المشاركة الأصلية كتبت بواسطة أسامه طياره

طب ايه ياجدعان :d ايه الاحباط ده ؟؟؟ :d يعني مش هشوف فرق لمدة شهوووووووووور؟!! :( يعني اقدر اخد نتيجه بعد سنين ولا ايه :d :d

---

احباط ؟؟؟
هو انت لسه بدأت ؟؟
بص
انت هتحس بنتيجه كل فتره انت وطبيعة جسمك
النتيجه دي مش شرط تبقى وزن جسمك
ممكن قوتك تزيد
حجم العضله يزيد (مع ثبات الوزن او زيادته ببطء)
هتحسها انت في حركتك
فرق واضح للغير في (شكل) جسمك
يعني سنه مثلا
تكوين العضله مش بالسهوله اللي انت فاكرها او بالطريقه اللي بتبينها شركات المكملات
بس مش معنى كده انك تحبط
عشان انت مش هتخش الجيم تطلع ارنولد
هو حاجه انت مدخلها في روتين حياتك تحسن صحتك للافضل :)

حضرتك صح يااستاذ عبد الخالق :) وربنا المستعان :)

اقتباس:

---

المشاركة الأصلية كتبت بواسطة أسامه طياره

حضرتك صح يااستاذ عبد الخالق :) وربنا المستعان :)

---

فى الحاجه وعشرين يوم انت اتمرنت كم مره ؟

الاستعجال وحش ممكن يدخلك فى طرق غلط وحقن وهرمونات

انت لسه مابدأتش شويه كده وهتحس ان التمرين بقى سهل جدا عليك وحاول تروح الجيم للاستمتاع بالتمرين ومتستعجلش وهتشوف نتيجه مرضيه لك بعد 6شهور

من الاخر اللى بيجى بسرعه بيروح بسرعه
ياعنى بص لاى حد من صحابك كان بيمارس رياضه وهو صغير وشوف العضله عنده عامله ازاى وبالاخص السباحه هتلاقى عنده عصب وعضل احسن من اللى بينزل الجيم

الخلاصه ركز فى تمرينك وركز انك تبنى عصب كويس وتوز وزنك عضل مش دهون ودى اهم حاجه
انت سهل دلوقتى انك يبنى جسمك صح علشان ماترجعش تندم وتلاقى نفسك عايز تنزل دهون علشان تظهر العضله

وحاول متنزلش الجيم كل يوم خلى يومين راحه اسبوعيا علشان تدى لجسمك الفرصه انه يزيد لانك مش بتخسس

ماتكلش اكل فى دهون كتير
نام كويس
وانسى المكملات دلوقتى خالص
ولو تعرف تنزل تجرى وتعمل شويه سويدى جنب الجيم يبقى انت فعلا عايز تبنى جسم صح مش منظر وخلاص

شوف ياباشا ..

الموضوع كله غير منسق ولازم يتنسق اكتر من كده ..

اولا :

لو دى اول مرة فى حياتك تمرن جسمك فى جيم ومتمرنتش قبل كده خالص يبقى تستنى شوية على المكملات وتبدأ تاخد منها بعد حوالى 3 اشهر على اقل تقدير ومش اى مكملات كمان

ثانياً: خسارة تدفع فلوس فى مكملات محلية اساسا اقرص على نفسك شوية وهات مستورد لان المحلى زى قلته

ثالثاً : لازم تحدد هدفك الاول وبعدين تبدأ تعمل البرنامج بتاعك وكل جسم وليه متطلباته بمعنى انك حالياً محتاج ايه
تضخيم .. محتاج تنشيف .. محتاج زيادة فى الوزن .. وهكذا

رابعاً : المرحلة اللى انت فيها دلوقتى محتاجة انك تركز فى التمرين وتنفذه بالطريقة الصحيحة ومتبصش لنتيجة دلوقتى ..

واهم شئ فى الموضوع كله الاستمرارية ..

وبالتوفيق

شكرا للجميع :) وبجد شكرا ليكوا جداااااااااا عالنصيحه :) وان شاء الله ناوي الاستمرار وواخد الموضوع جد ونفسي في المضمون قبل الشكل ان شاء الله :) وربنا يوفق الجميع يارب :) :)

طيب بالنسبه بقى للعكس الى وزنه زايد و ابتدى يخس و عاوز اعمل عضله دراع و بنشات و عاوز نظام غذائى كويس مع العلم انى مش بروح الجيم لكن عندى دمبل 9 كم بشلها بتاع 100 مرة على 3 مجموعات فاليوم و فعلا شكل دراعى اتغير بقالى بتاع شهر دلوقتى تنصحونى بايه

اقتباس:

---

المشاركة الأصلية كتبت بواسطة midooo_119

طيب بالنسبه بقى للعكس الى وزنه زايد و ابتدى يخس و عاوز اعمل عضله دراع و بنشات و عاوز نظام غذائى كويس مع العلم انى مش بروح الجيم لكن عندى دمبل 9 كم بشلها بتاع 100 مرة على 3 مجموعات فاليوم و فعلا شكل دراعى اتغير بقالى بتاع شهر دلوقتى تنصحونى بايه

---

عليك وعلى السويدى والجرى
هتحسر وزن كبير جدا من جسمك بالطريقه دى انما الجيم مش هيخسسك كتير لوحده لازم تنزل تجرى علشان تحس بفرق
وكمان لازم تنظم اكلك شويه ماتكلش اكل فيه دهون كتير ومتكلش من الشارع على قد ما تقدر

ولو مش عايز تنزل الجيم ممكن تمارس السويدى فى البيت زى الضغط والتويست الجرى فى المكان لو تقدر

اقتباس:

---

المشاركة الأصلية كتبت بواسطة midoabdeen

عليك وعلى السويدى والجرى
هتحسر وزن كبير جدا من جسمك بالطريقه دى انما الجيم مش هيخسسك كتير لوحده لازم تنزل تجرى علشان تحس بفرق
وكمان لازم تنظم اكلك شويه ماتكلش اكل فيه دهون كتير ومتكلش من الشارع على قد ما تقدر

ولو مش عايز تنزل الجيم ممكن تمارس السويدى فى البيت زى الضغط والتويست الجرى فى المكان لو تقدر

---

طيب انا لو عاوز عضله الدراع تكبر و العروق تبان هل ده بالتدريب الكتير عالدمبل ده و لا لازم اشيل اتقل ؟؟ انا عارف انى ممكن اخد حاجات تساعد فده بسرعه بس انا عاوز يبقى كله طبيعى خاصه ان العروق بتبان وانا بدرب ولما بخلص شويه و بتختفى تانى

مبدئيا مافيش جسم مافسهوش عضلات
ولو مافيش عندك عضله مش هتقدر تتحرك
بس هى الفكره ان نسبه الدهون فى جسم الانسان بيعمل زى طبقه كده بيخلى العضله مش باينه
ياعنى من الاخر علشان توصل للمرحله اللى انت عايزها دى لازم تبقى نسبه الدهون فى جسمك اقل ما يمكن
وكمان مع التمرين العضله حجمها هيزيد
انما انك تنزل الجيم وتكبر العضله وتشتغل عليها ونسبه الدهون فى جسمك عاليه يبقى انت فى مرحله التضخيم
وبعد كده تدخل على فتره التنشيف علشان تنزل الدهون فى جسمك علشان تظهر العضله

اقتباس:

---

المشاركة الأصلية كتبت بواسطة midooo_119

طيب بالنسبه بقى للعكس الى وزنه زايد و ابتدى يخس و عاوز اعمل عضله دراع و بنشات و عاوز نظام غذائى كويس مع العلم انى مش بروح الجيم لكن عندى دمبل 9 كم بشلها بتاع 100 مرة على 3 مجموعات فاليوم و فعلا شكل دراعى اتغير بقالى بتاع شهر دلوقتى تنصحونى بايه

---

ابتديت تخس, احسنت, استمر
اول واهم حاجه تظبيط اكلك ده اللي هينزل وزنك للمعدل الطبيعي
الكارديو ضروري عشان الحرق
العضلات تظهر يبقى لازم جيم, هي كده كده هتبدأ تظهر لو بتتمرن ونسبة الدهون بتقل
لكن اللي بتعمله في البيت ده مش صح, مش هيضرك, بس مش هو ده التمرين, مافيش حاجه اسمها تتمرن بالوزن ده 100 عده !, انت هتحتاج اوزان اعلى ودي في الجيم برضه :) انت مش هتعيش حياتك تلعب باي سيبس :) :)